頻收電話及短訊騷擾 對方講得出自己資料

投稿讀者:Kristen

有一晚大約10點幾,我收到個冇來電號碼嘅電話,對方講:「你真係好正,想同你搞嘢,入會議室鎖埋門搞好唔好?」

因為冇心理準備,聽到嘅時候先係好心寒,跟住就好嬲:「你係邊個?」

「我係你同事,日日望完你都要入廁所自己搞,不如我哋真做啦好冇?」

「你再打嚟我就報警。」

因為我份工係行街sales,好難唔聽冇來電嘅call,有時真係硬食,後來after work我就完全唔聽冇caller id嘅電話,而呢個變態佬竟然改為日頭打嚟,次次都講一啲好露骨嘅說話,我忍無可忍同對方講:「報咗警喇喎!」

「你咪報囉,你在明我在暗,溶咗你都得呀,我日日睇住你㗎,Assistant Sales Manager,直線係XXXX XXXX,一係我由而家開始,日日打直線同你phone sex,到你想要就話我知,放工等埋一齊去爆房好唔好?」

當一個戀態佬咁熟悉你工作環境,而又藏頭露尾,嗰種不安感會令人好唔舒服。

留意過公司嘅同事,當我office hour收到性騷擾電話嗰陣,真係冇邊個有異樣,諗諗下醒起,Assistant Sales Manager呢個title,我係早幾個月先轉正,當然自己班同事會知,不過仲有幾個客係知道,首先email個footer轉咗,其次係出去見客時派過卡片。

我先排除同事,喺office hour打嚟,個變態佬如果係公司嘅人,其實好容易斷正,相信佢想混淆視聽。

跟住我再搵一啲升職後send過email畀佢哋嘅客,因為唔係個個客都會親自去見,細客好少client visit,如果未見過我,照計唔會無啦啦打嚟性騷擾,我把聲又唔係特別好聽,所以再排除呢一堆客。

最後,我重點搵返升職後上過去client visit嘅客,其實唔算多,大約10幾個,呢班都係我見過而又派過新卡片。女性客為主,先剔除。男性客,得返4個,其中一個仲係希臘佬,唔識中文。鎖定目標,逐個打去問之前個報價點樣,會唔會畀新單我哋,其中兩個係極不耐煩,好唔想聽我sell嘢,Ok,先排除,淨返一個,打去佢公司,接聽嘅人話佢已經冇做。

印象中,呢個已經冇做嘅客當時係特別健談,你亦都可以話係女人嘅直覺,然後我決定上LinkedIn搵佢,唔上猶自可,一上去就見到LinkedIn提示有人睇過我profile,但我要係Premium account先知邊個view我profile,好在有一個月免費試用,即join,跟住見到除咗啲headhunter睇過我資料之外,就係得呢個客睇過我profile,真係咁巧合?

以其人之道還治其人之身,搵到佢新公司電話,特登打去總機,再駁畀呢個變態佬,我冇表明自己係邊個,內線一駁通就話:「電話係咪好好玩呀?」

「你邊位?」

「日日畀你性騷擾嗰位,我有friend喺電訊商做,你打133都冇用,照check到你咩時段用咩number打嚟。」

「你講咩呀?」

「我講咩?做得出唔怕認啦,我而家同你新公司啲同事逐個講。」

我完全冇透露自己係邊個,但如果佢有做過一定心虛,只係冇諗過咁快招認:「Sorry,以後唔會再打嚟,一時貪玩,畀個機會。」

好後悔冇錄音,因為成個行動都係突然諗到,又憑住一股怒火去做,事後我將呢單嘢同阿姐講,大家女人講呢啲嘢冇咁尷尬,加上嗰次client visit變態佬間公司,我阿姐都有一齊去。

因為冇實質證據,所以我冇take任何action,但最估唔到嘅係,我阿姐同變態佬新公司某高層好熟,我哋呢行話大唔大,話細唔細,行頭其實好窄,阿姐同對方嗰位高層共事過幾年,素有交情,佢叫我喺LinkedIn message佢,仲教我打:希望你以後唔好再性騷擾我,否則一定報警處理。

嗰個變態佬都好精,咩都冇講,淨係回個「👍🏻」嘅emoji,然後我阿姐叫我print screen出嚟send畀佢,佢再將呢幅cap圖send去畀變態佬公司個高層,同時打去講晒成件事出嚟,後來update嘅情況係~~~~~個變態佬過唔到試用期。

其實我都驚個變態佬冇咗份工之後會報復,但同時好心涼,亦好多謝阿姐挺身而出,我有考慮過都係報警,但唔知冇實際證據,機會大唔大,而家keep住研究可行性。

error: