老細帶頭用Signal 希望員工有得揀

投稿讀者:Jarvis

小弟係一間細公司老闆,得十零人,其實冇影響力,我帶頭用Signal之後,公司有一半員工有跟隨,有一半冇理我,當然我哋都有用WhatsApp,喺度想分享小小感受,不喜勿插。

我邀請員工試用Signal(真係禮貌地邀請,唔係施壓同情緒勒索),並非要佢哋一刀切從此關閉WhatsApp兼刪除個App,相反我係用生意角度去分析,仲舉咗一個例子:平時公司搵供應商拎貨,如果老奉將生意畀晒其中一間,對方就會大安旨意,當你傻仔咁宰割,然後喺質素、服務,同埋配套方面都不思進取,甚至衍生出不平等嘅條款,因為我哋冇引入其他競爭對手去威脅呢個供應商嘅地位,結果造就咗佢哋獨大,咁我哋就會畀人牽住個鼻走。

做人同埋做生意都係一樣,最緊要有得揀,所以我鼓勵員工用埋Signal,原意就係唔想WhatsApp獨大,唔使等到將來有唔公平嘅事發生都要硬食。

同一道理,我哋想有得揀,係因為我哋都追求自由,追求民主,民主即係大家有選擇,而唔係要大家跟隨一個選擇,如果係咁,我哋口口聲聲所講嘅自由同民主,已經變質成為另一種獨裁,我哋亦成為自己本來最討厭嗰班人。

其中一位同事相當熱血,佢轉用Signal嘅同時,不斷向幾位仲未打算轉嘅同事施壓,我從旁觀察到嗰幾個同事係有啲反感,因為佢哋感受到情緒勒索,當然熱血嗰位同事嘅初心唔係想喺情感上綁架別人,但出嚟就明顯有反效果,我會咁樣形容-----你去一間舖頭睇嘢,店員盡責地跟喺旁邊介紹產品,有啲人好受落,而有啲人就唔鍾意,覺得好煩好困擾之下寧願唔買,店員sell嘢本質上係冇錯,只係每個人嘅性格都唔同,有人受軟唔受硬,有人唔鍾意跟風,有人唔鍾意畀其他人迫住做一件事,其實我哋本來嘅出發點都係咁。

我作為老闆帶頭用Signal,係想下屬知道有得揀,而唔係要焗佢哋揀,每個人做好本份已經足夠,我哋應該係對自己有要求,而唔係要求別人點點點。

Signal,我用咗,會同人哋講我用緊,會叫同事仲有身邊人add我,因為我唔想造就WhatsApp獨大,唔希望畀人牽住個鼻走,亦唔會想自己牽住人哋個鼻走。

error: