人哋送嘅入伙禮物，最初見到個款頭係幾鍾意，直至今朝拎出嚟用先發覺好大問題。隨住斟緊嘅水愈嚟愈多，個茶壺柄就開始郁郁下，放低睇睇，原來個木柄根本「癡」得唔夠實，見到木柄個坑位有好多膠水，不過根本食唔到亦癡唔到個壺嘅短手柄，究竟有冇QC過先推出嚟賣？
屋企好多嘢拆完盒已經唔記得係咩牌子，但個手柄咁兒戲真係會出意外，成個茶壺跌落嚟，除咗碎片會割傷，熱水都會淥親，所以忍唔住睇下底部有冇牌子名，原來係扮瑞典品牌嘅NoMe。
坦白講Made in China唔係問題，我都去過NoMe，Sales們十分友善，部分產品嘅款頭係幾討人歡心，但既然本身design唔差，點解要扮Made in Sweden呢？武磊咪武磊囉，冇問題㗎，但你唔好扮伊巴謙莫域吖嘛！
中國經常標榜自己係大國，對自己嘅出品信心爆棚，咁就更加應該畀心機做好佢，而唔係要裝飾為一個北歐國家出品。
就好似個茶壺咁，你抄，但又冇質素，根基唔紮實，作風唔正派，品質冇保證，消費者同埋支持者始終都會流失。
無需要抄襲或者模仿其他人，因為「其他人」呢個角色，本身已經有「其他人」做緊，產品如是，文章如是，任何創作都如是。