最近有個朋友去interview，見完之後即刻同我分享，因為對方面試嘅時候問咗一條好奇怪嘅問題，就係模擬去咗見客食飯，席上有6個人，佢哋都係食煙，你拎咗包煙出嚟禮貌地請啲客食，點知發覺得返5枝，請問呢個時候應該點拆？
朋友話佢想答：「每個客之間擺一枝煙，等佢哋內部矛盾升級。」又或者係「自己食，然後請嗰幾個客食二手煙。」不過佢最終冇咁樣答，反而霸氣地同對方講：「我唔會畀呢種情況發生，嚟之前一定會準備6條煙，唔係6枝，係6條，然後一人送一條畀佢哋。」
我：「犀利！咁對方聽完係咪好滿意？」
「唔係呀，我見佢冇表情，不過唔緊要啦，咁嘅嘢都問得出，呢間公司都流流地，可能對方只係想測試下我係咪smoker，是但啦！我反而想問你呢啲interview question正唔正常？你以前做headhunt有冇客會問呢啲廢問題？」
有時我會覺得，當世界所有嘢都唔正常，而你一個人係正常，可能我哋先會被人視作唔正常，係咪好玄？但社會氣氛的確係咁。
佢問我有冇聽過更奇怪嘅interview question，咁就梗係有啦！印象中有個candidate見見下工打嚟求救，佢話HR丟低咗張紙畀佢，上面嘅問題係「當你見到個網球，你會覺得佢係黃色、青色，定係橙色？」
唔好話Candidate摸不著頭腦，連我都唔知呢條問題想問乜？最終想得到嘅答案又係乜？但由於時間急趕，HR話20分鐘後返入嚟，結果我幫佢上google查，哈！原來外國又真係有呢條interview question……
我喺google copy and paste成段字再WhatsApp畀個candidate，我話你照抄啦，中間改下啲字，最好特登打錯一兩個字，candidate照做，個answer長到填滿晒成版A4紙，不過咁樣未算吹漲，個interview完咗之後我打去問個HR所謂何事。
「冇㗎，冇model answer，純粹想睇下佢寫作能力咋，如果留白或者得一兩句咪唔ok囉，而家見佢填滿成版，呢個candidate ok呀！」
我：「你意思係其實答案係咩都唔重要？」
「冇人會花時間睇啦，都話主要睇佢寫唔寫到嘢之嘛！」
我都話㗎啦！個HR覺得好正常，我覺得唔正常，佢覺得我覺得有問題其實係我唔正常……
問呢啲問題唔緊要，冇model answer都唔緊要，因為間公司嘅目的可能想睇下求職者嘅文筆同埋創作力，但如果咁求其只係睇有冇填滿一張紙，內容又唔睇，字數夠多就得，咁似乎「9’s」咗少少喎！
最終個candidate過咗關，順利請咗，咁多年後直至而家仲做緊。
由於做過headhunt，其實類似嘅奇怪interview question我都有聽聞，試下節錄自己同埋同事遇過嘅怪問題：
Q：如果你得返一日命，你會做啲乜？
我唔知model answer係乜，但我會答如果得返一日命，我而家會起身走人，唔會繼續interview……
Q：如果你同同事拍拖，會唔會向上司講？
我會反問對方，究竟呢度係咪唱片公司？我係咪入咗AKB之類？經理人唔畀拍拖？否則我同同事拍拖點解要同上司講？
其餘聽聞過嘅interview question仲包括：
如果你係一種動物，你會覺得自己係乜？點解？
如果每個人都代表一種顏色同一個數字，你覺得自己係屬於咩色同埋邊個數字？
如果你可以變做香港其中一個明星，你會變做邊個？
如果你中咗六合彩有三千萬，你會唔會即刻辭職？辭職之後會做咩？如果唔辭職又係點解？
有啲interview question其實你係估到佢用意，例如中六合彩嗰條，好明顯想知你嘅性格係安於現狀定係積極進取，甚至係眼光短淺定係睇得好長遠，相信公司問得一定有佢自己嘅用意同考量，不過好似網球嗰條問題咁樣，叫人填完又唔睇，想點啫？
至於部分interview question就可能有弦外之音，例如我朋友遇到嘅「得5枝煙要分畀6個客會點拆」，有機會係考你急才同應變能力，或者好似朋友所講，想套下佢本身有冇食煙習慣，總之大家去見工遇到呢類問題嘅時候，自己就要識得執生喇。