我公司都幾多靚女，不過已經38歲嘅Charlotte喺office裡面依然好突出，論樣貌同身型唔會輸蝕畀班後生女同事，聽聞佢之前有個拍咗拖好多年嘅男朋友，只係後來唔知咩原因散咗，然後就回復單身。
公司嘅男同事大致分為兩類，一類係年紀比較大嘅，約莫30幾40歲嘅中高層，全部結晒婚，未結婚嘅就係20幾歲至30出頭嗰班男同事，包括我在內，所以Charlotte如果想喺office裡面再搵男朋友似乎唔係咁易，但係呢個機會偏偏降臨喺我身上。
喺一次同事gathering裡面，大家由公司嘢傾到屋企嘢，話題延伸到去煮嘢食，我話自己雖然一個人住，不過就好少自己煮，頂盡煮個公仔麵，大部分時間都係出街食或者嗌外賣，一個咁普通嘅話題其實喺gathering當中只係輕輕帶過，點知竟然有後續。
Charlotte：「喂，你成日出街食唔健康㗎！」
同事聚會完結後四散，Charlotte無啦啦喺我後面出現，佢話行去搭巴士嘅方向同我一樣，結果我哋就由煮嘢食呢個話題開始混熟，大家平時喺office都係傾公事多，加上佢高級過我，所以唔算好friend，不過工作上相處都冇乜問題。
我：「係人都知出街食得多味精唔健康啦，但如果我自己煮可能仲大鑊呀！直情擺唔到入口。」
Charlotte聽完之後笑得好開心，中女嚟講佢真係好正：「有冇咁誇張呀？我教你啦！煮餸冇你想像中咁難，我晚晚都自己煮，畀你睇下我平時煮咩！」
語畢，Charlotte就企咗埋嚟，開咗佢部手提電話嘅圖庫畀我睇，當時我有係咁易望下有冇其他男仔嘅相，因為好有興趣知道咁有韻味嘅女人，應該係配邊啲style嘅男士，而且我都想八卦下佢前男友咩樣。
我：「嘩，成個photo album都係食物相嚟嘅？」我完全睇唔到有任何男人相。
Charlotte：「梗係，我晚晚都煮，你睇下呢一味椒鹽瀨尿蝦，係咪似模似樣先？我阿爸話我可以去開檔。」
我：「手掌咁大隻喎，梗係正啦！」
Charlotte：「下次煮畀你食，順便教埋你啦！見你一個人住，平時肯定冇湯水，教埋你煲湯！」
我：「真係？咁我負責畀錢賣餸，你負責煮啦！」當時我覺得Charlotte講呢啲嘢同得閒飲茶冇分別，而且傾多兩句之後都到咗巴士站，佢去等佢嘅車，我去等我嘅車，始料不及第二日返到公司就有「下文」。
Charlotte：「幾時去你屋企煮瀨尿蝦呀？聽晚我得閒喎，你得唔得？」相隔一日再延續呢個話題，場景已經由街上面嘅巴士站變成公司pantry，乜唔係得閒飲茶咩？認真㗎？真係上我屋企玩煮飯仔？
我：「聽日？我……得呀，你認真㗎？」
Charlotte：「講咗就係㗎啦，我份人不嬲都咁認真㗎喎！」
我：「睇得出，見你平時做嘢就知啦，班細嘅個個都聽你話。」
其實Charlotte係隔籬team嘅Assistant Manager，佢本來有個阿姐，不過後來走咗，公司未請到人replace又冇升佢，所以暫時都係由Charlotte話事。
Charlotte：「做嘢又點同呢！聽日我放工去買餸先，WhatsApp你地址畀我吖，我自己上嚟！」
唔敢相信呢個係事實，有條女主動上嚟我屋企煮飯仔，仲要係公司裡面一位美魔女……其實38歲係咪唔應該用美魔女呢個字眼呢？
我：「咁你買咗幾多錢記得同我講，上到嚟畀返錢你。」
第二日當Charlotte拎住啲餸撳我門鐘嗰下，我仲覺得所有嘢都好唔真實，不過早一晚我已經做好晒準備，就係執乾淨間屋，等佢有個好印象。
Charlotte：「男仔嚟講你屋企算好整齊喎！呢度租定係買㗎？」
我：「買㗎，不過係屋企人資助首期，我自己負責供囉！整齊係因為知道你會上嚟，所以特登大掃除啫！」
Charlotte：「咁好？不枉我整瀨尿蝦同埋煲湯畀你。」
我：「真係好好食，唔怪得你阿爸話可以開檔啦！」
Charlotte：「冇呃你啦！仲想食啲咩？我聽日再煮。」
聽日再煮？即係聽日又上嚟？真定假呀？其實佢係咪鍾意我呢？不過我同佢相差7年喎！姊弟戀我唔介意呀，佢唔介意咩？
同Charlotte一齊係幾舒服同埋幾有默契，首先我哋唔會開口講埋啲咩「唔好同同事講我哋煮飯仔」，因為呢啲唔需要講到出口，大家都識得保護彼此嘅關係，而且成熟女人真係唔同啲，佢偏向家庭生活，大家每次見面都係喺我屋企煮嘢食同睇電視，完完全全係獨處時光。
如是者，Charlotte平均每星期上我屋企3至4日，真係好密，因為有時佢會放假上嚟，初時大家真係煮飯，過咗一個月之後情況開始有變化，佢會喺梳化度挨落我個身度睇電視，行為好似情侶，甚至係兩公婆，好微妙。
終於有一次，呢個局面由Charlotte親手破冰。
Charlotte：「你有冇諗過同我一齊？」
我一早有心理準備要答呢條問題，其實已經比預期中遲咗，所以有備而戰：「有呀，不過我擔心你嫌我細個，職位又低你好多……」
Charlotte：「你咁傳統㗎咩？定係你嫌我老？」
我：「梗係冇啦，一啲都唔覺得你老喎！」
Charlotte：「定係你鍾意公司啲妹妹仔？咁又係嘅，Katy又靚，Holly又得意，Rachel又好好身材，點會睇得上我吖！」
我：「問心，我覺得你先係全公司最正，有種只可以遠觀嘅感覺，所以你而家喺我屋企仲挨喺我度，個感覺好唔真實。」
Charlotte：「咁識講嘢㗎咩？其實你都幾好吖，點解會冇拍拖嘅？上次拍拖係幾時？」
我：「兩年前喇，冇咩點解，都係因了解而分開啦，返咗呢份工之後就忙咗，所以咪冇拍拖囉！係喎，我可唔可以問下……你之前係咪有個男朋友……」
兩個人一齊其實唔應該提以前啲嘢，但我好有興趣知，只係Charlotte並冇回答我，因為佢已經主動錫落我個嘴度，我同佢就喺梳化開始激吻，從未試過同公司同事拍拖，對方仲要高級過我，年紀大過我，唔識得點形容呢份感覺。
再後來一個月，我同Charlotte都係一齊維持呢種煮完飯仔就坐喺梳化睇電視接吻嘅狀態，終於有一晚我忍唔住，將大膽嘅「諗法」化成「做法」。
Charlotte：「等等，你係咪認真？」
我：「我梗係認真啦！」
Charlotte：「我意思係你有冇諗過同我結婚，定係玩玩下？」
冇想像過38歲嘅女人會咁樣問，通常呢種情況之下問呢種問題，一般係初戀女友先會咁做，嗰一刻我猶豫咗，唔係唔鍾意佢，只係拍拖同返工一樣，冇理由試用期都未過就要簽終身合約，嚴格嚟講大家連街都未出過，呢兩個月不斷喺屋企煮飯仔同攬攬錫錫，你突然問我會唔會結婚？
可能見我猶豫加埋「停晒手」，Charlotte再補充多句：「如果你唔打算令我著上婚紗，咁你而家就唔好除我件衫。」
……金句嚟㗎？（未完待續）