早排公司想炒一個好卸膊嘅廢人，然後請返一個正常人，由於件事要秘密進行，所以唔方便公開出招聘廣告，我搵咗headhunt幫手之餘，另外亦周圍叫朋友介紹，結果我女朋友個阿哥話佢契妹搵緊工想試下。
本身已經對契哥契妹呢啲稱呼冇咩好感，通常係溝唔到先至認契妹，加上係女朋友阿哥介紹，驚之後有咩事又面左左，不過始終要畀面見下嘅，話唔定真係適合可以嗱嗱聲搞掂呢！
要秘密進行因為驚公司個卸膊精玩嘢，全office都對呢個廢人好反感，唔做嘢冇承擔而且態度差，見高拜見低踩，唔花時間講佢喇，總之我約咗女友阿哥個契妹見工啦，地點喺公司附近間coffee shop，打算簡簡單單做個interview，阿姐都跟埋落去見。
行緊去coffee shop嘅時候收到女友阿哥電話，佢話契妹諗諗下覺得唔上office見工有啲危險，所以搵咗個女仔friend陪埋喎，我聽到嗰下已經O晒嘴，coffee shop公眾地方咁多人，安全過上office啦，更何況咩年代呀？搵個friend陪見工？保姆呀？定係明星帶埋經理人出嚟傾合約呀？
我即刻同阿姐講，而阿姐都覺得好奇怪，不過既然出咗嚟喇，咁就見埋先囉！
入到coffee shop有兩條女等緊我哋，其中一個幾靚（下稱靚女），不過唔係契妹，佢係契妹個friend，真係搶晒focus，算啦，請人唔係睇樣，最緊要適合份工，點知契妹拍住佢個靚女friend唔止輸外表，就連談吐舉止都輸埋。
叫契妹介紹自己，拉牛上樹唔知講緊乜，分唔到係太緊張定係有個friend喺度反而唔聚財，係咪搵自己笨呢！全程interview亦都答到甩甩咳咳，我哋份工雖然唔係行街sales，但都好多機會要同客溝通，契妹全程好似一隻驚弓之鳥咁真係唔掂喎，做乜女友阿哥鍾意啲咁嘅類型㗎！（Sor，我洗唔甩溝唔到女先會認契妹呢個觀念）
契妹個靚女friend其實好識做，不發一言兼自顧自睇電話，明顯係想幫契妹減壓，期間仲想自己坐過隔籬枱唔阻住我哋，可惜未起得切身換位已經畀人坐咗，coffee shop又好full，所以佢一直靜靜地坐喺度。
後來有一part我哋要用簡單英語交談，講咗幾次契妹都聽唔明條問題，我已經feel到有隻烏鴉飛過，正當阿姐唔耐煩想提前結束個interview之際，靚女挺身而出解圍，仲好識做咁樣搭個落台階畀契妹：「可能呢度太嘈佢聽唔到。」
靚女再轉向契妹解釋條問題：「頭先佢哋問What activities or internship have you participated in? 之前你咪去過一間紙業公司做實習嘅，或者可以講下。」
好可惜，契妹都係答唔掂，講講下轉用中文，咁真係幫你唔到喎！
我阿姐無厘頭向住靚女講：「你呢？之前有冇一啲活動或者實習工作經驗，不如你示範答一次吖，介唔介意用英文講？」
結果靚女以流利英語對答，跟住唔知搞咩我阿姐好似變咗同靚女interview咁，當時已經知契妹徹底輸晒㗎喇，臨尾我話：「好，今日係咁多先，辛苦晒你哋過嚟呀，最後有冇咩問題想問？」
呢個時候契妹突然生猛，搶住咁問：「有呀，想問下幾錢人工呀？如果我而家嚟做，唔夠一年但又到新年，咁有冇雙糧呀？按比例計定係做滿一年先有？」
唔係話唔問得，不過……契妹你應該冇機會體驗啫，咁我都有照直答。大家一齊起身離開coffee shop嗰陣，在公在私我都要take care契妹，而阿姐就殿後同個靚女傾計，我聽到佢問靚女叫咩名、而家有冇搵緊嘢做、有冇興趣入嚟公司做，最後仲拎埋電話。
結局唔使賣關子啦，阿姐隔咗一日主動聯絡靚女，真係請咗佢嚟做，反而係我擔心契妹會嬲，然後搞到女友個阿哥又嬲，但原來我嘅擔心係多餘，女友阿哥話契妹係咁踩我間公司孤寒，份雙糧要按比例出好小家喎……小姐，先唔講interview嘅表現，嗰陣係10月，返得工都11月，好多公司係要做滿半年先可以按比例出雙糧，有啲未做夠一年直情冇，呢度唔算差㗎喇。
後來同靚女做咗同事，我講笑話嗰次喺coffee shop明顯搶咗份工，不過靚女誓神劈願話唔係，阿契妹當日中午先叫佢陪interview，事前完全冇準備，否則唔會著牛仔褲波鞋喎！咁就真係似足選美，通常個冠軍都係話陪朋友參加，最後個friend落選而自己贏咗。
契妹下次唔好再搵人陪見工喇，自己又緊張，仲要讓埋位畀朋友，雖然佢睇唔起我哋公司啫，不過咁樣interview都唔夠專業，coffee shop有咩好驚吖，呢個顧慮又真係有啲多餘。
《過來人》新增咗畀Like同畀嬲嬲嘅功能👍🏻 有時間去睇下再一齊互動啦！
https://hkofficedaily.com/job-review-list/