一直以嚟，好多人都叫求職者去見工唔好bad-mouth舊公司，原則上係啱嘅，只係我遇到一個好極端嘅情況，以致有口德都變成人哋唔請我嘅原因啫。
長話短說，去見工，同一個industry，第一Round同HR傾偈非常順利，對方仲話而家疫情無謂見咁多次，即刻安排我見埋Line Manager，咁當然求之不得啦，慳返好多時間。
見Line Manager頭段都好輕鬆，始終喺呢行浸咗一段日子，我嘅對答肯定有紋有路，不過去到尾聲嘅時候，情況就出現急劇嘅變化。
Line Manager：「你知唔知我算係你半個師兄？」
我：「師兄？」
Line Manager：「係呀，我都做過你上一間公司，所以見到你份CV即刻叫HR約見。」
我：「竟然？香港真係細，不過都正常，我哋呢行話大唔大，話細唔細，未做過都一定聽過。」
Line Manager：「都係，你點睇上一間公司呀？應該係裸辭喎，見你10月份quit，唔鍾意啲人呀？」
當佢咁樣問，我已經提高咗警覺，求職網、獵頭、HR，所有嘅前人同埋專業人士都會教你唔好bad-mouth舊公司，唔好bad-mouth舊僱主同埋舊同事，由細聽到大嘅理論，呢啲時候梗係要謹慎應對啦！
我：「哦，唔係，舊公司都畀咗好多機會我，係我自己想尋求新挑戰啫！」
Line Manager：「你喺舊公司係跟Jacky定Simon㗎？」
我：「我跟Simon，Jacky係隔籬team，你做過都知啦，其實兩邊都有交接。」
Line Manager：「咁你覺得Simon點吖？」
嘩，大佬！撇除bad-mouth舊上司係大忌之餘，你始終喺我舊公司做過，點知你同Simon有咩交情？我就係覺得佢衰格先至選擇裸辭，但唔通大大聲同你講Simon正仆街咩？所以唯有溫和地回答。
我：「Simon冇咩呀，係對工作好緊張啫，不過都正常嘅。」
Line Manager當時仲笑笑口懶係nice咁問：「Simon冇畀過hard time你咩？」
我：「又唔可以話係hard time嘅，始終佢要孭飛吖嘛，有啲嘢錯咗就好麻煩，Simon個位有佢嘅顧慮。」
算係答得好中庸啦！點知個Line Manager一秒變臉：「咁你同我嘅價值觀似乎唔一樣喎！」
其實我都知瀨嘢㗎喇，差在點瀨法㗎啫。
我：「下，價值觀唔一樣？」如果唔知點樣答，最好嘅做法就係重複對方嘅說話，並且由對方繼續講出主旨。
Line Manager：「我當時就係覺得Simon唔識得尊重下屬先至走，好在走得早，否則而家應該仲要睇佢面色，我轉咗新公司就真係海闊天空喇！」
叻喇叻喇！士別三日，刮目相看好未？你都識話自己走得早啦！我都唔識你，更加唔知你同Simon之間嘅恩恩怨怨，我無辜㗎！
其實個Line Manager已經換咗另一副嘴臉，我知道點都救唔返，再講落去都係氣氛尷尬，佢亦都無情地用一句作完結：「我哋仲有幾個求職者要見，有消息再通知你吖！」
最後當然係冇消息石沉大海啦！
雖然呢次有口德反而累咗自己，但我堅信唔bad-mouth舊公司嘅做法原則上並冇錯，要怪只怪我唔好彩，同埋諗深一層，Simon係衰，不過呢位Line Manager亦似乎公私不分，加上個性咁記仇，我入咗嚟跟佢係好事定壞事，呢一點的確有所保留，呻下啫，而家可以做嘅事就係努力搵工，希望農曆新年前搵到啦！