一年前見咗份工，事後體驗好差，因為去interview嘅時候除咗一般自我介紹同埋交談之外，佢仲畀咗個test我做，題目類似模擬幫公司隻product宣傳，會suggest搵咩星或者KOL、budget點投放、idea方向等等。
佢畀咗一個鐘我做呢個test，其實要認真做真係僅僅夠，後來佢都有讚我個plan做得好，點知講到天花龍鳳咪又係冇回音，不過見工就係咁，可能有其他candidate比我更優勝呢，所以我心態上都係隨遇而安。
後來我喺巴士站見到張poster，嗰刻真係呆咗，因為句slogan正正係我之前去見工作出嚟，連個方向都一樣，隻product仲要係嗰間公司出品，然後個星亦都係當日我suggest嘅其中一個，有冇咁巧合呀？再睇埋social media嘅宣傳，連嗰堆KOL都幾乎全部一樣。
雖然當日呢間公司個Marketing Manager冇畀卡片我，不過我記得佢叫咩名，人你又唔請，我啲slogan同埋idea你又抄到足，堂堂一間大公司完全冇道德可言，所以我決定打去問清楚咩事。
打去之後我直接講自己係邊個，然後就單刀直入話佢抄橋，個Manager態度極差：「點證明我抄你呀？」
嗰下真係覺得自己好蝕章，去interview做test完全冇諗過要用手提電話影低啲答案，又唔通copy多份拎走咩，因為冇諗過有人會咁無恥㗎嘛！可能你又會話做test點解要做到咁足，唔怕畀人偷橋咩？
首先，去見工正常都係施展渾身解數，我想要份工，唔通interview仲勒住勒住咩，其次係，點估到佢抄足100%然後冇請我，佢請嗰個星做一次campaign，嚿錢起碼係我幾個月人工啦！
我：「一係你拎返當日interview個test出嚟對下囉，大家心知肚明啦，你使唔使抄得咁肉酸呀？你搵呢個星可能係巧合，你條橋都當你巧合，但係連句slogan都巧合？你好唔好意思呀？改少少都唔用下個腦，你搏我睇唔到成個campaign出街呀？」
「你講嚟講去都係嬲我哋冇請你啫！」
我：「見工預咗人哋未必請我，但冇諗過你唔請我但係又用我條橋咁無恥啫，你都係做Marketing，即係自己玩死自己呢行，預咗你連我寫嘅budget都抄晒㗎啦！」
最後同佢嘈咗一輪，條友從來冇道歉或者承認係抄橋，但佢最後又提出一個offer，就係當project咁畀一筆錢我，條數係2萬蚊，當我係一次性嘅freelance幫佢哋做咗個promotion plan出嚟，臨尾仲要加多句：「人呢，我哋就唔會請你㗎喇，一係你收咗呢嚿錢當係一隻freelance job。」
我：「咁我可能會選擇其他option，直接喺網上開你公司名講晒件事出嚟，我想問下你哋公司出招聘廣告，目的真係想請人吖，定叫人上嚟interview然後偷橋？」
件事嘅發展係對方之後打咗畀我幾次討價還價，最終以6萬蚊嘅價錢當請我做freelance job，佢最後講咗句仲好笑：「我哋當成個campaign外判咗出去畀Marketing Agency做，出面都係呢個價啫，包埋度橋。」
我：「你哋如果有心搵Marketing Agency幫手，一早搵咗啦，你就係想慳呢筆錢，同埋如果計成個campaign咁樣行，肯定你搵Agency唔止6萬囉！希望你同你公司唔好再用呢種方法去偷candidate嘅marketing plan，見工都要時間同金錢成本㗎！」
好多公司都唔搵Agency然後自己負責成個campaign，但人哋冇你咁衰，見工就嚟偷橋，用完又過橋抽板，即使抄個idea都唔會抄到連slogan都一樣啦！花少少心思扭一扭個字眼都懶？同埋佢提出賠錢息事寧人，都等於默認咗。
最後我接受呢個offer，你可以話冇骨氣，但其實我知道再堅持落去未必有著數，因為自己冇copy同證據喺手，佢要丟咗當日份test亦都冇符，我又唔係啲咩大人物，post出嚟有幾多人睇到呢？唔通又學人搵東張西望咩！
不過呢次見工唔請，同時又偷咗我條橋同個plan嘅經驗，實在令我有啲迷失，interview唔係要show最好嘅一面咩？有保留可能輸畀其他candidate，冇保留又畀人咁樣利用，你叫我以後見工做test應該懷住咩心態吖？
我check過晒，除咗個星之外，我suggest嘅KOL佢都全部用晒（早知suggest埋你，因為佢嘅產品類型，我提議嗰幾個係全部係女KOL同埋女性化嘅page），睇嚟呢間公司真係想以interview為名，請免費Marketing為實。