前幾日先發生嘅事，好記得我係7:30離開office，因為約咗老婆7:30食飯，我7:30先走，所以畀老婆詐型，落到公司樓下就收到老細電話，梗係唔聽啦，首先已經過咗office hour，其次係有咩事要我再返上樓咪麻煩！
再者，如果真係有咩急事，其實office當時仲有其他同事，你可以打公司啲直線吖，手上又唔係有咩緊急project，總之就不聽為妙啦，然後隔咗陣佢又打嚟，我都係冇聽，出到去餐廳會合老婆，老細又打第3個電話嚟。
食緊飯嘅時候已經係8點幾，老細打咗第4次電話畀我，而我都係選擇唔聽，大佬呀！放咗工啦，我都好難得同老婆出街食飯㗎，畀返啲私人時間我得唔得？遲到已經搞到老婆黑晒面㗎喇，再唔係咪WhatsApp講囉，一定要打嚟騷擾人㗎咩！
老細打咗第4次之後就冇再打嚟喇，原來好戲在後頭，條友第二日捉咗我入房訓話，劈頭就問：「阿浩你係咪好唔滿意份工？」
我：「唔係呀，做咩咁問？」知你做咩咁問，我都冇講大話，我對份工冇嘢唔滿意，係對你唔滿意啫！
老細：「冇唔滿意？咁噚晚我打電話畀你唔聽嘅？」
我：「哦，放咗工我慣咗較震機，我同阿爸阿媽一齊住，老人家好早瞓又好醒瞓，驚返到屋企有電話響嘈親佢哋吖嘛，一直都冇為意有人打嚟，今朝先知道有missed call，不過見轉頭都返工，諗住返到嚟先問你咩事囉！」設計晒啦啲對白，係估唔到你會一早拉我入房質問啫！
老細：「你咁樣唔掂喎，如果我有急事搵你咁點呀？」
老婆有急事搵我就話要緊張啫，老細你有急事的話，成個office咁多同事，有咩係得我先解決到呀？
我：「如果你有急事，我諗一定搵到其他同事幫忙嘅，咁其實係咩事？」入正題啦好冇呀？講下搵我咩事仲好啦！
老細：「唔係搵唔搵到其他人幫手嘅問題呀，係我搵得你就係有事，你點可以唔聽呢？」
雖然早有準備，不過我仍然有少少火滾：「咁嗰陣真係過咗office hour吖嘛，我放咗工好少留意電話……」
都未講完，老細又步步進逼：「我同你講，以前我未入行之前係做警察，CID，你應該聽同事講過啦！」
我：「呢個我知道。」點止聽同事講過，你自己都講過無數咁多次啦，警察吖嘛，CID吖嘛，得啦，威喇！
我老細以前係做警察，好似做到40幾歲，然後屋企人話危險，跟住就冇做再出嚟搞生意，而家佢大約60歲左右啦，所以最少都係十幾廿年前嘅往事喇，但佢應該覺得係至高無上嘅榮耀，你咁鍾意做咪摺咗間公司再考警察囉，成日想當年做咩呢？
老細：「我以前做CID嘅時候，24小時on call，個電話就擺喺床頭，一有call就即刻起身，你知唔知miss咗電話有咩後果呀？第日肯定畀老頂鬧到狗血淋頭，邊有好似你咁，連續打畀你幾次都可以唔聽，我唔係凌晨打畀你喎，咁你自己話吖！」
我：「工種唔同喎……」嘩大佬，我做office咋喎，你同CID比呀？再講吖，你以前份工要24小時standby唔係好正常咩，咁我嚟見工嗰陣你又冇同我講要24小時候命？你呢個比較完全唔啱比例吖嘛！
咁其實老細有咩事搵我，仲要搵咗4次咁多呢？畀佢訓話完之後，佢都係冇講咩事，我都係得唔到答案，到呢一刻仍然一頭霧水，不過我自己分析過，急事一定搵到其他同事幫，如果純粹想睇下我係咪24小時on call聽電話，會唔會有啲無聊呀？
呢個老細仲有樣嘢好得意，其實佢係用WhatsApp嘅，只係唔知點解嗰晚咁堅持要打電話嚟，不過平時佢喺WhatsApp group講嘢呢，一定要有同事包底去畀反應，如果老細留msg之後冇人再出聲，佢係會發忟憎，即係佢唔可以接受自己做話題終結者，你唔打msg都要打啲emoji，完全唔明呢種係咩心態。
我條team其他同事嗰晚冇人收到老細電話，但係有兩個同事都遇過類似事情發生，一個係夜晚11點幾收到老細call，一個就好似我咁，7點幾8點老細打嚟，內容不約而同係講啲無關痛癢又唔係趕住要處理嘅公事，究竟想點呢？
唔知呢單嘢有冇手尾跟，炒我就應該唔會嘅，不過都預咗如果之後有咩加薪或者bonus，我得到嘅待遇肯定唔會理想㗎喇，又調返轉講，要我office hour以外隨時隨地聽佢電話，咁真係寧願你加少啲人工，我唔想做人咁大壓力呀！