公司得一間房用嚟做interview，早兩日有個人上嚟見工，足足in咗兩個鐘超晒時，因為有下一個candidate喺出面等緊，我個HR阿姐就入房催個department head快手搞掂，叩完門入到去，只見個department head同個candidate唔知講緊乜，兩條友笑到伏喺枱標晒眼淚。
因為我有陪阿姐叩門入房，見到咁嘅情況都呆咗一呆，最正係個department head仲要笑住同個candidate講：「痴線，笑到我吖，喂，咁下次再傾。」然後又轉過嚟同我阿姐講：「呢個ok，星期一返工，你幫我跟埋佢吖！」
後來我個HR阿姐就問返個department head：「我見佢第一round嘅時候，佢上一份工係未update㗎喎，reference letter都未有，你係咪問咗佢㗎喇？」
Department head：「未update㗎咩？我唔知喎！冇問佢呀！」
HR阿姐：「有冇搞錯呀，上次佢同我講，因為send完CV嚟之後，公司轉咗佢title，工作內容有少少唔同，我叫佢second in同你講返，同埋之後要補返reference letter，你完全冇問佢呀？」
Department head：「冇呀，得啦，ok呀呢個。」
HR阿姐：「乜都冇問，咁你哋搞咩傾咗成兩個鐘有多呀？仲笑到咁？本身識㗎？」
Department head：「唔識㗎，份CV你畀我嘅，識得就一早直接叫佢入嚟做啦！」
HR阿姐：「咁點解你哋好似咁熟咁嘅？」
Department head：「哦，因為佢都夾band，打鼓，睇唔出呀呵，我以前都有夾band吖嘛，最近佢隊band搵緊主音，有條友去應徵，明明話鍾意rock，原來係鍾意pop，上到band房問想試夾咩歌，條友話試劉德華隻《一起走過的日子》，佢同個結他手即刻黑晒面，痴線！人哋玩開heavy metal，你叫人彈劉德華……」個department head一路講仲要自己一路喪笑。
我個HR阿姐對夾band完全冇興趣，加上都唔知佢講咩heavy metal，當然冇笑埋一份啦。
HR阿姐：「劉德華有咩問題呀？但係你全程就係同佢傾夾band，冇傾公事㗎？」
Department head：「冇呀，得㗎喇，佢以前做嗰啲嘢咪又係我哋呢啲嘢，手板眼見功夫啫，呢啲好呀，最緊要啱傾，唔識可以慢慢教到識㗎啫，啱嘴型先至最緊要，做同事喎，我見佢分分鐘仲多過見我老婆，話不投機好難喺office對住咁多個鐘㗎！」
由於請人嘅決定權始終喺department head手上，結果阿姐都係死死地氣出offer畀頭先嗰位candidate，不過就一路出一路口up up：「呢間公司啲人Interview有冇咁求其呀！一個又係咁，兩個又係咁，啱傾就請喎，咁唔使要我哋啲HR啦！」
阿姐所講嘅「一個又係咁，兩個又係咁」，係指公司裡面另一位manager，嗰個就係女人嚟嘅，有次約candidate上嚟interview，個女manager又係同個candidate傾咗個幾鐘，喺房裡面啲笑聲大到成個office都聽到，完全唔似做緊interview。
嗰次個女manager又同人傾咩呢？原來係湊仔經，因為個candidate同佢一樣有兩個小朋友，一個小學，一個幼稚園，背景好相似，兩個人喺房由仔女啲百厭嘢傾到學校嘅老師，由老師又傾返去產後抑鬱，又由產後抑鬱傾到靠老公睇住小朋友會更加大鑊，再互相交換小朋友啲生活照嚟睇……
雖然嗰個candidate係幾個求職者當中經驗最一般，但係女manager最終都請咗佢，我阿姐咪好唔滿意囉，點知今次個department head又因為志趣相投決定出offer，阿姐應該就快癲！
我自己會咁睇，HR負責scan CV，決定請邊個人絕對應該由line manager話事，難聽啲講句，請完個人返嚟唔啱，你都冇得怨我，畀咗幾個你揀㗎喇，但係上次女manager揀嗰個candidate又真係做咗成年都好穩定。
好似上面所講，個candidate係咁多個之中經驗最一般，睇得出個女manager真係要逐樣逐樣慢慢教，但不得不承認佢條team啲人感情好好，氣氛好好，所以好少會有人走，啲員工通常做得比較耐，或者真係好似夾band嗰位department head所講，唔識可以慢慢教到識，啱嘴型先係最重要。
從另一個角度出發，做嘢叻同埋經驗好嘅人大把啦，不過員工識得做唔代表佢願意幫你做，好叻好醒亦唔代表佢甘心喺度做，所以性格上嘅配合都好重要，當然基本嘢要有啦，唔係甩皮甩骨就得，一邊肯教，一邊肯學，其實快上手㗎啫，又唔係請醫生律師呢啲專業人士。
我阿姐都唔需要咁勞氣，或者佢係以專業HR角度去睇件事，揀人一定要揀個best of the best，但係請咗個人返嚟最緊要做得長，如果個個都做一陣又走，咪即係搞著我哋HR，所以我覺得今次department head揀嗰個band友都應該會做得耐嘅。