難道喜歡處女座 (下) 男朋友係最適合我嘅人

望住眼前呢個高大靚仔,有少少意亂情迷都係正常反應啫,我已經叫自己唔好咁失禮,費事佢返去同阿姐講,到時就真係乜嘢形象都冇晒。

拉櫈,打招呼,親切嘅笑容,再遞份餐牌過嚟問我食乜,呢條仔係幾吸引嘅,不過我有男朋友㗎,唔可以因為討好阿姐而忘記咗呢一點,問題係幾時先同個男仔講會比較好呢?大家唔熟,冇理由要求佢幫我一齊講大話吖,嗰個仲要係佢姨媽,但我又唔想欺騙人哋感情。

「差啲唔記得介紹自己,我叫Glen,姨媽成日提起你,話公司有個女仔性格幾好,又靚,係都要介紹畀我識,希望你唔好介意。」

我:「佢太過獎喇,阿姐…即係你姨媽都經常讚你收入唔錯同埋好老實。」

Glen:「哈哈,咁樣形容我?收入ok啦,不過我一定唔係老實㗎喇,因為呢……其實我有女朋友。」

九両菜呀!欺騙我感情!浪費我時間!不過都好,即係我可以坦白啦。

我:「你又高大又靚仔,好似做銀行係咪?我都覺得你嘅外型唔會冇女朋友,咁點解……」

Glen:「因為我女朋友大我5年,佢仲有個仔,同前夫生既,我知屋企人一定唔鍾意,所以咪一直話自己single囉,姨媽成日以為我要開OT先識唔到女朋友,其實係鬼OT咩,我去拍拖之嘛,不過呢,你可唔可以保守秘密,唔好同我姨媽講。」

我:「咁不如互相保守秘密吖,其實我都有男朋友,因為見工嗰陣同你姨媽講過冇拍拖。」

Glen:「嘩,你為咗搵工都幾狠喎,哈哈,Ok,咁大家都唔好爆出去。」

一天都光晒,我唔使做出軌的女人,眼前呢個靚仔雖然賞心悅目,不過餐飯都幾悶,因為Glen係咁講啲我冇興趣嘅話題。

Glen:「聯儲局議息你點睇呀?」

我:「下,我冇研究喎!」

Glen:「冇玩下股票嗰啲?」

我:「真係冇喎,我都唔識。」

Glen:「唔緊要,姨媽話你好文靜,平時鍾意睇書?我最近又翻睇多次William Faulkner嘅The Sound and the Fury,真係好正呀!」

我:「Sorry,我冇睇過。」

Glen:「哦,姨媽話你係處女座,其實我對星座都有啲研究,我女朋友都係處女座。」

我:「其實我唔信星座。」

Glen:「女仔都唔信星座?都幾準㗎!我覺得自己同處女座嘅人比較投契,你知唔知處女座有咩特質先?咁我話畀你聽,睇吓準唔準。」

雖然佢好努力咁樣同我講星座,搵話題,不過我對呢啲真係冇興趣。

Glen:「咁你有咩嗜好?」

我:「我鍾意打牌、食嘢、篤波,其實男朋友都話我麻甩,文靜係因為返工啫,唔通對住同事粗粗魯魯咩,你姨媽仲係我阿姐,對佢更加要斯文啲啦,啱啱先過試用期咋,係呢,你鍾唔鍾意狗仔?我屋企養咗兩隻狗。」

Glen:「最怕。」

我:「貓呢?」

Glen:「抓人㗎喎!」

我:「咁打牌呢?」

Glen:「咁嘈。」

完全唔過電呀,大家唔同星球㗎喎!不過咁,Glen份人本身係唔錯既,好gentleman,好溫柔,好客氣,坦白講一身西裝舉止係幾優雅,雖然唔知道佢所謂「收入唔錯」即係搵幾多,但你都睇得出佢用錢好豪,我哋呢餐飯又叫蠔又叫鵝肝又叫酒,埋單都三千幾銀,我一蚊都唔使出梗係爽啦!

其實同Glen食飯當晚,我係約咗男朋友宵夜食糖水,因為我同男友住得好近,有一刻覺得個落差好大,喺甜品店我嗌咗個芒果西米露想加椰果啫,男友已經出手制止:「咁唔抵,有咩理由加$10蚊呀!」

我:「食開心之嘛!」

男友:「加$10唔開心喎!」

望住男朋友波衫短褲人字拖仲同我斤斤較較加椰果個樣,我突然諗起Glen,唉!

其實我同Glen交換咗電話,佢問過可唔可以借我過橋,因為閒日同女朋友出街仲可以賴OT,星期六日就真係作唔到咁多大話,同時答應每個月會請我食大餐當報答。

Glen有遵守承諾,佢平均一個月約我食一次飯,真係次次都食貴嘢,最搞笑係阿姐喺公司對我呵護備至,麻煩嘢好少叫我跟,另外又加咗我一次人工同埋升咗title,唔好忘記我入嚟做咗冇幾耐,呢一堆嘢全部喺七至八個月之內發生。

後來我發覺Glen約得好密,由一個月一餐,變到一個禮拜一餐,有時我都唔得閒所以冇去,始終唔係咁好啦,次次都食咁貴,又呃住阿姐,有少少於心有愧。

嗰一晚,Glen又帶咗我去食生蠔,唔知係食得太多定係唔新鮮,我忽然急屎,仲覺得篤屎好似士碌架支Q咁,喺pat pat車前倒後,愈伸愈出就嚟要瀨,正當我想話去洗手間之際,Glen好認真咁同我講:「我早排同女友分咗手。」

可能係太震撼,篤屎縮返入去:「下?」

Glen:「佢話大家唔適合喎,加上又知道我屋企人一定反對,為呢啲嘢嘈過好多次,最後都係分手。」

我:「你係咪好唔開心呀?唔怪得多咗約我食飯啦,換個方向諗,之後唔使講大話仲輕鬆,其實我最近都有啲難做,你姨媽問多咗我同你發展成點,咁我而家坦白同佢講大家做朋友好啲咪得囉,講個秘密你知,阿姐之前加我人工,我覺得係同呢件事有關,唔想搞到自己好似好奸咁,因為原意唔係想喺工作上攞著數。」

Glen:「咁你可以唔講大話㗎。」

我:「好呀,咁我就冇咁內疚喇。」

Glen:「我指你可以同我真拍拖,咁咪唔算講大話囉!」

你叫阿Glen啫,都唔使搞到我咁驚吖,我:「但我有男朋友㗎喎!」

Glen:「咁你鍾唔鍾意我先,對我一啲好感都冇?」

我:「我……」

Glen見我面有難色,繼續追問:「係咪嚇親你?其實我覺得你好爽朗,我可以等你㗎!你覺得我份人點呀?」

我:「對唔住!」

Glen個樣好失望:「明白既。」

我:「我急屎呀,急咗好耐,屙完返嚟再講。」

Glen個樣由失望變詫異,今次終於到佢驚喇!

屙完屎出嚟,呀唔係,應該係去完洗手間出嚟,Glen冇再追問我肯唔肯同佢嘗試發展,埋單後各自離開喇,做咩啫?靚女唔使屙屎咩?靚女淨係可以講聯儲局議息同埋睇小說㗎?

嗰晚我又係一早約咗男朋友宵夜食糖水,因為肚痛其實好唔想去,不過又想見下男友,出到嚟我都係冇食,仲同佢講:「頭先唔知係咪食咗唔新鮮嘅生蠔,屙到山泥傾瀉咁,都係唔食糖水喇,想返屋企屙屎,好似未屙清。」

男友:「上我度屙囉,樓上之嘛,你呢度返屋企仲要行10分鐘,驚你一路行一路瀨。」

結果,嗰晚我上咗男友屋企屙屎,而嗰晚之後,Glen雖然間唔中WhatsApp我,不過就冇約出嚟食飯喇。

我男朋友雖然搵錢唔多,又唔係靚仔,不過佢係我嘅Soul Mate,佢知道我所有優點同缺點,見盡我靚嘅同埋醜嘅每一面,我喺佢面前可以好赤裸(唔係除衫搞嘢嗰種赤裸呀),可以毫無保留表達自己嘅喜怒哀樂。

出嚟社會做嘢,老細、上司、同事,仲有client,唔多唔少都會對你有「人設」,返到office點都會有演戲成份,但我最想放工之後有一個人等自己,我可以喺呢個人面前放屁、剪指甲剪腳甲、棟高隻腳講嘢,甚至係大大聲話自己想屙屎。

我覺得另一半要同時係自己嘅好朋友,佢明我想要乜,我都知佢諗緊乜,近乎對望一眼已經知大家想點嘅默契,呢啲都係需要時間磨合同埋培養,雖然我男友唔係世界上最好,但肯定係世界上最適合我嘅人。

後來我向阿姐講咗,同佢姨甥仔做朋友舒服啲,好在阿姐明白事理,完全冇介意,仲一樣對我咁好,再過咗一排,我直情話自己已經有男朋友,以後唔使煩,輕鬆晒!

(完)

error: