雖然而家間公司冇birthday leave，不過我自己有個習慣，就係除非撞正星期六日，否則生日一定攞假。
有呢個舉動係源自舊公司嘅經歷，首先要強調唔係陰影，對我而言反而係小學雞層次嘅笑料，亦係投身職場嘅一個體驗。
幾年前喺一間trading公司做嘢，可能性格比較心直口快，講嘢唔識得修飾，加上唔係太參與放工後嘅Gathering，所以當時嘅上司唔係太鍾意我。做咗接近兩年，有headhunt搵我跳槽，待遇好咗所以選擇離開，呢啲都係人之常情。
真係唔明點解個上司一向唔鍾意我，但係遞信之後又要處處為難，究竟呢種係咩心態呢？不過唔止我一個，曾經有另一個同事遞信之後都畀佢當做仇人看待，前車可鑑之下，其實我已經有心理準備。
舊公司有個慣例，就係會結集嗰個月份生日嘅同事，一次過開生日會，當然所謂嘅生日會都不過係tea time時間，叫齊壽星同事去pantry切蛋糕，唱下生日歌。
認真，我係麻麻地呢種場面，人人性格唔同，有人鍾意熱鬧，有人鍾意低調，畢竟同事未必係你最close嘅朋友，有啲甚至因為公事而有芥蒂，某啲人平時唔害你都偷笑，仲要睇住佢唱生日歌，我真係吃不消，如果同事私底下都好熟好friend，自然會另外約食飯啦，總動員全公司喺度拍手做佈景板我就覺得有啲老尷喇。
當時辭職嗰個月正正係我生日嘅月份，開生日會當日朝早大家都會收到email，提醒下午幾點鐘會喺pantry幫邊幾個每月壽星慶生，記得封email係冇我個名，我亦都冇所謂，咁大個人難道呱呱嘈走去叫人加返我個名咩，冇需要吖。
到咗生日會嘅時間，例牌唱歌拍手切蛋糕，我都係企喺後排做觀眾，party一如以往用咗20分鐘就完，有啲同事留喺pantry吹水，有啲同事就返埋位工作，過咗一陣，上司走埋嚟我度提高聲線咁話：「哎呀，你好似都係呢個月生日喎！唔記得加你個名畀Admin添，你唔好怪佢哋呀，Admin都係問department head，不過唔緊要啦！反正你仲有幾日last day，到時喺新公司慶祝囉！」
想像唔到呢個世界有啲咁幼稚嘅人，其實我好平靜，更加冇嬲，真心嘅，本身個格就係鍾意低調，我多謝你唔記得交名都嚟唔切啦，所以我都係淡淡然回應一句：「無所謂啦，咁小事，唔通貪件cake咩！」
你唔係諗住用生日會呢樣嘢畀hard time我啩？我幾多歲呀？你又幾多歲呀？仲玩呢啲低B嘢？
最好笑係last day當日，我要去人事部交低啲員工證同埋櫃桶鎖匙之類，個Admin靜雞雞同我講唔好意思，原來佢知道我係呢個月份生日，不過我上司早一日走去叫佢喺封email剔除返，理由係個同事已經辭職，隨時玩嘢唔返工喎，哈，搞笑！
所以轉新公司之後我養成咗一個習慣，就係生日正日一定攞假，同事記唔記得並唔重要，因為我想低調，有屋企人同埋朋友幫我慶祝就夠啦！
投稿讀者：Toby