「有冇拍拖呀？」記得第一次嚟呢間公司interview，阿姐問過我呢條問題，雖然有少少被拋窒，不過我知唔少人見工都曾經畀人咁問過，所以當時處變不驚：「冇呀，我冇拍拖。」
聽人講，咁樣問得你，份工九成九要OT，嗰陣我真係好需要呢份工，加上呢間始終係大公司，淨係睇個裝潢我已經流晒水，I mean口水。
Interview順利過關，入咗嚟做之後先發覺原來冇人OT，咁你問我有冇拍拖做咩呢？唔通……曾經聽過有啲變態阿姐因為單身太耐，非常仇視嗰啲有拖拍同埋結咗婚嘅女性，但係做落咗之後，得悉阿姐已經結咗婚，平時相處都唔錯，好照顧下屬，冇變態跡象喎！
輕輕鬆鬆做夠三個月，某個下午阿姐叫我入房，畀封過試用期嘅正式letter我，又加咗$700人工，再附帶問咗我一個問題：「Yuki你都幾靚女吖，做嘢又妥當，咁乖點解冇男朋友呀？」
無啦啦再咁問，今次我真係有啲不知所措：「吓？阿姐你咁講我會面紅喎！」
「咁係吖嘛，我見到隔籬Team個Anthony成日借頭借路撩你傾偈，仲有IT個Peter，上次幫你整機好似生滋貓入眼咁，你對佢兩個冇好感咩？」
我：「冇喎，佢哋應該對個個都係咁，我冇乜感覺呀。」
「咁就啱喇，我介紹個男仔畀你識吖，好仔嚟㗎！」
我忍唔住笑咗：「唔係啩，搞啲咁嘅嘢？」
「認真㗎！記唔記得我interview嗰陣已經問你有冇男朋友，因為我鍾意你呢類型嘅女仔，眼大大，鼻高高，又夠白，我知我姨甥仔都鍾意呢type㗎！」
我：「你姨甥仔？」
「係呀，佢喺銀行做，收入唔錯㗎，不過就忙啲囉，都冇時間識女仔，一個星期有兩三晚OT，男仔事業心重都好嘅，最緊要份人夠老實吖嘛！由細睇到佢大，我最清楚。」
經驗話畀我知，如果sell一個男仔要用到「收入唔錯」同埋「夠老實」呢兩個賣點，外型方面甩皮甩骨嘅機會高達70%，另外有20%嘅機會率係地中海，加10%概率係肥豬王。
可能見我猶豫得嚟又冇畀反應，阿姐再補充：「Yuki你處女座㗎嘛，我姨甥仔係金牛座㗎，呢兩個星座好夾㗎！」
我：「不過我唔信星座㗎喎！」
「女仔都唔信星座？咁你真係要睇下喇，好準㗎！雖然好多人話處女座挑剔、好mean、硬頸，不過呢啲係負面字眼嚟啫，反過嚟睇即係做事有要求、夠堅持，而且完美主義，同金牛男係好匹配㗎！」
我：「哈哈，係咪真㗎？其實全世界咁多人，點會用12種性格就可以劃分呀？」
「星座嘅嘢好高深，梗係唔止12種性格啦，遲啲我慢慢教你，嗱，當係畀個面阿姐，同我姨甥仔食餐飯好冇？」
其實換轉係其他人講呢句，我一定睬佢都有味，但係阿姐平時對我真係唔錯，如果用到「畀面」呢個字眼咁嚴重，再加埋佢紆尊降貴嘅態度同語氣，唔去又真係有啲不近人情。算啦，食餐飯又唔會少咗忽肉，見完話大家唔適合仲好，總好過阿姐久唔久就向我推銷姨甥仔吖。
我：「咁好啦！」
「Good！我好識做嘅，我幫手約時間地點，唔會畀你哋嘅電話對方，可能大家見完唔適合呢，咁之後唔使尷尬吖嘛，到時真係啱傾先交換contact，咁好冇？」
我：「好吖！」連加電話睇WhatsApp張相都冇機會，甩皮甩骨嘅賠率已經熱到得1賠1.05喇！
話咁快就到食飯當日，由於係dinner，weekday又要返工，即係會見到阿姐，所以做戲做全套著得靚啲，費事話我唔尊重個場合同埋佢姨甥仔啦！
「Yuki你今日好靚呀，我係男仔都一定追你。」
我：「你咁講我怕醜㗎，多謝！」我都覺得自己好假。
相睇時間到喇，步入餐廳之際，有個男仔向我揮手，咦！好多頭髮㗎喎！佢企起身幫我拉櫈嘅時候仲見到幾高下，近距離睇真啲，條仔ok喎！我又濕晒喇，I mean掌心，因為我緊張就會出手汗㗎喇！
咪住先，我好似唔記得咗一樣嘢，當時interview同阿姐講自己單身，係覺得single似乎有利搵工，而之後再同阿姐confirm多次冇拖拍，係因為要圓謊，其實，我有男朋友㗎……
（未完待續）