我覺得作為老闆唔應該介入員工嘅私生活，包括放假時候嘅活動，除非係員工主動邀請，否則都係留返啲空間會比較好。
我哋幾個同事之間有個行山group，大家志同道合，平均每一至兩個星期都會行一次山，有啲同事仲會帶埋另一半，本來就好開心嘅，不過有次我哋行山撞到老闆，所有嘢就變晒。
咁都撞到？香港雖然有好多行山路徑選擇，但有幾個出名嘅都係大眾之選，而且諗真啲，我哋行咗三年左右先撞到老闆一次，其實都唔算好巧合。
嗰次撞到老闆兩公婆同佢啲朋友之後，老闆就打趣話不如以後一齊行，作為佢嘅員工你當時唔通話唔好咩，敷衍又好，禮貌回覆又好，點都要答冇問題㗎啦！
星期日撞到老闆，隔咗兩日即係星期二，老闆就送咗四隻智能運動型手錶畀我哋，當時已經知：「仆街喇，唔使咁認真呀？」
有同事check過隻運動手錶要二千幾蚊，唔係貪佢份禮物，但係你咁樣送得，即係行山唔預你唔得啦！其中一位同事性格係有少少擦鞋，睇得出佢好興奮可以同老闆一齊行山，仲周圍同公司啲人講，好似成就解鎖咁。
本來個行山group就係輕輕鬆鬆，講下公司是非，講下高層同老闆壞話，後來已經完全變質，感覺上好似公事應酬一樣，冇晒放假relax嘅感覺，乜都要就住就住，如果唔係冇預期之下收咗隻錶，真係好想即刻quit咗個行山group，再強調一次，唔係貪佢隻錶，只係即刻還再踢老闆出局有少少唔知點。
試過想靜下，特登缺席一次半次啦，然後老闆星期一返工就會問長問短，行山係放鬆同興趣嚟咋，使唔使打埋卡呀？就算係出面啲朋友約出街都唔會次次齊人啦！
後來行山group其中一個同事辭職（佢真係搵到工，唔關行山事），所以亦順理成章冇再join我哋，點估到個同事走咗一個月，老闆搵我講：「喂，你叫Jason還返隻錶吖。」
「還錶？」
「係呀，佢都唔做喇，又唔再一齊行，還返隻錶返嚟啦，睇下公司有邊個想join，將隻錶送畀其他一齊行山嘅同事。」送咗你就咪鬼要返啦，有冇咁小家呀？
結果我搵Jason拎返隻錶，真係好難開口呀，當初又冇人話要，而且都送咗接近一年，唔係唔捨得畀返你呀，係麻撚煩吖嘛，你估職員證咩，辭咗職要交還隻錶畀人事部呀？
不過呢件事忽然啟發到我，老闆咪話要搵個人代Jason行山兼要咗隻錶嘅，我直情搵夠兩個呀！Sales Team最多人想埋老闆身，啱晒，就畀個機會班Sales，點解代Jason唔係搵一個，要搵兩個咁多？因為我都要搵替死鬼㗎嘛……sorry，應該係接班人先啱。
我同老闆講，最近報咗名學韓文，星期六日要上堂，而家行唔到山喇，不過唔緊要，已經搵咗兩個同事，一個代Jason，一個代我，連隻錶都畀埋對方，老闆聽到都好開心，一來我有交帶，二來行山人數不變，搞掂！
過咗兩個月之後，嗰兩個Sales走嚟搵我，話唔想再行，可唔可以還返隻錶畀我喎……
傻豬嚟嘅，我而家唔係行山group嘅一份子喇，想quit就自己搵替身，最重要係以下呢句
～～～呢單嘢唔係我跟開！