「你知唔知頭先個女仔同我講咩？佢話今日嚟呢度見工係問朋友借車錢，我話有冇咁慘呀？車錢最多咪十零廿蚊，當你過海來回都係三十幾蚊啫，真係咁窮？」我係HR，安排咗個candidate上嚟見工，而負責interview嘅Manager見完之後就同我講咗呢番說話。
我真係唔知嗰個女仔咁窮，因為頭先係我見完第一轉先，個candidate冇向我提及借錢搭車呢件事，然後安排佢即刻見埋Manager，其實之後仲有一個求職者會上嚟，之前亦都見咗5個人，本身未決定請邊個，但Manager見完呢位自稱好窮嘅女仔之後，隨即同我講：「就請佢啦，咁慘，幫下佢囉！」
我：「等等先，晏啲仲有個男仔上嚟interview，唔爭在一時啦，in埋先決定囉！」
Manager最終都見埋，但佢個心一早已經做咗決定，就係會請嗰位「窮女」，唔好意思，唔係要標籤佢窮，只係想形容之餘，又費事開個candidate嘅名，所以我先用呢個稱呼。
原來Manager同佢interview期間，呢個女仔曾經講到聲淚俱下，調返轉要Manager安慰。
我直接問個Manager：「你係咪見人靚靚女女咋！」
Manager：「唔關事，我有老婆㗎喇，就算係男仔咁樣同我講都會心軟啦！咁慘！」
究竟有幾慘呢？聽返Manager講，呢個女仔話自己已經失業5個月（係既，佢resume上一份工已經係2025年11月） ，期間send咗超過100份CV出去，8成以上冇回音，1成就係打電話嚟傾咗幾句但冇約interview，另外1成係in完之後一直冇收到通知。
呢個女仔仲同Manager訴苦，話父母對佢失業並唔體諒，除咗不斷斥責佢冇盡力搵工，更加要佢喺冇工作嘅情況下繼續畀家用，加上有份保險唔可以斷供，所以呢幾個月已經耗盡積蓄，冇晒娛樂，身邊啲人叫佢出街都唔敢去，同時又覺得留喺屋企對住父母好大壓力，講講下就喊埋出嚟。
Manager：「佢頭先同我講銀行戶口得返70幾蚊，想撳都撳唔到出嚟，就快要退張八達通拎返50蚊按金，佢住大窩口，過嚟銅鑼灣見工要過海，噚晚先至問朋友借幾十蚊搭車interview，講講下就喊喇，唉，睇到我好心悒，其實做人父母係咪應該要體諒仔女呢？失業冇糧出仲要佢畀家用，有冇搞錯呀？」
我：「咁又真係幾衰嘅，見工都要成本，你掏空個女嘅積蓄，佢咪仲難搵工，不過咁喎，如果你請咗佢，即係未來一個月都要過海返工，個女仔要籌期先掂喎！」
Manager：「問咗啦，佢話如果真係請，佢會問阿媽借住兩三千蚊食飯搭車，月尾出糧連埋家用一次過還喎！」
個女仔喺interview後段不斷懇求Manager請佢，大致係話再搵唔到工就走投無路，Manager仲笑稱咁樣係情緒勒索，然後個女仔就say sorry，話自己唔係想情勒，只係希望盡全力爭取呢份工作，仲強調正正因為生活同經濟問題，之後就算幾辛苦都唔會輕易轉工。
Manager覺得呢個position只係junior level，技術同經驗唔使太高要求，既然係咁就唔需要請最好，而事實上呢個職位見咗幾個candidate，呢個女仔論能力同應對照計唔係首選，但Manager認為佢會珍惜份工，會做得耐，所以就將感情分加埋上去，最終叫我打畀個女仔confirm offer.
如果冇其他candidate喺手，我認同請呢個女仔冇乜問題，亦都同意Manager所講，呢個position要求唔高，與其咁揀擇，不如畀個機會有心人，但因為有幾個candidate競爭，所以我對於用「賣慘」作為interview嘅主軸就有啲保留，咁樣對其他嚟見工嘅人有少少唔公平。
我認為每個人都有自己嘅難處，可能有人都好慘或者背負住其他壓力，只係冇講出嚟，或者難以啟齒，甚至覺得見工唔應該講呢啲。
不過作為HR，我嘅角色只係輔助，Manager揀邊個candidate都好，我都尊重佢嘅決定，同時希望個女仔返咗我哋份工之後可以輕鬆啲，解決到生活上嘅難題啦！
（完）