請假去見工真係好無謂，Dream job或者九成請你就話啫，有啲工仲要1st in完再2nd in，如果份糧有十萬九千七係ok嘅，皮幾兩皮就唔好搞咁多嘢啦，邊請到咁多日假呀？Sorry，以上係打工仔心聲同埋角度，如果你係做hr，我明白立場一定會唔同。
早排send CV出去，有份工叫我去見，咁啱個地址喺我公司隔籬街，我已經幻想緊轉咗工之後喺同一條開源道，肯定返工放工同食lunch都會撞到而家公司嘅同事，不過有工見咪見咗先囉，冇理由諗得咁長遠吖。
兩間公司近到呢……我都費事請假，嗰日大熱天時我都著住件外套，目的就係要攝個公文袋喺背脊，神不知鬼不覺咁直接行過隔籬街見工。
上到去人哋公司interview，屌！間嘢非常濕鳩！啲牆身好似畀水浸過咁，由reception個女人去到入面其他同事嘅咀臉都係西口西面，直覺話我知呢度啲人應該做得好唔開心，入到房in我嗰個女人仲西，冇禮貌之餘仲in得好求其，重點係話我知呢度多OT，要有心理準備，當然唔少得踩我呢樣嗰樣為壓價鋪路啦！我而家份量就26000，佢問我24000有冇問題？你都癡膠花！CV寫得好清楚啦，我當你比唔到expected salary，都冇可能要我接受一個比而家低2000嘅人工啩！
個女人最後問咗一句：「你有冇咩問題想問我？」
我：「有呀，我想問我走得未？」
本來個女人塊面已經好西，聽我咁講完就再西啲，原來西係可以冇盡頭，總之呢次interview就嘥晒我嘅時間。
因為呢一兩年冇得旅行，手頭上有好多大假未清，所以我曾經諗過請AL去見工，但無論大假有幾多都好啦，咁樣嘥一日去見「伏工」係好唔值得，好在佢喺隔籬街咋，好在我冇犧牲一日假咋！
嗱嗱臨返過去做嘢，一返埋位阿頭就問我：「唔見咗你咁耐嘅？Account話你張claim form有問題，搵咗你兩次喎！」我有晒兩手準備啦，一早喺屋企攞咗盒胃藥袋落褲袋，如果畀人發現我消失得太耐然後問長問短，就扮個胃唔舒服落街買藥，阿頭仲叫我小心身體，有需要可以請半日假，嗰一刻我真係有少少內疚，好似瞞住女朋友玩交友App，約到出嚟先知個炮友係圖文不符嘅豬西。
好啦，我暫時唔會再搵工住，呢排勤力啲啦！
投稿：出軌臭男人
延伸閱讀：
請假帶個女睇醫生，上司話： 「你冇老公㗎？你帶去睇會好得快啲？」
https://hkofficedaily.com/?p=12512