投稿讀者：Sheryl
早幾日同阿姐一齊見個candidate，對方之前做空姐，被裁員後輾轉做過兩份Sales，但覺得唔太適合，所以就希望搵份office工，主因係唔鍾意跑數。
我哋呢個空缺係Administrative Assistant，歡迎冇相關經驗嘅人，所以收到呢位前空姐嘅CV亦都好Welcome，其實佢面試嘅表現係OK，我覺得可以畀offer一試，不過阿姐最後問咗句：「你嚟緊嘅職涯規劃係點？係咪有心向Admin呢類工作發展？」
空姐candidate：「我想做返空姐，希望疫情快啲過。」
阿姐面色一沉，空姐candidate應該發現自己講錯嘢：「其實都係想啫，可能到時先算，因為做咗兩三年，習慣飛嚟飛去，唔慣坐定定。」
我覺得佢唔補充仲好過補充。
最後我哋冇請嗰位空姐，請咗另一位搵工搵咗3個月，表示即使冇經驗都會畀心機學嘅女仔，或者你會話：「見工梗係講呢啲㗎啦，人哋話畀心機學可能都係吹水呢！」冇錯，另一位女仔講嘅未必係真，但我哋總冇可能請個一埋嚟就話做住先嘅人吖，呢份唔係contract喎，長工嚟喎！
唔係教大家作故仔做戲，但咁答真係幫唔到你，將心比己，我出job ad請長工，你過嚟見，跟住我話上手同事考慮幾個月之後返嚟，到時就即刻炒你，易地而處，你會唔會做先？
如果想搵工，你心入面可以有好多個人嘅盤算，但唔需要揭開肚皮直接講出嚟，唔係教你呃人，而係想你留返條後路畀自己，試諗下，當個世界回復正常，之前「被離職」嘅空姐空少係咪一定入得返晒去先？真係一次過開返咁多個headcount？到時航空公司又會唔會壓你價呢？壓價都肯再入行？何況唔止舊人㗎嘛，到時又有一堆新人同你爭呢！
我都有唔少空姐朋友，呢一年睇fb好似睇緊《月光寶盒》咁，周不時見佢哋share返啲舊post，懷緬當年今日飛邊度。我冇做過空姐，但深信呢份工的確有佢魅力所在，能夠做一份自己鍾意嘅工作梗係開心啦，只係時勢同際遇往往逼你做取捨，人生有好多方向，有時未試過又唔會知邊條路最啱自己，或者你做做下Admin覺得可以長遠發展呢。
絕對唔係投稿寸嗰位空姐candidate，我反而係心痛，就算唔計疫情，呢十年八年都成日見航空公司裁員，你留戀份工，份工未必留戀你，人一定要畀多啲路同埋選擇自己，將主動權擺喺自己手上。
好多人話見工只不過係一場戲，即使唔夠演技，都要盡量令自己入戲。
===
空姐其實大把人爭住請㗎❤️ 除非有個唔鍾意靚女嘅老闆…娘 🤫
《怪你過份美麗，靚女見工一定唔請》
https://hkofficedaily.com/?p=13434