「50幾歲師奶，老公好早走咗，有個仔20歲，有冇好男人介紹畀佢？」有位同事晨早流流返嚟講啲咁嘅嘢，仲要私底下問我，換言之唔係我哋Speed Dating公司嘅member啦，但見佢態度好殷切，所以就問多兩句發生咩事。
我：「手上嘅年齡層冇咁大，50幾歲師奶係你個friend嚟㗎？公司呢邊就冇喇，一時間我都諗唔到身邊有咩適合人選，做乜無啦啦咁問先？你喺出面接咗freelance job？係咪富婆嚟㗎？係就同你諗諗。」
「你知我阿媽又係一早唔喺度㗎啦，咁我老豆一直都冇再娶，隔籬屋個陳師奶冇咗老公之後又一直冇再嫁，原來佢單戀我老豆。」
我：「你點知隔籬屋個陳師奶單戀你老豆？」
「陳師奶噚晚同我講㗎，老豆星期六生日，我做仔都唔記得，陳師奶竟然記得，走嚟問我送咩生日禮物好喎，十八廿二咩，我老豆食開萬寶路，咁你咪買條萬寶路送畀老豆做生日禮物囉，點知陳師奶又唔肯，話想我老豆長命百歲喎！」
我：「係愛呀！好心你做仔都唔好送煙畀老豆啦！不過仲未證明到陳師奶單戀你老豆喎，疑點歸於被告。」
「既然你問到篤我就講埋啦，陳師奶噚晚仲問我：想唔想我做你阿媽？」
我：「咁直接？好嘢喎陳師奶，呢個年紀仲勇於追求真愛，我幾欣賞佢。」
「欣賞還欣賞吖，不過佢自薦做我阿媽呢下真係有啲拋窒，我同佢個仔好熟㗎，好難想像到會由鄰居變細佬，我仲消化緊。」
我：「咁你點答佢？」
「我話我點諗唔重要，最緊要老豆點諗。」
聽返同事講，陳師奶向佢坦承7年前搬入呢個屋邨單位已經鍾意佢老豆，仲話唔怪得周不時會煮埋餸pack落飯盒拎去佢屋企，原來係想見多佢老豆幾面。
我：「咁溫馨得唔得㗎，咪住先！有冇問過你老豆意向係點？可能佢都鍾意咗陳師奶好耐呢？任何年齡都應該有戀愛自由㗎嘛！」
「噚晚陳師奶喺走廊截住我訴心聲，我一返入屋已經即刻同老豆講：喂，陳師奶話鍾意咗你7年喎！原來老豆一早知。」
同事老豆話，陳師奶成日約佢睇戲，但係佢次次都推，最近一次約睇古天樂同劉青雲嗰套《明日戰記》。
我：「陳師奶幾in喎，估唔到佢呢個年紀會主動提出去睇《明日戰記》。」
「陳師奶好in，不過我老豆就話自己好out，咁多年仲掛住阿媽，其實我好support老豆搵返個伴，陳師奶咪陳師奶囉，我仲講笑咁話，到時兩家人combine埋一齊，4個人再搵房署調遷，咁咪可以要個大單位囉！然後老豆話永遠唔會有人代替到阿媽，跟住又倒帶講返佢以前點樣識同埋點樣追阿媽，又講阿婆以前曾經極力反對……其實我已經聽過N次。」
陳師奶單戀一個人7年已經夠長情，點知同事老豆仲長情，佢阿媽都走咗十幾年喇，直至目前為止，個心仍然容納唔到第二個女人。
「其實陳師奶都唔差㗎，樣就無謂講啦，幾廿歲，但佢煮啲餸真係唔錯，我哋真係冇member係呢個年齡層咩？」
我：「之前有個50幾歲阿叔，好似做iBank，不過佢話想我哋介紹啲28歲樓下嘅女仔佢識，所以先至冇人理佢之嘛！呢個唔啱陳師奶㗎喇！」
有人呢個歲數仲想食妹妹仔，有人呢個歲數仍然咁念舊，所以一樣米養百樣人，專一呢樣嘢唔關年代事，係關性格事。