早返工都要鬧?上司:你做壞規矩呀!

我入咗間新公司,跟咗個痴線嘅上司,因為成日畀佢鬧,就以返工為例,個人係習慣早10至15分鐘返到office,我鍾意買埋早餐喺公司食,食完再施施然開工,點知咁都要畀佢話兩句。

上司:「呀William,留意咗一個禮拜,其實你咁早返工做咩呀?」當時真係畀佢嚇親,呢條係咩問題?所以我就答:「哦,上一份工都係咁,慣咗,我鍾意買早餐返office食吖嘛,以前啲同事仲早呀,8:30就返到公司㗎喇!」

上司:「唔係呀,我意思係呢度啲人都鍾意買早餐返公司食,你正常返9:00或者遲啲都得㗎!」

我:「不過9:00後始終係office hour,咁樣食早餐會唔會唔係咁好呀?」

上司指住公司個鐘,然後同我講:「你睇下而家幾多點,9:30呀,Nikki喺個位食緊腿蛋麵,Jacky仲威,鋸緊熱香餅,個個都係食完先開工㗎啦,你早咁多返到,個個食緊早餐你又食完喺度做嘢,咁樣做壞規矩呀!」

心諗,唔係啩,咁都要話我?

返咗兩個星期,我又畀佢教訓喇,今次鬧我OT,即係咁,鬧同事唔肯OT就講得通啫,鬧人OT就真係未聽過。

上司:「William哥,你捨得走未呀?」我係佢下屬,佢調返轉叫我阿哥……

我:「差唔多喇,做埋啲手尾就得,有嘢叫我做?」

上司:「唔係,咁我係你阿頭,你唔走我唔敢走呀,你返咗一個月工都唔夠,有冇咁多嘢做呀?」

最初我分唔清佢係真心定係曲,仲有一刻覺得呢位上司係咪挑剔我。

我:「吓?唔好意思,可能我新手,做得慢。」

上司:「喂,慢唔緊要呀,聽日再做囉,講到明係手尾,邊會做得完㗎,你今日做完晒啲嘢,聽日返嚟咪冇嘢做囉,咁你個人咪好容易迷失方向囉,我都慢㗎,最緊要係你唔好畀人知你慢吖嘛,咁快做晒啲嘢一陣老細行過點睇呀?哦!你個department好得閒,冇咩workload,咁咪cut人手囉!」

Sorry,我真係唔識回應。

上司:「我意思係呢,唔好OT啦,顯得我哋準時走好礙眼呀!」

返咗工個半月,我又無情情畀呢位上司噴咗一鑊,話完我準時同埋OT之後,今次佢話我冇請病假……咩料呀!

上司:「呀William,你唔病㗎咩?你知唔知公司有得畀同事有薪病假㗎?」

我:「但係……我好健康喎!」

上司:「唔係你健唔健康嘅問題呀!呢度好興有啲福利畀咗出嚟,見同事冇需要就會縮㗎喇,你冇病咪拎返一日唞下囉,有糧出㗎,你睇下Amanda,嚟M都請咗兩日,雖然你冇月經,都係咁易用一日啦,唔係叫你濫用,跟足啲嘢咪搵日休息下囉,唔使其他同事執手尾就得㗎喇,乖,聽日請唔請病假呀?聽日冇咩做喎!」

上星期又有兩日,係連續兩日,呢位上司監生捉晒全Team人去食晏,咩和牛set,lunch嚟講需唔需要食咁貴呀?雖然係上司畀晒錢,不過我都講咗幾次唔好意思。

上司:「咪再講唔好意思啦,公司㗎啲錢,每個部門每個月都會有嚿錢畀同事gathering,有段時間斷斷續續因為疫情冇晚市,個budget已經cut咁啲㗎喇,如果而家都用唔晒就好大鑊,你知唔知budget呢啲嘢永遠cut咗就加唔返?」

我:「係啫,不過貴吖嘛,仲要連續兩日食貴嘢。」

上司:「貴咩呀?對老細嚟講好濕碎㗎咋,佢慳咗又唔會加落你份糧度,咁梗係食埋佢啦,而家仲差幾百先用完今個月嘅budget,叫唔叫啲嘢打包呀?」

後來我先知就算慳咗都冇用,因為Account係睇單claim數,上司袋唔到落自己袋,所以就個個月都食到啱啱好,佢話要保住個budget喎!

上司:「你哋呀!咁耐都冇唔見文具㗎咩?頭先Admin畀張form我哋填文具補給,你哋填咁少嘅?呢期要少咗,之後要訂嘢又話做乜突然訂咁多㗎喇,保持穩定需求呀知唔知?訂啲原子筆返去畀細佬妹讀書用啦!」

同事們聽完都覺得好好笑,我都覺得好好笑,未試過畀上司鬧得咁開心,其實佢叫大家用盡啲福利,某程度上都有point嘅,特別係洗唔晒啲budget,公司下一期再review就會縮,縮咗又真係加唔返,同類型事件喺職場都見唔少。

幸運嘅係同部門班兄弟姊妹都唔會太過份,所以福利都用到啱啱好,唔過火唔過界,我諗係個上司識做,同事就自然識做啦!

我努力緊適應呢位新上司嘅風格,雖然知道佢下下咁話我都係為自己好,驚我做壞規矩累街坊🤣而其實呢位上司平時做嘢都好搏嘅,真係work hard play hard嗰種,如果有一日我做人上司,希望都可以好似佢咁貼地。

error: