今日啱啱過試用期，其實我對呢份工都幾滿意，只係有一個怪異嘅現象好想分享下，因為幾乎每隔兩三日我就會喺office聽到呻吟聲，大約係咁：「Wow……爽，舒服，爽爽爽，再大力啲，過少少，hold住，wow……正呀！」
而家我梗係知咩事啦，不過第一次聽到嘅時候真係嚇親，仲記得當時我四處張望，見到嘅景象更加難以置信，因為我睇到個年紀大約得廿幾歲男職員，起勢咁幫佢阿姐揼骨，而佢阿姐就流露出爽爆表情同埋高潮眼。
初時見到唔敢出聲唔敢問，只係靜靜觀察，老實講吖，如果佢兩個唔係咁明目張膽唔驚畀其他人睇到，我真係會以為呢個男下屬同女上司係有不倫關係，最奇怪係咩呀，係其他同事望都唔望一眼，好似見怪不怪咁。
做落咗之後我忍唔住趁lunch time問同事：「有樣嘢我留意咗好耐，點解個男仔會幫佢阿姐揼骨嘅？佢哋係咪……」
同事：「你講Michael？哦，佢阿姐嘅御用骨仔嚟㗎，成日揼㗎啦！笑死，佢哋梗係冇嘢啦！」
我：「冇嘢又會大庭廣眾喺office咁樣揼骨？」
同事：「佢阿姐周不時都會話做嘢好攰，然後叫啲下屬幫佢揼兩下，不過又嫌啲女下屬唔夠力，另外又嫌佢另外幾個男下屬唔識揼，後尾請咗Michael，條友仔又好鬼死認真去揼，阿姐仲讚揼得好舒服，咁就一直揼到而家喇，你做耐啲就會睇慣。」
另一個同事搭嗲：「放心啦，唔會叫你揼嘅，個阿姐淨係夠膽叫佢部門啲人咁做。」
我唔擔心個阿姐叫我揼，因為我一定會拒絕，你話我死板又好，老土又好，男女授受不親，有咩可能喺office同女上司咁樣身體接觸呀？一陣有咩誤會隨時變埋辦公室性騷擾，邊個行過見到都唔好啦……我本身係咁諗，點知有次老細行過……
「Michael，又幫你阿姐揼骨呀？順手幫我揼兩下先。」
然後Michael真係走去幫老細鬆肩，我睇緊啲咩呀？呢個同事究竟係擦鞋搏上位，抑或揼骨先係專長呀？佢當時嚟應徵個job duties有寫住連埋揼骨？咩職位呀？幾錢人工呀？
後來，由於喺工作上會同Michael有交接，加上唔知點解入親pantry都見到佢🙈大家熟絡咗之後雖然未去到好friend，不過都叫做有偈傾，早排咁啱一齊放工行去搭車，見大家都係男仔，所以我就大膽問咗句：「聽講你揼骨好叻㗎喎！」
Michael：「唔好笑我啦！」
我：「唔係笑你呀，你阿姐次次都大嗌好爽好爽，老老實實吖，你唔覺得返工要幫上司揼骨好委屈咩？」
Michael：「唔覺喎！佢舒服開心，我平時做嘢都輕鬆啲啦，你留意下，阿姐鬧其他同事仲多過鬧我，但我係全個部門最新，年資最淺嗰個喎。」
我：「啱啱嚟呢度做嗰陣，我真係嚇親㗎！」
Michael：「係咪以為我同阿姐有關係呀？之前有同事話過我啦，仲話我咁樣同做鴨有咩分別喎！」
我：「喂，真係唔好意思，其實我心底裡都有同樣疑問，返工返到要幫上司揼埋骨，搵食啫，做埋鴨好唔好？嗱，我唔係串你呀，純粹覺得個阿姐叫下屬揼骨好過份咋！」
Michael：「有咩過唔過份吖，揼骨啫，同做鴨有好大分別，我又唔使同佢上床，係咪先？所以老細係男人我都照幫佢揼㗎！」
我：「哦，咁你覺得冇問題就得啦！最緊要你自己冇hard feeling吖嘛！」都要講返兩句溫和啲嘅說話打圓場嘅。
Michael：「揼骨真係冇嘢喎，反而一陣要幫佢入天水圍交收仲煩。」
我：「交咩收呀？即係你而家唔係返屋企，係要出天水圍？你本身住邊呀？」
Michael：「我本身住葵芳囉，阿姐喺Carousell買咗嘢，但個賣家淨係肯天水圍西鐵站面交，我而家就係出去幫佢拎嘢囉！」
我：「放工係私人時間喎，順路就話啫，要去到咁遠。」
Michael：「算啦，係個賣家煩啫，之前試過幫阿姐交收啦，一般都係市區，係今次要入到大西北啫。」
可能係我同Michael嘅價值觀唔同啦，唔敢企喺道德高地話人，但我自己就一定唔會咁做喇，幫同事係一回事，畀人當傻仔或者阿四又係另一回事，打份工啫，奴性會唔會太重呀？諗諗下個阿姐冇乜問題，好似係Michael有問題。
坦白講，我又唔覺得Michael想借揼骨博上位，只係佢呢套職場生存之道我就唔多認同，想喺公司有好日子過，唔使畀上司鬧，應該係靠工作能力吖嘛，冇理由要提供其他「額外服務」去換取一席位，換轉係你又肯唔肯幫阿姐揼骨同埋去天水圍交收吖？