試過有一位candidate曾經對住我喊，因為我哋傾緊佢上一份工。呢個女仔好坦白咁話自己其實係被炒，原因係得罪咗個上司，處處被針對。
其實佢張reference letter並冇mention係炒魷魚抑或自己走，不過佢愈講愈委屈，愈講愈激動，情緒開始崩潰，喊到完全收唔到聲，我就忙住遞紙巾畀佢。
當時我同佢講嘅說話，正正係呢個IG post嗰幾句：「保持正面就得，見工時唔好bad-mouth前任老闆同埋同事，最重要係代入對方心態，佢或者會認同你之前嘅慘痛經歷，但同時一定會想像你第日離開佢公司，又會向下一任僱主唱佢哋。」
安排咗佢上去我個客度interview，對方HR見完後打畀我：「嘩，你個candidate好慘喎，上一份工畀個阿head針對，頭先係咁喊，我安慰佢嘅時間仲多過做interview。」
我都心知不妙，盡力sell啦！Focus返candidate嘅工作能力，又講下際遇啲嘢乜乜乜，不過HR最後都揀咗另一位應徵者。
個HR同我講：「如果係真都幾慘嘅，問題係佢嘅抗壓能力似乎麻麻地，我驚第日招架唔住我哋啲客，同埋呢，前上司點解淨係針對佢一個嘅？」
前上司未必只係針對佢一個，但係呢啲interview嘅場合，你又可以解釋到幾多？而從HR嘅語氣中可以聽得出有懷疑，合理嘅，嚴格嚟講佢兩個係唔相識，頂盡咪做咗幾十分鐘「朋友」，你又期望佢會幾體諒同埋幾信任你吖～～
有心事、有鬱結、有冤屈，唔係叫你收埋喺心，只係呢啲嘢同自己朋友或者親人講就夠㗎喇！Interview絕對唔係同對方傾心同申冤嘅場合，更加唔值得因為對前公司嘅恨意，糟蹋咗加入另一間新公司嘅機會。
當然，我知道總有人係照鬧舊公司都一樣有人請，故此以上係講一般情況，講緊穩陣嘅方式同應對，唔係個個咁好彩去interview會撞到一個陪你同悲同喜嘅HR嘛！
講舊公司嘅缺點同埋不足係可以嘅，謹記一樣嘢就得－－－「對事不對人」❤️