每次同兩老出街，阿媽都會發晒爛渣：「你阿爸痴線㗎！成日自己一支箭標咗去，有時想停低睇下嘢啫，轉個頭已經唔見咗佢。」
係㗎！阿爸由細到大都係咁，試過無數次一齊行街，最後要打電話去搵返佢，不過頭先公佈咗限聚令收緊到兩人之後，阿爸就好得戚咁send咗個WhatsApp嚟：「嗱！叫你阿媽唔好再鬧我呀！係個仆街政府咋，三個人一齊行犯法㗎！」
佢哋老夫老妻已經習慣咗，但係聽聞唔少情侶就喺疫情期間分咗手，原因係有啲couple感情唔深，兩個人嘅關係建立於平時飲飲食食，用娛樂去掩蓋一直存在嘅分歧，呢次長時間冇得face to face溝通，自然會出現陌生感同埋距離感，所以一對情侶係真心愛對方，用心去經營一段關係，抑或純粹吃喝玩樂同埋kill time，一個疫情全部睇得一清二楚。
另外，因為疫情而引發出嚟嘅生活問題都好多，失業、減薪、公司生意唔掂、收入有壓力、搵工進度緩慢等等….情緒受影響在所難免，其實對住一個死都唔肯封關嘅政府，大家嘅心情本身已經好差。
我阿姐話，一直以嚟貌合神離嘅夫婦，都好容易喺今次疫情出事，兩公婆本身相處已經有問題，以前仲可以用「同friend出去食飯」或者「公司應酬」呢啲原因出去唞唞氣，偷返少少私人空間同埋時間畀自己，今次第三波疫情，真係連一絲唞氣嘅罅隙都冇埋。
……
死喇死喇，我都係返屋企睇實阿爸阿媽先，驚佢哋離婚呀！