如果人人去見工都係咁「9s」….sorry sorry，應該係咁「easy」，呢個世界幾咁美好呢！
=====
#讀者投稿 ：叫我陳生得喇
上個月去見工，填完form之後坐咗8個字都冇人理我，隔離仲有一個女仔又係等緊見工，佢一早填完，明顯等得耐過我。
Receptionist其實有不斷打內線搵個HR，聽得出佢好勞氣，因為冇人聽佢電話，間唔中亦安撫我哋：「你哋可能要等多陣，負責個同事行開咗。」
雖然等咗好耐，覺得好浪費時間，不過Receptionist都盡咗力同埋好有禮貌，加上市道又唔好呢，忍啦！反正都上咗嚟。
悶到一個點，忍唔住同隔離個靚女吹水：
「你都係見工呀呵？」（問完都覺得廢）
「係呀！」
「你嚟咗幾耐呀？」
「早你20分鐘左右，真係等咗好耐。」
「如果呢排唔係冇其他工見，我諗我走咗㗎喇。」
「係囉，不過見Receptionist幾好人。」
就喺呢個時候，傳說中嘅Elsa終於出現喇，計次序當然係隔離位靚女見先啦，咁我又繼續等喇。
等等等，又過多半個鐘，傳說中嘅Elsa又行出嚟叫我入去，不過佢自己冇入房，一打開門，係頭先個靚女。
「Hi，係咪group interview？」
「唔係呀，佢請咗我，我而家係HR喇。」
「吓！」（我曾經諗過係咪電視台整蠱定係Kevin仔拍玩爆你個腎之類）
「呢間公司之前個HR賠錢即走，所以冇人做HR，頭先個Elsa係老細秘書，佢客串in人㗎咋，啱啱請咗我，我而家係HR喇。」
「咁樣。」係，就係咁樣。
靚女唔係直接請我，因為佢都係啱啱返咗工一分鐘，原來Elsa叫佢負責1st in，如果覺得我ok，就出去搵Elsa，再由Elsa通知另一個部門主管見我，即刻做埋2nd in唔使來回兩次嘥時間，僥倖地，見完之後一日，呢間公司都有打嚟叫我正式返工。
呢間公司唔大，得60幾人，人事部又得靚女一個人做晒，行政仲幾混亂，難怪之前嘅員工走得咁急，但係靚女HR嘅心態同我一樣，就係大家都冇其他offer，做住先囉，不過一齊填form等見工嘅人忽然變咗HR，真係鳩屎得嚟又幾有趣，我仲記得當時佢嗰句：「佢請咗我，我而家係HR喇。」
後來我有問過靚女HR，當日即見、即請、即刻開工in我，人工係點計？嗰陣簽咗合約未？佢話冇計，因為只係幫手in一in我，前後大約用咗20至25分鐘，當我見緊部門主管嘅時候，佢已經同時間走咗喇，第二日先正式返嚟簽約，所以都係早我一日入職，而家我哋兩個一齊騎牛搵馬，過咗第三波肺炎先算啦！