除夕嗰晚同班friend去蘭桂坊晚飯，打算直落倒數迎接2022年，去到大約11:30嘅時候，我收到個唔認識嘅來電，以為係sell嘢所以冇聽。
繼而到11:40分左右，呢個電話又再次打嚟，諗諗下唔會咁夜sell嘢吖，係咪有啲咩急事呢？結果我就接咗個電話，你估下對方第一句講乜？
「Hello唔該Elsa Yu吖。」傳嚟一把女聲，仲知道我個名。
我：「我係，你邊位？」
「我係XXX公司打嚟，之前收到你份CV應徵我哋嘅Marketing Officer，方唔方便傾兩句？」
的而且確，喺聖誕前我係send過約莫10份CV出去，但XXX公司真係冇印象，問題係……今日12月31號，除夕呀！而家幾點呀？
我：「咩公司話？」
「XXX呀。」佢再重複一次，但我都係冇印象。
我：「哦，你想傾咩？不過我喺街，會唔會太嘈？定係我隔幾日call back你好啲？」講到咁，識做啦！你冇節目啫，我有呀！
「唔緊要，我聽到呀，好快問你幾句，之前你嗰份工一般係自己跟晒啲嘢，定係再outsource其他Marketing Agency幫手㗎？」
嘩！條女嚟真㗎喎！既然佢要問，我亦行出酒吧諗住速戰速決，無謂喺班friend面前同個HR傾嘢啦！
我講幾句，佢又講幾句，附近啲人忽然間情緒高漲，原來不經不覺得返10秒就踏入2022年，由於酒吧門口塞住咗，短短10秒我真係要識輕功水上飄先返到入去同班friend倒數。
「10，9，8……」街上嘅人齊聲countdown.
喂，點算好呀？旁邊有幾個鬼佬笑笑口圍住我：「Seven, Six, Five……」冇喇冇喇，是但啦，鬼佬就鬼佬，數啦！
我：「Four, Three…..」然後電話另一邊廂嗰位HR失驚無神一齊數：「Two, One！Happy New Year！」
做咩啫你？我唔識你㗎！就係咁，我新年第一句Happy New Year獻咗畀老蘭幾個唔識嘅鬼佬，仲有電話裡面嗰位HR，2022年一定有運行啦！
冇理由新年第一句就鬧人吖，加上嗰位HR已經好快講咗句：「唔好意思呀，阻住你同朋友倒數，因為我頭先一路做嘢都冇發覺就快12點。」
嗰個moment，我又突然覺得佢好可憐，所以不由自主咁樣問佢：「點解呢啲日子同埋時間你仲做緊嘢？」
「因為聽日weekend，我哋想趕住叫求職者下星期一上嚟見工。」不如你都去見工啦，壓力咁大，做到咁夜，最應該搵工嘅會唔會係你呀？
我：「但係我應該唔會考慮，唔好意思呀。」係咪太直接？
「點解呀？會唔會見完再決定？」
我：「因為我feel到你公司嘅文化好chur，其實我轉工係想多啲私人時間，但你哋同我理想中有啲落差。」
「好，我都明白，咁唔勉強你。」佢冇刻意兜，換言之其他department都係無盡OT啦！
我：「新年快樂！」
「新年快樂！」
我哋嘅對話就咁完咗，返入酒吧仲要畀班friend詐型，不過呢啲又算得乜嘢吖，對比起嗰位HR，我絕對幸福得多。
如果有緣見到呢段投稿，希望嗰位HR會趁2022年新開始好好諗清楚，返一份工係咪需要咁搏呢？搏到連除夕倒數都要call求職者？同埋就算唔係大日子，呢個時段call人都似乎唔係咁好，嚇親人又唔夠pro，未去in都知份工辛苦啦！好趕客㗎！