人生中做過一次兄弟，唔止感覺麻麻，仲有陰影。記憶中已經係6年前，同部門一個男仔走嚟同我講：「Larry，小弟9月結婚，想搵你幫手做兄弟，唔該你吖！」
大家可能都出任過朋友婚禮嘅兄弟姊妹角色，好平常係咪？問題係當時我入咗呢間公司僅僅5日咋，講緊人哋大喜日子，Reject又好無情，接受又似乎唔合邏輯，我同呢位叫Rocky嘅同事其實一啲都唔熟。
我：「吓，哈哈，咪講笑啦！」
Rocky：「唔係講笑㗎Larry，我女朋友嗰邊有5個姊妹，不過我真係搵唔到5個兄弟咁多。」
我：「但我哋個部門仲有Ivan, 阿華, Wilson, Alan, 阿邦, 細祥……」
都未數完，Rocky已經打斷咗我：「佢哋唔得㗎，得阿華份人抵諗啲，你睇下Ivan，平時做嘢求求其其，Wilson就咩都是但，Alan每朝返幾點你唔係唔知啦，我都未見過佢準時，點敢旨意佢一齊接新娘呀？阿邦三句唔埋兩句就講咸濕嘢，細祥每一句說話都係粗口。」
我：「阿頭囉！」好積極咁推辭，又好婉轉咁推辭。
Rocky：「搵自己上司做兄弟好似怪怪地，你知佢平時講嘢幾寸㗎啦！」
畀佢咁樣數，諗落又好似有道理，特別係Ivan同Wilson，喺度返工幾日已經覺得佢兩個似pat爛泥，好難想像結婚嘅大日子叫佢哋幫手睇頭睇尾，至於細祥……我估玩兄弟嘅環節一定爆粗，而其實阿華都唔好得幾多，因為佢話自己晚晚打機打到三更半夜，成個人長期精神萎靡咁款，唔知仲以為佢每日唔係打機，而係打10次飛機。
同一時間，我覺得Rocky好可憐，人生在世咁多年，搵5個兄弟都有難度，係咪多少反映咗佢人緣差呢？
嗰個moment我feel到Rocky好無助，可能心軟唔識say no，又可能係打算留喺度做要打好關係，總之我就答應咗做兄弟，算啦，你今日幫人，人哋他日幫返你啫！
結婚做兄弟姊妹，仲要喺Big Day前出嚟成班食飯認識，其實我同Rocky本身都唔熟，更加未見過佢女朋友同一班姊妹啦！當晚喺餐廳嘅氣氛勁尷尬，我指兄弟呢邊。
我：「咦，你都有份做兄弟呀？」
喺5個兄弟當中，除咗識得同部門另一位同事阿華之外，仲有一張熟悉嘅臉孔，佢係每日上嚟公司送件派件嘅順豐哥哥，當時我連佢點稱呼都唔知。
「係呀，Rocky叫我幫手吖嘛，話介紹班姊妹畀我識。」
我：「哦，其實每日見你上嚟公司收嘢，都未正式問你叫咩名？」
「我叫阿偉呀！」
我：「原來你同Rocky咁friend㗎？」
「唔算好friend咋，咪又係派件收件先見到。」順豐哥哥咁都答應做兄弟，真係夠義氣。
呢個時候Rocky亦開始介紹一班兄弟互相認識，有我，有阿華，有阿偉，另外兩位叫Dickson同埋樂仔，前者係Rocky去開嗰間Salon嘅髮型師，後者係佢嘅中學同學。
好辛苦咁捱完呢餐飯，仲有Rocky結婚嘅大日子，細節忘記得七七八八喇，畢竟係6年前嘅事，只係記得Big Day當日好辛苦，幾乎未坐低過，兄弟又冇被安排固定嘅座位，食嘢好似打游擊咁，而其實都冇乜得點食，仲要留到最後一刻陪新人送客，慘過擔泥。
插曲發生喺婚禮之後兩三日，Rocky私底下同我講佢老婆唔開心，好唔滿意阿華呢個兄弟，搞到兩公婆新婚都鬧大交。
我：「發生咩事？」
Rocky：「阿華囉！叫咗佢前一晚唔好打機打咁夜㗎啦，講明朝早7點要去到蝴蝶邨集合，唔夠精神邊頂到呀，佢又唔聽。」
我：「嗱，我唔係幫阿華講說話，不過做兄弟已經好唔話得，人哋前一晚做咩都要管，阿嫂好似苛刻咗啲喎！」
Rocky：「我最初都係學似你咁講，仲話返我老婆唔好咁自私，然後佢畀擺酒當日啲相我睇……不如你睇下先啦！」
挨埋去睇Rocky手機裡面啲相，真係好誇張，每張有兄弟做背景或者喺附近嘅相，阿華都係打緊喊露，我發誓冇誇大，係張張！我用機會率去計，一個婚禮攝影師當晚影咁多相，冇一千都有幾百，如果每一張都影到阿華打緊喊露，咁佢真實中絕對係未停過放蚊，其實我有印象佢好攰既，但當晚太忙，根本唔得閒理。
我：「係難睇咗啲，不如調轉個角度睇吖，個兄弟咁攰都幫你，互相體諒囉！」
Rocky：「你呢句說話我又有同老婆講過，然後佢畀咗條片我睇，準備好未？」
準備好喇！條片係婚禮當晚，新娘同新郎喺條樓梯行落嚟，兄弟姊妹分開左右企，一人企一級，拍晒手列隊歡迎嗰種呢，我就企阿華下面嗰級，而家先見到喺條片裡面，阿華一直打喊露，連住咁打，而且當新娘行到嗰級嘅時候，阿華個口係擘到獅子咁大，我唔識形容呀，如果你有份睇嗰條片，成個Focus好自然擺咗喺阿華身上，因為實在太爆笑喇。
新娘咁嬲，就係因為班姊妹睇完條片之後瘋狂恥笑，先唔計好多張相都影到阿華打喊露，但呢條新娘徐徐步下樓梯嘅video就得一千零一條。
Rocky：「淨係講條片，我老婆話阿華摧毁咗成個婚禮，因為入面有好多回憶，咁溫馨嘅片段變咗一幕笑片。」
我唔識點講，站於旁觀者角度，真係想講做兄弟姊妹係義務，仲要求咁多似乎於理不合，但如果你睇過啲相同埋條片，可能就會「別有一番滋味」，假設你係當事人，即係新娘，發老脾都可以理解嘅。
不過我點睇唔係最重要，關鍵係新娘無法釋懷，而Rocky亦兜口兜面同阿華講，嗱，呢啲就係男人同女人嘅分別，男人會坦蕩蕩咁講出嚟，但阿華就好嬲，始終擺酒當日係好辛苦，唔感激仲要怪責，又有點兒那個嘅。
結果點收科？咪就係做兄弟變咗冇兄弟做囉！Rocky同阿華因為呢件事面左左，喺公司竟然變咗陌路人。
（未完待續）