聖誕、除夕、元旦，我真係好開心，唔係因為鍾意節日狂歡，而係返part-time可以賺多啲錢，再加埋本身份正職，個感覺非常充實。
介紹返自己先，我正職做design，另外會接freelance，咁你知道freelance呢樣嘢始終話唔埋，但勝在時間方面可以自己控制，所以平時星期六日或者大時大節只要得閒，我仲會返炒散侍應，其實香港好多中小型酒店嘅餐廳都長期搵炒散，原因當然係唔使養個full time咁重皮啦，特別係呢兩年嘅環境。
可能係我變態啦，睇住啲友仔每逢大節日都畀人劏，感覺係幾奇特，例如平時只係$300一個餐，情人節、聖誕、除夕、元旦呢啲日子，你預double啦，酒店buffet仲恐怖，隨時因應節日變咗3至4倍價錢，再分上下半場，換言之你畀嘅錢貴咗，不過食嘅時間少咗。
或者我只係搵返心態上嘅平衡，若干年前，我就係水魚嘅角色，因為當時有個洗腳唔抹腳嘅女朋友，每逢大節日就要一早訂位，用個好唔合理嘅價錢食個限時限刻嘅飯。
嗰個女朋友每個月都會清我倉，1月想要個手袋，2月食情人節酒店buffet加一份禮物，3月要去歐洲旅行，4月睇中部新電話，5月睇演唱會要最貴嘅飛，6月話好攰想要張按摩椅，7月想買條pandora手鍊加佢英文名串飾，而佢英文名有7個字母……如此類推，每個月嘅節目同使錢清單都好精彩。
我做份design搵得幾多？講真冇欠卡數已經覺得自己好叻仔，但真係一蚊都儲唔到，出嚟做嘢幾年，銀行係完全冇積蓄，最後仲要「被分手」，佢識咗個有錢仔之後，用WhatsApp講咗句：「不如我哋算啦！」我問點解，佢話同我一齊睇唔到將來，話我人工少，儲唔到錢……其實我儲唔到錢，咪就係因為你囉！
好多花生友可能會話我寵壞個女朋友，佢話要就買？佢話去旅行就去？當然啦，而家嘅我都會咁樣反問自己，不過當你好愛一個人嘅時候，真係唔會計較咁多。
「被分手」後我好唔開心，所以用工作麻醉自己，搵書讀又冇錢，咁咪搵part-time做，填滿啲時間囉，點知個感覺又幾爽，假日唔使出街＝慳一筆；假日做part-time＝多一筆收入；睇住人哋洗錢，自己反而賺緊錢＝感覺好似出緊雙糧；大時大節返炒散＝冇掟洗錢，儲多咗錢。
正職、Freelance、炒散，冇諗過分手後嘅幾年間，銀行存款會見到六位數，當然呢筆錢唔算多，比起有錢仔富二代更加係雞毛蒜皮，但一分一毫都係我親手賺返嚟，有血有汗之餘亦有滿足感，正正因為知道搵錢辛苦，我絕對唔會亂花。
返工先喇，今晚個新年大餐收千幾蚊，食返同平時一樣嘅嘢，我想趕返去用侍應身份感受呢種氣氛呀！祝自己下一個遇到嘅人，會係一個識得體諒我同欣賞我嘅人。