雖然呢個時勢裸辭係好不智，但真係忍受唔到我阿姐，佢有句口頭禪係：「大學生喎！」
開會傾嘢問意見，有時你都要咀嚼同思考下㗎嘛，佢提出完一樣嘢，即刻就要你畀個方案出嚟，前後係一兩分鐘嘅事，點答呀？答唔到就會話你：「你哋唔係大學畢業㗎咩？大學生諗少少嘢都諗唔掂呀？」
你以為答咗佢會冇事？錯喇！我阿姐一向假民主，基本上問你任何事，佢自己一早已經有諗法，只係想你講中佢心入面諗嘅嘢，但我哋唔係佢肚裡面條蟲，所以就算你有任何建議，如果hit唔中佢諗乜，阿姐又會話：「點會work呀大學生！」
有次佢收到email唔識讀個客嘅名，叫我哋埋去睇同埋教佢讀，不過你知有時啲人嘅英文名好奇怪，或者根本係啲拼音，你未必會識讀同埋讀得準，好心話幫佢check下啦，阿姐得唔到即時答案又會話：「大學生喎！英文名都要查！」
有嘢唔明要問佢，又係呢句：「大學生喎！」做錯嘢畀佢話，又係呢句：「大學生喎！」
究竟佢有幾憎大學生呀？定係冇讀過大學？唔使咁仇視喎。
呢啲都算，早排打返公司請病假，我阿姐喺電話度係咁講：「又病呀？」咩又病呀？我上次請sick leave係4個月前，其他同事請sick leave我亦控制唔到，更何況你唔關心下屬都算啦，點解要話人又病呢？邊個想病呀？你嘅心態一嚟已經覺得人哋扮病啦！
我決定辭職嘅導火線係上次嚟M，第一日M好痛好唔舒服，趁lunch time食完飯即刻伏喺枱唞陣，當時成個人已經冇晒力，lunch time係1~2，我伏低嗰陣係1:25，阿姐走埋嚟好大力拍我張枱，佢叫我唔好伏喺度，我話係lunch time，佢就話lunch time又點？
咁我解釋係M痛好辛苦啦，你點估到大家都係女人，我阿姐會咁講：「M痛？我夠有月經啦，又唔見我好似你咁痛？一係你請假走，一係你入廁格或者後樓梯瞓，一係就即刻起返身。」
人人M痛程度唔一樣㗎！你係冇常識定係冇同理心呀？結果我真係請半日假走，臨走仲要畀說話我聽：「月經就要請假，每個月咪要畀7日例假你？」
因為呢件事，我第二日返公司就辭職，其實都有問過自己係咪太衝動？我阿姐講呢啲說話算唔算過份？定係比起其他人喺office遇過嘅無理事，我嘅情況根本不值一提呢？
投稿讀者：Ivy
－
😰 講過份，我心目中呢一篇仲係number one
請假帶個女睇醫生，上司回應句句有骨：
「你冇老公㗎？你帶個女去睇會好得快啲？」
https://hkofficedaily.com/?p=12512