我係一個資深嘅球迷，1990年正式睇第一屆世界盃，當時個球壇有巴治奧、荷蘭三劍俠、馬勒當拿未退休，碧咸未出道、美斯都係得3歲，咁我而家都40幾歲，可想而知波齡有幾長，而老婆就係我舊同事，佢唔睇波，叫佢數3個曼聯球員名都成問題，世界盃問佢捧邊隊，真係夠膽死答皇馬嗰種。
上個星期因為派咗消費券冇耐，出面啲食肆又開始大排長龍，咁我哋兩公婆唔想同人迫，結果係咁易買外賣返屋企食，我照舊睇英超玩少少，老婆忽然講咗句：「你又買波呀？真係咁易中咩？反正有消費券當增值，我豪$500出嚟玩下啦。」語罷，佢真係喺自己銀包拎咗5張$100蚊出嚟，叫我用我嘅馬會戶口幫佢買。
識波唔代表買波一定叻，我都係貪刺激而玩下，成世輸多贏少，但係老婆連咩係越位都唔知，冇理由唔食佢㗎！結果佢人生第一場買嘅波係阿仙奴對曼聯，本身佢買阿仙奴就冇問題既，不過老婆話要買讓球主客和個「主勝」。
我：「其實呢場有平手、半球，即係阿仙奴打和都係輸一半，讓球主客和就即係阿仙奴要淨贏曼聯兩球或以上，你明唔明個分別㗎？」
老婆：「你頭先咪解釋咗讓球主客和點解囉，我明呀，平手半球得1.82倍，讓球主客和買阿仙奴有3.5倍，點解唔要3.5倍？」
我：「因為個難度唔同吖嘛！」
老婆：「是但啦，$500咪當入場睇波囉！」
其實識波反被識波累，我當時覺得曼聯衰極都會知恥近乎勇，輸都未必會輸咁多，特別係場波打到2:1嘅時候，曼聯仲有個12碼，我就同老婆講：「都話㗎啦！買平手半球咪好囉，而家打和都係輸一半之嘛。」話口未完，般奴費蘭迪斯射中柱，追唔成平手不特止，轉個頭仲輸多球，阿仙奴贏3:1真係開讓球主客和個主勝，由於我「食夾棍」，變相要賠 $1,750減$500賭本，即係嘔$1,250出嚟……
未完，同一晚曼城對屈福特，佢話未聽過屈福特，讓球主客和曼城-3照買，我話讓太多，老婆唔理，仲話反正贏返嚟，輸咗都係$500，結果2.78倍又中，好在我冇再「食夾棍」，因為$1,750乘2.78倍，佢已經累積贏緊$4,865。
更驚人嘅一幕出現，星期六深夜仲有場賓福特對熱刺，佢叫我買3.8倍打和，見佢咁旺就照買啦，買完先記得問老婆：「熱刺都唔買走去買打和？你屈福特都未聽過，唔通聽過賓福特？」
老婆：「熱刺唔係香港㗎咩？打英超邊會贏到㗎？我支持香港球隊咋！」
我：「你係咪講緊傑志？呢隊係熱刺喎……」
老婆：「唔同㗎？咁點呀？買咗未呀？熱刺有咩人㗎？好勁㗎？」
我：「講緊英超點會有隊香港球隊呀？買咗返唔到轉頭喇，而家一齊嗌頂住啦！」
結果得我嗌頂住，老婆睇咗陣就瞓覺，起身先問我幾比幾，呢場波0:0，即係打和，$4,865乘3.8倍，佢贏緊$18,487……
星期日我同老婆講：「你而家贏咗萬幾蚊，其實唔使場場都瞓身，可以玩少少就得，唔好輸返轉頭吖嘛！」
老婆：「輸極咪又係$500賭本，唔緊要啦！」
結果佢當日只係揀咗一場波，就係意甲嘅拉素對AC米蘭，原因係我有件好耐之前嘅AC米蘭波衫，佢叫做聽過，所以直接將$18,487買AC米蘭客勝就上床瞓覺，淨低我捱夜睇仲幫佢緊張埋一份，最終賽果係拉素領先一球，但AC米蘭入返兩球反勝2:1完場，$18,487乘2.15倍＝$39,747，呢個係老婆星期六日「路過」玩咗4場波嘅成績。
星期一朝早佢知道咗之後，話自己睇中咗個手袋，叫我拎返啲錢出嚟，淨係留低賭本$500……呢招「割禾青」真係好高，唔怕老實講，我份糧扣埋強積金都係得$36,500，佢玩兩日已經賺得多過我份人工，加上我識咁多波都未贏過咁多錢，突然覺得個世界好唔公平，灰咗一日，但呢個係我老婆，佢贏錢我都開心既，起碼佢用自己錢買手袋先吖！
噚日我哋傾開計，又一齊睇足智彩，老婆見到有場波係艾杜哈尼對沙巴罕，佢仲講笑咁問沙巴罕係咪一條魚，我話唔好買呢啲啦，連我都唔識，最後佢睇中曼城對皇家馬德里呢場歐聯。
老婆：「曼城贏波得1.42咁少，不過又唔想買皇家馬德里，因為曼城早兩日先幫我贏錢，不如買波膽試下。」
我：「嘩，好難中㗎，我估2:1或者3:1啦，買少少囉！」
老婆：「咩叫主其他？有22倍喎！」
我好努力咁解釋「主其他」波膽係咩意思之後，老婆就話：「而家拎晒啲錢得返$500，就買$500主其他啦！」
我：「你唔好痴線啦！好難中㗎！曼城上次對屈福特都開唔到主其他啦！」
老婆：「唔使煩吖嘛！輸咗都係$500，都贏咗3萬幾啦！」唔知應該點形容佢，技術就冇㗎喇，但係膽大心細，而且老婆唔識波所以諗嘢好直接，曼城同皇馬加埋佢數唔出3個球員，佢唔睇出場陣容，唔理戰術，冇陰謀論，所有嘢都係咁簡單。
然後，曼城4:3擊敗皇馬，係呀，曼城唔使大炒㗎，同皇馬一人一粒鬥攻就開咗個22倍「主其他」波膽，我老婆再執多$11,000，最堅係佢又「割禾青」，話美容院重開想買個package，拎返$10,500出嚟，又留低$500做賭本，除咗叫佢一聲賭聖同埋寫個服字之外，我真係冇嘢補充。
呢段投稿唔係鼓吹賭博，相反地，盲拳打死老師傅，睇住佢用咗4日時間贏咁多，我作為資深球迷真係情何以堪，而且以老婆嘅性格，佢一定唔會輸返轉頭，下次如果輸咗嗰$500賭本就一定唔玩，唉，我睇下自己份糧，再睇住老婆又買手袋又買美容院package，已經唔知講咩好，不賭就是贏，今晚利物浦對維拉利爾我齋睇波算喇，如果老婆又有福至心靈嘅投注，我唔介意用自己個FB account留言分享。