曾經有個男會員向我哋投訴：「有冇搞錯呀？乜參加嘅人唔係全部單身㗎咩？個女人結咗婚㗎喎！你哋有冇check清楚先畀佢join㗎？雖然我想搵老婆啫，但唔係想搵人哋個老婆吖嘛！」畀佢一輪咀鬧完，之後先知道發生緊咩事。
原來喺一次8男8女嘅成熟人士極速約會活動當中，呢位男會員結識咗另一位女會員Linda，後來佢哋兩個約出街，食飯期間Linda話自己其實已婚，所以拍拖就免喇，問個男會員純粹肉體關係介唔介意，如果ok就不如搵個地方短聚……
除咗稱讚呢位男會員夠定力之外，又要不厭其煩再講解下多人極速約會嘅模式先，因為唔係個個都參加過speed dating嘅活動，唔想大家睇到一頭霧水。好似呢種多男多女嘅極速約會通常喺餐廳舉行，在場嘅男女會員都有機會互相認識，因為每個組合有幾分鐘嘅傾談時間去了解，夠鐘就轉枱，女士一般坐定唔使郁，男士就逐個位移動。
期間男女會員唔可以就咁交換contact，因為驚其中一方冇興趣又唔好意思拒絕，所以我哋公司嘅角色就係做醜人，派張紙畀男女雙方，傾談之後邊個對邊個有興趣的話，麻煩喺張紙上面剔佢個名，活動完結後我哋會收返張紙再對一對，假設Alan有剔Amy，Amy冇剔Alan，咁就冇㗎喇，如果Alan同Amy互相有剔，咁我哋就會經電郵將佢哋嘅contact畀對方，換言之Alan同Amy可以自由私下聯絡。
講返嗰位已婚女會員Linda，check返之後發現佢基本上剔晒8個男會員，當中都有6個男會員有剔佢，咁我哋收到其中一位投訴，所以就要搵Linda搞清楚件事，而佢亦直認不諱，仲解釋咗自己點解會咁做。
唔係嗰啲對老公已經冇晒感情嘅老土故事，Linda話佢兩公婆奉行「開放式婚姻」，因為咁樣先可以保持熱度同新鮮感。
Linda：「你唔覺一世人流流長，結咗婚只可以有一個性伴侶好悶咩？我同老公覺得開放式對大家感情更好，同其他人做完，唔止新鮮，仲會有少少罪疚感，返到去自然就對另一半好啲，最重要唔好對出面嘅人付出真感情，只要有性無愛，咁其實係冇問題。」
我：「咁樣都冇問題？你嘅另一半唔會難過㗎咩？仲要雙方都默許？我唔理解。」
Linda：「如果我同老公唔係用呢種方式相處，可能一早就離咗婚，佢有佢玩，我有我玩，大家都對性事保持興趣，咁我哋兩個耐唔耐再做已經冇咁悶，因為中間大家都試過唔同對手，sex呢樣嘢每個人都有長處同短處，例如有啲人持久力強，但冇技巧，姿勢又悶，有啲人就相反，又例如我鍾意男伴用口，但我老公唔鍾意，咁呢一part咪可以搵其他人滿足我囉。」
我究竟聽咗啲乜？Linda最後仲強調，佢兩公婆點樣玩都好，有一條底線係唔可以超越，就係玩還玩，唔好帶返嚟屋企做……
呢條都叫底線？
你有底線，我都有底線，公司講到明個活動只接受單身人士，點可以講大話自稱single？其實呢個位真係有啲為難，要證明結咗婚可以問你拎結婚證書，但要證明未結婚，只要你唔拎出嚟同埋唔報，唔通Speed Dating公司逐個逐個去check咩？但經過呢件事之後，公司亦修改咗條款，有更嚴厲嘅聲明，並唔排除虛報資料會有法律責任。
Anyway，唔係個個男會員都咁「正直」，真係有食唔食，一心搵結婚對象，所以Linda大方承認同嗰次活動中另外幾位男會員發生過關係，仲覺得各取所需，無傷大雅。