某日，一位公認好勤力嘅員工 Anthony突然拎封辭職信嚟人事部畀我。
我：「點解嘅？因為你爸爸件事？」
Anthony：「算係啦！」
Anthony嘅爸爸較早前中風，所以佢請咗個長假，最令我不解嘅係，放長假嘅期間成日見到Anthony著便服返嚟，有時留一陣就走，有時坐幾個鐘先走，咁我作為HR都要保障返啲同事，提一提佢請咗假就唔好返，因為返咗都唔會計人工，何必咁蝕呢？而且有咩緊要得過照顧屋企人先。
原來喺Anthony放假嗰陣，佢嘅部門經理Victor不停咁call佢，點佢做呢樣做嗰樣，其他同事搞唔掂嘅時候，仲直接叫Anthony返office執手尾，其實呢種「你愈做得嘢，愈有責任感，所有豬頭骨就愈係會留畀你」嘅情況，應該好多公司都會出現，不過Anthony請假嘅原因係爸爸中風，絕對凌駕於任何公事之上，所以Victor不斷煩擾個下屬，呢一點係極之唔恰當，亦完全冇同理心可言。
既然最難捱嘅時間都捱過咗，而家佢爸爸情況稍有好轉，點解Anthony又走嚟遞辭職信畀我呢？
Anthony：「其實當時放假都返嚟，我已經覺得好戇居，只怪自己太上心，但Victor從來冇慰問過我屋企嘅事，一句都冇提，仲要同我講唔好因為私事跟甩公司啲嘢，可能你會覺得Victor呢句說話好中性，好似冇乜嘢，不過我就覺得好心淡。」
我：「我直情覺得好心寒。」
Anthony：「頭先畀辭職信佢，收到不情不願丟埋一邊，所以穩陣起見都係比多封你，另外仲有email，麻煩晒。」
我：「唔麻煩，照顧好爸爸先，屋企人行先，尊重你嘅決定。」
其實Anthony走之前，佢條team已經有另一隻fit馬走咗，而Anthony走埋之後，再陸續有3個同事resign，咁你想像到Victor份人有幾討厭啦！我哋HR更加唔好受，有人走即係要請人，又出招聘廣告又搵headhunt，Victor仲嫌三嫌四，莫道你在選擇人，人亦能選擇你啦好冇！有啲佢睇得上眼嘅candidate唔take offer，有兩個就返咗幾日工冇鞋挽屐走，Victor個部門有乜辦法唔冧檔呢！
件事未完，由於冧晒檔嘅關係，老細興師問罪，Victor擺我哋人事部上枱，話我哋請人太慢，收返嚟嘅CV又唔掂，你都忽忽地，唔通有好嘅CV我收埋珍藏唔畀你咩！結果老細捉埋我同Victor一齊開會，我如實講返個情況出嚟，HR已經盡咗責任，而家係Victor個dept好似走馬燈咁轉，又唔見其他部門係咁？
老細：「係喎，你個部門走得最密，其他部門都係原班人馬，點搞㗎Victor？」
Victor：「Anthony囉，佢負責好多嘢，一走咗就好難搵人接，如果唔係佢，而家就唔會踢晒腳。」
用個離咗職嘅員工做擋箭牌都做得出？我啱啱想開聲之際，老細仲快我一步。
老細：「你講到個員工走咗有咁大影響，又負責咁多嘢咁重要，點解你唔留住佢呀？」
Victor駁唔到，佢自己知自己事啦，留唔住Anthony根本唔係人工問題，而係佢作為上司完全冇同理心。
冇錯，開完呢個會，我哋人事部都要繼續幫Victor請人，但起碼老細知道條友冇領導能力，你真係當人傻㗎咩，一個部門不斷有人走，個個員工都唔同性格，人人都係獨立嘅個體，點解冇人肯幫Victor賣命，點解冇人做得長吖，咪就係因為個department head唔掂囉！
好難唔諗起上年呢篇文
《結婚斟茶收到老細call 新郎哥洞房夜同老婆傾轉工》
https://hkofficedaily.com/?p=14005