投稿讀者：Edmond
上星期六晚，舊老細WhatsApp我問公事，我見到但冇覆，過咗幾日突然醒起，當時又冇嘢做，結果就答返舊老細：「Chris間公司講價唔使理，企硬就得，之前係佢同事Simon跟，你喺system或email要search Simon先搵到record。」
舊老細連聲道謝，然後一如以往咁問我：「Edmond，不如返嚟幫我手啦好冇？人工有得傾喎，你再考慮下。」
近半年，舊老細叫過我返去好多次， 而我亦一如以往地拒絕，原因係佢以前經常星期六日搵我傾公事同埋做嘢，平日凌晨都一樣照搵我，目前大家唔再係僱主同員工關係，我鍾意隔兩日答又得，心情唔好嘅時候ignore佢又得，不過以前就冇得避，佢會不斷催促你，WhatsApp唔覆就直接打嚟，呢份工我足足做咗3年。
實不相瞞，呢份工嘅待遇係好好，出去搵唔返咁高人工（事實證明我真係搵唔返），但係老細畀員工嗰種壓力同埋催逼感亦係好大，每朝準時10點開會，係咁吹KPI，預計可以返幾多單、同個客傾到邊個step、新product有冇做cross selling、點解嗰個客近期冇聲氣……其實全部都係閂埋房門自己友喺度吹，主旨始終係畀壓力班員工去跑數。
老細係工作狂唔緊要，佢要自己嘅員工都係工作狂，準時收工黑你面，但就算你收到工，都唔使旨意安安樂樂行街睇戲食飯，因為佢總會用msg同埋電話係咁問你嘢。老細開咗個WhatsApp group，如果佢send咗啲information或者問題出嚟，之後冇人reply，佢係會特別tag你窮追猛打。
咁都仲要做？簡單而言，一切都係為咗錢，當時我同老婆係奉子成婚，我要錢擺酒結婚，供樓，買奶粉尿片畀小朋友。同一個職位出去再搵，人工大約少萬零蚊，但點解最後又會辭職呢？因為我結婚當日，老細依然轟炸我，佢嗰朝第一個msg係咁：「唔好意思知你今日做新郎，但我想問下許生嗰份contract仲差啲咩？佢唔簽係咪有咩concern？而家啲價係點？」
佢表面上係「體諒」你結婚，「體諒」你今日請咗假，但實質上從來冇真正體諒過，我好記得自己同老婆斟茶畀父母嘅時候，手提電話係不斷震不斷震，斟都斟得唔自在，之後見到有7個missed call，行埋一邊打返去問咩事，老細又係口講唔好意思，不過語氣其實好唔耐煩，原來又係問啲單跟成點。
就係嗰一秒鐘，我做咗一個決定－－－－－辭職唔撈。
人哋洞房開開心心，而我洞房嗰晚就同老婆傾緊好唔好轉工……
我同老婆講，如果轉第二份工，應該搵唔返呢個錢，每月可能會少皮幾嘢，老婆話冇問題，因為佢都會幫手，公一份婆一份，寧願我多啲時間陪佢，唔好食餐飯都係咁覆message。
當時我經headhunt介紹轉工，你行家都講咗句：「可能搵唔到一樣咁高，你舊公司有啲似華為嗰類，做死人，用份糧嚟留住員工。」
其實我轉咗工超過一年喇，舊老細都仲係斷斷續續搵我問公事，初初離職最癲，照樣每日msg我，後來我完全唔覆，或者過咗成個星期先覆，好明顯見佢收斂咗，中間有段時間佢忽然冇搵我兩個月，舊同事話我知原來係請咗人，但嗰位新同事之後忍唔住辭職，舊老細又搵得我密咗。
不過你放心，大部分時間我都唔覆呢位舊老細msg，係今次見得閒先覆佢一句，有幾次佢冇問公事，係直接叫我返去做，其中一次仲親自打嚟，叫我出嚟傾下回巢，人工萬事有商量，不過我唔制喇，間中有心情有時間應兩句ok，平日凌晨仲有放假都要陪佢癲就咪搞。
買咗你本月曆，裡面有一句「賺錢係工作嘅目的，工作只係賺錢嘅方式」，我而家就係咁喇，人工低咗，但開心咗，健康咗，因為有返自己嘅生活，始終每個人追求嘅嘢都唔同，最緊要自己舒服。