最近個心好唔舒服，覺得自己作為家姐好絕情好自私，因為細佬炒股炒到成身債，佢叫我幫手去財務公司借錢，但佢根本冇能力還，借咗點孭呀？所以我拒絕咗。
細佬上年炒股票賺咗50萬，佢話除返開平均有成4萬蚊一個月，自己本身份工得萬零蚊，冇理由繼續做落去，仲話如果唔係日頭有份工咁困身，夜晚全程睇住美股可以賺得更多，結果佢喺今年年初真係辭咗職，日頭炒港股同滬深嗰啲，夜晚又通宵炒美股。
雖然我係外行，不過都知道上年炒股票比較容易賺錢，今年就剛剛相反，我細佬亦都中晒招，賺咗嗰啲冇晒之餘仲倒蝕埋本金嗰幾廿萬，佢成日話股票係有賭未為輸，只要一日唔放，一日都唔叫蝕，可以鬥長命喎！但據我所知好多都唔會追到，例如佢買咗隻叫做容聯雲嘅股票，50幾蚊嘅時候買，而家跌到得4個幾，點反彈都冇可能拎得返啲錢啦！
最大問題係細佬將全副身家擺晒去股票市場，今年又冇返過工，啲錢有出冇入，其實佢由4月開始已經係咁問我借錢度日，個個月借8000至10000喎，係咪要陪你等隻4蚊嘅股票升返上50蚊吖？
我呢個家姐都有自己嘅家庭㗎，細佬都成廿幾歲人，仲個個月攤大手板問我攞生活費，我都唔敢同老公講。
冇返工完全零收入，細佬唔肯蝕放股票，仲周圍問朋友同埋嗰啲蚊型財務公司借錢再撈底溝貨，繼續有蝕冇賺，最近屋企已經不斷收到滋擾電話，由於兩老年事已高，阿爸阿媽借得畀佢嘅錢都一早借晒，所以細佬叫我幫佢出去借，理由係佢冇正當職業只可以借「黑財」，我有入息證明就可以問正規財務公司同埋銀行借，啲息差好遠，而且借到嘅銀碼會大好多喎！
其實我見到佢都覺得慘，不過幫唔到呀！因為細佬根本冇工作，叫佢搵工又唔聽，如果問財務公司或者銀行借錢，到頭來咪又係要我每個月幫佢還，而且細佬想借20至30萬，呢個數唔係一年半載還得完㗎，分期起碼搞兩三年，我自己賺錢都好辛苦。
阿爸阿媽唔同取態，我阿爸狠啲，佢話做男人要為自己嘅嘢負責，相反阿媽就錫細佬多啲，係咁叫我幫，仲話屋企得一粒仔，叫我呢個做家姐嘅唔好咁絕情，其實呢番說話即係道德綁架同埋情緒勒索，雖然我心知長貧難顧，冇可能為細佬蝕咗股票而走出去借錢，但係聽完阿媽咁講之後我個心都好唔舒服，質疑緊自己係咪太絕情太自私。
如果我好好景，有多餘錢真係幫忙冇問題，但我份工都唔係搵好多，而且冇辦法保證未來幾年唔失業，假設真係走出去借錢，到時有咩事還唔到咁點算呀？財政壓力又大，心理壓力又大，我老公又點諗呀！
其實自己嘅人生都過得好難，再要孭埋人哋嘅債項同責任上身，真係一件好辛苦嘅事，我唔係鐵石心腸，只係想量力而為，但內心好難受，又唔可以同老公講，驚佢知我連續幾個月畀錢細佬做生活費。
投稿讀者：Emily
炒股啫，唔一定要辭工嘅，有時返工反而仲多靈感
《公司有個美股燈神 買相反足以致富》
https://hkofficedaily.com/?p=15346