我朋友Ryan係某公司部門主管，佢睇完前兩日個post「人工可唔可以平500」之後，打畀我話有啲嘢想講，唔係畀一般求職者睇，而係畀請人方面有權話事嘅人睇。
事緣Ryan早前結婚，啲兄弟都係舊下屬，佢對住其中一個叫阿Ming嘅男仔特別內疚，因為當日呢個部門新埋班請人嗰陣，Ryan覺得嚟見工嘅阿Ming相當唔錯，不過老細話已經請咗一批人，要收一收緊budget，所以當時阿Ming last salary係15,000，expected salary 叫17,000，Ryan就用工作環境同其他福利打動阿Ming，氹到佢平手15,000嚟做。
同部門早一步請返嚟嘅同事每人由18,000起錶，有啲更加係2字頭，阿Ming前後做咗兩年，一年加1,000都只係追返佢嚟見工填嘅expected salary。
不過呢個數字並唔係最重要，因為影響最深遠係以後嘅路，幾年後呢班舊下屬各散東西，再出去搵過另一份工嗰陣，叫價已經可以係2到尾或者3字頭，反觀阿Ming，仍然喺2萬鬆啲呢個關口徘徊，其實佢哋班人無論學歷同經驗都幾乎一模一樣。
點解會咁？其實唔難想像，香港見工模式不嬲都係用last salary去評定新offer幾錢人工，當年阿Ming跳出去見工嗰陣，拎住17,000叫返佢嘅市價20,000，其他公司都已經牙痛咁聲，叫到20以上基本係冇可能，人哋唔會以你工作能力去決定你值幾多，只係覺得你上一份係咁嘅價，叫返正常價係「大咬」，係貪心，但呢個情況會不斷重演，因為每見一份工，對方都覺得你要500，1,000，1,500咁樣加先叫合理，冇人會明白你last salary係畀人壓低咗，亦冇人會深究你份糧點解唔貼市。
如果公司有雙糧，呢個比較會更明顯，當年啲兄弟逗緊28,000，新年double pay就係出56,000，阿Ming最新嗰份工係21,000，double pay係42,000，當中嘅距離足足有14,000咁多，再講一次，阿Ming同其他兄弟嘅學歷同經驗係一樣。
另外，有好多公司仲會因為你之前人工低，懷疑你嘅工作能力，例如「係咪呢個人做嘢唔掂呢？」，又或者「下，我哋請緊Manager喎，呢個last salary喺我哋公司仲低過一般Senior，唔通請你返嚟做阿head但人工同下屬一樣？」
Ryan話當時同阿Ming三九唔識七，當然冇為對方嘅前路著想，而家friend到結婚都搵佢做兄弟，真係內疚到瞓唔著，覺得自己當年好仆街。
所以作為一個有能力幫公司決定薪酬同招聘嘅人，就算將來同呢班同事做知心批又好，泛泛之交又好，純粹過客都好，真係唔好壓人哋價，因為你慳咗嘅錢，係唔會跌入你自己份糧度，老細可能會讚你好叻，但佢之後唔會再記起，如果你老細要壓嗰一千幾百先可以繼續run間公司咁辛苦，你勸佢執笠啦，反正呢壇生意一千幾百都賺唔到。
畀你壓價嘅人，一世都要孭住underpaid 去搵工同埋走以後嘅路，佢可能要好多好多年先追返個正常價，然後又發現畀咁高咁大嘅人拋離好多。
作為有能力招聘同埋決定薪酬嘅人，唔使刻意去幫求職者mark up到天價，畀返應得嘅人工同升幅對方，其實已經好足夠，壓價係會累人一世。
文中提及嘅《人工可唔可以平500》舊文喺呢度
👇👇
https://hkofficedaily.com/?p=18058