好多行家介紹求職者上個客度interview之後，都會好緊張個result，我當然唔例外啦！間唔中梗有一兩單出事，聽過行家因為咁樣而嬲咗個求職者，因為激親個客隨時怪罪Headhunter冇眼光，但如果呢個係西客，其實又使乜驚得罪呀？唔使服侍佢仲好啦！
其中一次，個新客同我投訴求職者冇禮貌。
我：「發生咩事？」
客：「我問佢人工可唔可以平500，佢話唔可以，咁我咪同佢講囉，香港而家啲樓咁貴，差一千幾百都冇分別架啦，咪一樣買唔到樓，呢一刻唔使咁拘泥人工喎，你話啱唔啱先？」
真係讓74億人都驚呆，照你咁講法，而家香港人人都買唔到樓，咁不如劃一收5,000蚊一個月啦好唔好？反正死唔死唔爭幾。
我：「其實你哋人工係below market price，再壓價就真係唔好喇，我哋都傾好咗先約人上去interview，同埋你公司都出名請人請得好密，你負責做招聘都辛苦啦，不如乘機同老細講下，第日方便你做嘢咋。」
客：「嘩！你同個求職者講嘢一樣既，呢樣先最勞氣，最後佢問點解我哋公司啲人離職率咁高喎，我咪答囉，問題就係你呢一代嘅人忘本，你知唔知佢點駁咀呀？」
我：「點駁呀？」頂你自己講啦！係咪下下要我扮到好期待咁問呀？
客：「佢話咁多人離職都仲覺得係員工問題，所以我哋公司永遠唔會搵到真正答案，放棄啦！」
我：「佢叫你放棄呀？」
客：「係呀！呢條死仔真係，喂你介紹啲人咁既，我自己出招聘廣告好過喇。」
好呀好呀！好行夾唔送！西客不用留，賺到佢錢都唔夠執藥，仲話自己出招聘廣告請人？放棄啦！