2019年第一日，放低晒所有工作去執屋，好多嘢都應該嚟個了斷，打開雪櫃見到有樽蜂蜜，原來2016年已經過期，點解我可以容忍佢過期居留兩年？
我同你都畀好多嘢過期居留，包括錯嘅人、憎恨嘅人、低級失誤，仲有一啲唔愉快嘅回憶，其實個心係得咁大，衰嘢佔據晒啲位，咁就裝唔到好嘢。
新一年，要放低嘅事就應該撇脫，要放低嘅人，就唔好再繼續糾纏。去識一啲志同道合嘅朋友，去愛一個唔會令自己傷心流淚嘅人。
最後清咗半間屋嘅垃圾，我同個friend講：「冇晒牽掛，隨時走都得。」
「走去邊？」
我：「冇所謂，去一個冇人識我嘅地方。」
「使L咩，呢度都冇人識你。」
……又啱喎。