IG分享咗幾單自己同朋友喺office經歷過嘅瘋狂事，包括：
👉🏻 喺公司廁格食三文治撞正同事屙屎
👉🏻 星期日帶女友返office搞嘢（唔係我呀，我朋友呀，ok?）
👉🏻 喺公司瞓睡袋唔知醒
👉🏻 微波爐爆炸公司臭咗幾日
👉🏻 公司開christmas party飲到嘔落地毯
👉🏻 IT部閂埋房門打FIFA賭錢……
我以為已經夠晒癲，點知啲讀者分享仲癲。
ji123iys：我公司試過有同事嘅大閘蟹走甩咗，係個女同事腳面行過，然後佢大叫⋯其他人即刻縮起對腳⋯
yukkwanyyk：有次返返下工，見有隻曱甴爬出嚟，之後想搵嘢噴佢，佢匿入某同事個櫃度，跟住好驚咁叫啲大粒幫手，個大粒一開，成個櫃桶都係曱甴，之後先知嗰個同事冇處理好啲零食（嗰包零食成廿隻都有），而嗰位同事又放假成個月。
xenialcm：返返下工，有執達吏來公司，原來老闆冇交租好耐下（估計成日拖），業主私下搵人清佢盤，最後老闆個阿媽（公司交咗畀仔女）拆番掂。仲試過冇交電費俾電力公司 cut 電。當年本來想走，但幫人頂咗隻死貓，最後老闆炒我，點知會計打來叫我張票要過兩日先入，原因係公司戶口兩萬幾都冇，怕彈票。
siufumui：喺公司換拖鞋，一個好玩得嘅外藉Director 入嚟搶我對鞋，然後我追住佢跑，兩條友圍住公司跑咗4個圈；又係嗰間好玩得嘅外藉Director 將我個手袋綁咗上天花板；繼續係好玩得嘅Director ，無啦啦衝去我個位，用膠紙縛住我喺個位度，我坐咗成15鐘先有人放返我出嚟。
作為版主，我真係好擔心一班讀者，究竟你哋返咩工🤣其他嗰啲喺office燜冬菇、打邊爐、地下有塊用過嘅M巾…等等嘅痴線嘢已經冇quote出嚟🙈後來又有個朋友WhatsApp我，話講office瘋狂事唔預佢，我心諗你又有咩咁爆呀？
「公司男廁尿兜有嚿屎，尿兜喎！我哋成班同事除咗諗係邊個做，仲不斷猜想個動機係咩？究竟係急到瀨真係趕唔切入廁格吖，定係惡作劇反社會人格呢？但你要除褲再轉身將個屁股對住個尿兜屙屎，其實都唔容易。」
🤣🤣🤣真係癲㗎！
解釋返IG「公司廁格食三文治撞正同事屙屎」單嘢先，嗰間公司個老細唔畀員工喺個位食嘢，早餐同lunch都唔得，但office係冇pantry，水機都係擺埋一邊，加上嗰個人遲大到又肚餓，所以先會嗱嗱聲買個三文治入廁格食，諗諗下都幾慘，仲要撞正有另一位同事衝入嚟無情開大，由於速度係迅雷不及掩耳（個同事應該肚痛），結果差啲臭到嘔晒成個三文治同黃膽水出嚟，後來睇返讀者留言，原來都有唔少人嘅公司係唔畀員工喺個位食嘢。
至於「喺公司瞓睡袋唔知醒」，就係我朋友上年同屋企人喺政見上有拗撬，佢離家出走又冇地方去，結果買睡袋返office瞓，其實已經瞓咗幾日㗎喇，但有一次唔知醒，結果老細返嚟見到就拍醒佢，同場仲有兩個女同事企喺度望住，最後點？都冇咩點，淨係叫佢唔好再喺公司過夜囉，朋友亦都返咗屋企瞓喇。
《那些年，Office的瘋狂事》呢個話題係永續，如果你有啲更癲嘅經歷，歡迎話畀我知或者留言，但真係癲得過上述嗰啲先好喎🤣
即刻睇返個IG post 《你喺office經歷過最癲嘅事》 👇
https://www.instagram.com/p/CRYtodMLfyg/