有日一位小姐嚟到診所。
佢行埋嚟問我：「醫生醫到啲咩？」
盡人事啦盡人事啦，腦殘就真心幫唔到啦。
我：「你嚟想睇啲咩呀？有邊度唔舒服呀？」
佢：「我要講？」
我：「你可以入醫生房先同醫生講，我同你登記先呀」
佢：「我要講？」
我：「有咩唔舒服都可以同醫生講嘅，我只不過想大概聽吓你想睇啲咩，因為有啲問題醫生未必幫到你嘅就會轉介你去專科咁啫。你俾身分證我同你登記先呀」
佢：「我要講嘅？」
娘子，你用咗月光寶盒波耶波羅咪嗎？
我：「不如咁呀，你俾你嘅身分證我先，我同你登記咗先」
你唔好再講『我要講』呀！你再講我真係用龜波氣功打到你鼻屎都飛埋出嚟啦！
佢：「醫生醫到啲咩呀？」
…我是咪跌入咗無限輪迴？
我：「你有咩唔舒服就同醫生講啦，我喺度答唔到你啲咩，我唔係醫生，唔知你有邊度唔舒服嘛」
佢：「你都冇正面答過我問題」
我覺得自己三七面好睇啲嘛，咪唔正面囉，你鍾意睇100%PIZZA面呀？正面囉我。
我：「我冇咩可以答到你呀，你要問嘅就入房問醫生啦」
佢：「我入到去要我講嘅？點講呀？用咩講呀？」
你有其他地方曉講嘢嘅可以隨便運用，我都想睇吓。
我：「嗯…就咁用口講？如果你覺得比較尷尬嘅話，都可以去其他診所搵女醫生，我哋係男醫生嚟啊」
佢：「你真係冇正面答過我問題喎」
你都係一槍打爆我個頭啦，等我成為肉醬啦。
我：「其實…我唔係好明你問緊咩，不過無論咩都好，我都只係要登記再俾你入去見醫生，唔知你明唔明呢？」
佢一支箭咁衝咗出診所。
我又成功趕客。
👉🏻即睇其他診所低能奇觀嘅文章
👉🏻《診所低能奇觀》 藥的極致
https://hkofficedaily.com/?p=17821
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。