作為HR新人，阿姐仲未放心畀我一個人見candidate，所以每次有人上嚟interview佢都會sit in，由我負責問啲基本問題，阿姐就會中途「補飛」畀意見，closing一般就由我做，佢話試用期後先等我自己in人喎。
返咗個半月，一直都相安無事，點估到早幾日有個candidate就比較「坦白」，句句窒爆阿姐，雖然好多人對HR都冇好感，不過啲對答又真係直接咗少少，明白大家見工有時會成肚氣，但帶住怨氣去interview可能會累咗自己。
由我開始，先叫對方簡單自我介紹，再問一啲公式問題，所有嘢都正常發揮，我亦唔敢加太多個人諗法，始終阿姐有份sit in，最緊要平安過渡啦！
然後到阿姐發問：「點解你之前份工做做下想轉嘅？」
Candidate：「因為細公司多嘢做，咩都要攬上身，我想轉大公司，冇咁忙。」
阿姐：「點解你覺得我哋公司唔忙？」
Candidate：「大公司咁多人，一人負責一part一定冇咁忙啦！」
聽到呢句我已經覺得佢衰硬，首先細公司好忙，大公司唔忙呢個諗法唔一定正確，唔係定律嚟㗎，我呢度OT都多，應該係視乎唔同部門嘅人手、分工、culture，當然仲有生意額之類。
阿姐：「你都幾老實喎，個個返工都唔想咁忙，包括我，但係你要睇埸合去講呢啲說話……」
未等阿姐講完，個candidate就打斷佢：「咁我嚟interview，你問得我都係想聽真話啫！唔通想我做戲講大話咩？」
其實Candidate呢句講得啱，不過你去interview多多少少都要交戲，呢樣亦都係共識，正如我阿姐所講，大家一樣打份工，邊個想咁忙先，但你唔會一埋嚟就講㗎嘛，呢啲係心底話，係心聲，你知我知佢都知，係唔使講出口㗎！
阿姐：「啱嘅，咁我哋有消息即刻通知你吖，最後你仲有冇咩問題？可以隨便問。」
Candidate：「又係等消息，聽你語氣應該冇機會啦，之前見咗幾份工都係咁，我知道見工有好多暗語㗎！」
阿姐：「咩暗語？」
Candidate：「例如對方話業績好，之後會有bonus，即係話而家出唔起高人工，先氹住你，到時業績好唔好得老細知之嘛，我又唔係會計；想請個有熱誠嘅人，即係要OT，未做完唔好走；有責任心，即係要你主動OT；如果間公司話唔主張OT，即係就算OT，都唔會有補水；返去等通知，即係唔請。」
只見阿姐一臉茫然，好似被拋窒咗一樣🤣🤣🤣呢個candidate都幾老實，如果佢做sales我可能會鍾意幫襯佢，唔知所謂嘅「暗語理論」係咪佢自創呢，有啲幾有道理，有啲就係歪理。
Candidate：「咁即係等幾耐冇消息，我就知道你哋唔請我呀？通常求職者啲資料會keep幾耐？」
阿姐：「我逐條問題答你，通常求職者見工fail，我哋公司只會keep一年，跟住會銷毀，呢層你放心，至於等幾耐冇消息即係唔請，其實呢，我哋嚟緊幾日仲會見其他求職者，不過你可以預兩個星期左右啦，如果超過兩個星期都冇人通知你second in或者返工，咁即係代表我哋已經請咗人喇。」
Candidate：「呢幾日仲會見其他求職者……呢句都係暗語啦。」
🙈🙈🙈唔係暗語呀，我想同佢講真係仲有人會上嚟見，不過阿姐喺度，我就無謂出聲啦！
Candidate走咗之後，阿姐同我講，覺得對方可能之前見其他工受過氣，所以說話比較直接，仲話自己當年後生都試過，不過以interview嘅對答方式同語氣而言，頭先又真係冇乜禮貌，加上之前見咗幾個candidate都唔差，應該唔會考慮呢位喇。
無可否認，呢位candidate講出口嘅說話，唔少人都會有共鳴，問題係有啲嘢真係唔需要講到咁白，唔使畫公仔畫出腸，希望佢嚟緊如果有其他interview，可以稍稍隱藏內心嘅怨氣，最緊要係贏咗份工返嚟先，人生在世，又點止見工要做戲吖，我係新人都知呢個道理啦！