早幾晚我沖涼，嗰陣around 11點幾，老公忽然喺出面大聲講：「老婆，你老闆WhatsApp你喎！咁夜會唔會有咩事呀？」老闆WhatsApp？夜晚11點幾？未試過㗎喎，我第一時間係諗會唔會公司有急事，所以就叫老公幫我unlock問下做乜。
我同老公個電話係互相用對方生日日期做密碼，我8月19，佢2月10，所以係819210，老公一早知，我沖緊涼嘅時候仲擔心係咩突發事，點知老公冇再叫我，咁就洗埋個頭先啦，出到嚟老公已經自己喺度打緊機。
我：「你幫我覆咗老闆嗱？咩事呀？」
老公：「哈，我都唔識點講，你自己睇下。」
拎起部電話撳入去WhatsApp對話睇，究竟你兩個傾咗咩呀……
老闆：「Elaine，瞓未？」
我（老公代覆）：「未呀，請問咩事？」
老闆：「咁夜仲唔瞓？想唔想傾計呀？」
唔知點解，雖然我同老闆係完全冇嘢，不過睇到老闆咁夜send msg問我瞓未，又問想唔想傾計，我個心突然好慌，我最驚係老公誤會……
我（老公代覆）：「傾計？唔想呀。」簡直係神覆，不過可唔可以婉轉啲問下係咩事呢老公。
老闆：「有冇掛住我？」
我（老公代覆）：「冇啦啦做咩掛住你？其實我係Elaine老公，佢沖緊涼，我幫佢reply，你係咪搵佢有事？我叫佢沖完涼搵你。」
睇到呢度我已經心跳加速，不過緊接落嚟嘅對話仲震撼。
老闆：「唔好意思，其實我都係你老婆個老闆個老婆，我趁老公瞓咗問候下女員工啫，而家冇事喇，打擾晒。」
你老婆個老闆個老婆……即係老闆娘啦！真定假呀？
我（老公代覆）：「唔緊要，早抖！」
老闆（原來係老闆娘）：「早抖」
你兩個都幾有禮貌喎，仲會講埋早抖。
未嚟得切去搞清楚發生咩事，我第一時間梗係顧咗老公感受先啦！
我：「搞咩呀？老公，你唔會覺得我同老闆有嘢呀？」
老公：「冇啦，我百份百信你，都未見過你夜晚偷偷講電話，晚晚都係我遲瞓過你，我又知你電話個password，你又畀我睇，我仲係咁易睇過你同老闆對上啲msg，全部講公事，我估真係老闆娘想check啲女員工，如無意外，應該唔止send msg畀你一個㗎喇。」
老公一路打機一路講，神態自若，真係唔似有疑心，反而我愈諗愈嬲，老闆又好，老闆娘又好，咁夜send msg嚟講埋啲咁嘅嘢，知唔知會影響到人哋家庭㗎？好在老公冇誤會咋，如果唔係家變都似呀！
我嗰晚愈諗愈唔對路，究竟係咪真係老闆娘呢？會唔會係老闆想問我瞓咗未，然後有工作要交畀我？不過呢種情況係從未試過，入咗呢間公司做嘢都已經3年半，老闆係未試過咁夜msg我再講埋啲咁唔得體嘅嘢，而且老闆份人係唔會講笑，愈諗愈多問號，直頭搞到我失眠。
由於搞到我老公，第二日我仲有啲火，打算問下老闆發生咩事，點知喺樓下等電梯撞見另一位女同事阿Sa，佢早晨都冇講就捉住我討論：「喂，你噚晚有冇收到老闆WhatsApp呀？」
我：「有呀！你都有呀？」
阿Sa：「原來你都有呀？Phoebe同Cathy都收到呀，佢哋兩個噚晚已經講畀我聽，話老闆無啦啦WhatsApp問瞓咗未，想唔想傾計。」
我：「咁你哋幾個點答呀？」
阿Sa：「我同Cathy都係回覆一個驚訝表情嘅emoji咋，然後話要瞓，問佢係咪有咩事囉，然後對面就話自己係老闆個老婆，又講咩想代老公問候下啲女員工喎！勁奇怪囉！」
我：「我仲大鑊呀！嗰陣沖緊涼，叫老公幫我睇幫我覆，差啲家變呀，好在老公冇誤會咋！」
阿Sa：「咁你唔夠Phoebe大鑊，個死婆有覆呀，問佢想傾咩。」
我：「佢哋真係有傾計呀？Phoebe收到老闆WhatsApp講埋啲咁嘅嘢唔覺得奇怪㗎咩？」
阿Sa：「Phoebe話始終係老闆，唔想覆得咁直接同咁絕，想知道係咪搵佢有公事喎，結果互send咗幾個msg發現唔對路，因為全部唔係傾公事，最後對方話自己係老闆娘，仲猛咁問Phoebe係咪同老闆有嘢，呢鑊佢水洗都唔清，應該有排煩。」
我同阿Sa返到上office，發覺仲有幾個女員工都發生同樣嘅事，個個議論紛紛，隔多陣老闆返到嚟，塊面從未試過咁黑，究竟你兩公婆前一晚做咩呀？耍花槍都唔好影響其他女員工嘅私生活吖嘛，不過風頭火勢，最緊要係老公又信我，所以冇特登再問老闆喇，我估佢自己而家都好煩，最想搵窿捐㗎喇。