古天樂話自己一路以嚟都係同屋企人住，我就啱啱相反，始終每個人嘅成長背景唔一樣，爸爸喺我細個嘅時候生意失敗，欠落周身債走佬，直至而家都冇見返，媽媽一個女人孭起成頭家，我要住個衰親戚屋企。
嗰個衰親戚成日對我呼呼喝喝，仲試過打我，每次阿媽放工接我走，梗要聽佢哋講埋啲單單打打嘅說話，雖然當年我只係小學生，不過都聽得出，我到而家仲記得。後來我出嚟工作之後，多一個人有收入，情況明顯改善，而阿媽就喺我30歲嘅時候離開咗，佢身體一向都唔好。
可能係阿媽在天之靈保佑，我嘅事業都算唔錯，人工同title有上冇落，最接近失業嘅一次係兩年前，當時間公司因為疫情而大裁員，其實個老細有提早預告，叫部份同事自己搵定工，我就係嗰陣轉咗嚟而家呢間新公司。
上個月，新公司又加咗我人工，目前有$53,000一個月，唔好以為好高，其實我年紀都唔細，呢啲都係以往經驗同履歷累積返嚟，而家已經係senior，升職加薪當然開心，不過都唔敢大使，之前租約期滿要搬屋，我都係由劏房搬去另一間劏房。
上年公司有一段時間要同事work from home，由於當時要收一個客嘅sample，對方係搵Courier，唔係順豐，所以我要向同事透露個地址等佢跟進，個同事見到已經知咩事。
「呢幢嘢好多劏房㗎喎，你仲要係B室，你真係住劏房㗎？」
唔覺得有乜嘢需要隱瞞，更加唔係咩唔見得光嘅事，我有交租㗎，點解要左閃右避？
我：「係呀，有咩問題？」
「你講笑咋？係咪搵朋友代收呀？」
我：「唔係呀，我真係住嗰度。」
「你幾萬蚊人工，高層，住劏房？搵鬼信咩？」
我：「呃你有金執咩！」
「嘩，真係估唔到，幾錢租呀？幾多呎呀？因為我有friend住過呢幢，佢都話好細，頭先見到個地址就覺得好熟。」
我：「幾千蚊囉，100呎多啲。」
「唔通……你爭人好多錢？不過又唔似吖，Admin個Flora得二萬零蚊人工，住緊嗰度都要$14,000，你人工有冇五皮嘢？應該有啦！你冇五皮都一定有四皮，住劏房？冇病呀？」
同事唔知我確實幾錢人工，但係佢嘅估計都好準確。
我：「其實搵二萬零蚊，租間$14,000嘅屋，有病嘅會唔會係人哋呢？我冇病，只係有經歷，你未試過係唔會知㗎喇，使大咗好麻煩㗎！」
「係啫，幾皮嘢人工住幾千蚊劏房，好誇張喎！」
我當然冇向呢位同事講細細個嘅事啦，不過就分享咗上一份工曾經面臨大裁員，好慶幸我自己冇事，最後總算工接工，可惜有個幾熟嘅舊同事就出晒事。
當時嗰位舊同事買咗部新車，隔咗3個月就傳出公司會大裁員，然後就輪到老細叫大家搵定工，不過仍然有一批人率先接大信封，買咗車嗰個同事就係其中一位。
買完新車即刻失業，個舊同事仲問過我有冇興趣接手，我梗係冇啦，搭巴士搭鐵不知幾咁消遙自在，養架車幾多使費呀？又要供，又要入油，又要停車場……
好記得舊同事買車嘅時候興奮到暈，之後接咗大信封就成個變晒，忽然話自己都唔係咁需要車，結果真係放咗，車唔同樓，一落地再賣出去自然會跌，我見到佢咁肉痛，雖然唔關自己事，但係都好心痛。
舊同事同我差唔多年紀，佢冇我咁好彩呀，搵咗大半年先搵到份contract工，做幾個月又要再搵，跟住又搵咗半年，期間問過我借錢，我有借，因為大家太熟，佢最後亦都有還，但我知道呢位舊同事都改咗啲衝動消費嘅習慣喇。
經歷令到我唔敢大使，呢一兩年市道又差咗咁多，加上睇到身邊人嘅故事，就算月入五皮嘢我都會勒住自己，或者喺好多人心目中，我呢種行為係「有病」，但我覺得只係價值觀問題啫。