我公司係某大集團，其中一個老闆之前贊助過香港足球隊，所以都幾有名氣，最重要係佢為人闊綽，逢初四都會返嚟office派利是，同事們年初四返工總算有啲盼望。
咁啱我有朋友係做體育記者，佢話呢個老闆以前有贊助賀歲盃（近年因疫情冇辦），連記者都會收到$500蚊利是，有啲行家冇份採訪都會跟住嚟，原因就係知道佢作風非常豪爽，亮一亮相講句恭喜發財就執幾嚿水，好過開OT喎！
對住記者都咁豪，呢個老闆對住旗下員工更加唔會手軟，唔計集團嘅開工利是，佢例牌每個職員派一封$1000金牛，呢個傳統好似話係公司盤古初開已經有，你識得呼吸同埋有心跳就有份㗎喇，連茶水阿姐都有$1000，所以冇人會初四請假，因為個個都係等呢個歷史性時刻，著到靚一靚去講恭喜發財，$1000可以買好多嘢㗎喇！
有啲同事話自己冇乜親戚，新年利是加埋都冇$1000，所以有呢一封已經頂晒，每個人初四都係牛咁眼望實門口，事關呢位老闆平時唔會喺office逗留，除非有好緊要嘅會要開，每年見到佢嘅日子加埋十隻手指數得晒，一瞬即逝，過咗就冇㗎喇！好可惜上年發生咗一件事，令到$1000利是嘅傳統從此改寫。
上年初四係補假，初五先返工，老闆派利是節目順延一日，但無阻同事們嘅熱情，平時開工都冇咁精神呀！結果呢位老闆一出現全場哄動，個個四萬咁口恭喜發財、身體健康、龍馬精神、出入平安、心想事成，一湧而上嘅場面以為有明星嚟咗，茶水阿姐都丟低塊布走去恭喜恭喜。
我哋個集團有3層樓，老闆會巡晒3層派利是，最後返上嚟我哋嗰層嘅時候，有啲同事如果之前行開咗就會把握最後機會走埋去講祝賀說話，就喺呢個時候，老闆突然收起笑容望向其中一位伸手拎利是嘅同事：「你頭先咪拎咗囉！」
男同事：「喔……係咩？」可能太突如其來，個男同事hang晒機唔知點答。
老闆：「後生仔，做人唔可以咁貪心㗎喎！我認得你個口罩，你應該拎咗2至3封。」
口罩都有得認？有呀，因為呢條契弟個口罩係綠色，唔係話綠色好特別，但成個office就得你一個係綠色口罩囉！新年流流柒少陣啦好冇呀？
男同事：「可能我唔記得咗，唔好意思。」事到如今，都冇得兜啦！
老闆：「唔係喎，我見你10樓已經拎咗，落去9樓又見到你拎，8樓有印象你又喺成班人入面伸隻手出嚟，而家我返上10樓又拎多次？咁你前後咪拎咗好多封？」
當時個場面真係好尷尬，好在有個Senior行埋去幫手解圍，老闆亦冇再追究落去，更加冇拎返嗰幾封利是，不過聽返個Senior同班高層講，老闆個心係唔高興嘅，仲考慮今年唔會再上嚟派利是，呢個疑團已經喺大家心裡面整整一年，今日年初四返公司果然應驗。
呢位老闆一早分好晒利是畀department head，再由department head分畀下屬，拎咗嘅人要簽名喺張list度。
本來開開心心派利是變到咁系統化，已經搞到冇乜氣氛㗎喇，拆開利是一睇，銀碼仲縮咗水由$1000變$500，唔知關嗰位男同事嘅事，定係關經濟唔好嘅事，不過有老臣子就講，呢個老闆每年派$1000嘅傳統最少有十幾年，估唔到今年會縮。
當日捉到個男同事無限輪迴不斷攞咗三四次利是，Senior已經狠狠地鬧咗佢一鑊，點知條友仲嬉皮笑臉話玩下之嘛，覺得老闆唔會認到三層樓百幾人，佢完全唔覺得羞恥。
呢樣都未算最谷氣，嗰位貪心男同事上年8月離職，雖然話老闆唔係奉旨要派$1000蚊利是畀員工，但係你已經搞寸咗個party啦！人走咗，留低嘅同事就要承受，所以頭先好多人都諗返起呢件事。