阿頭每逢新年就會叫成班同事去佢屋企拜年，通常玩大半日，坐下傾下鋤下Dee，然後佢個賓妹就會煮埋晚飯，而且一定係揀初三，阿頭話初一佢老豆老母嚟，初二就要去老婆嗰邊，初三最得閒喎。
雖然初三係赤口，但係去阿頭屋企拜年呢個傳統已經有7至8年，係今年停咗，因為佢個屋苑早排有人確診，如果係上年停咪好囉，因為有兩個同事上年因為鋤Dee鋤出真火，即場已經吵大鑊，仲差啲開片。
新年梗有啲人「非法聚賭」，佢哋鋤Dee亦係玩真銀，唔識或者唔想賭錢嘅同事就會玩UNO，嗰日玩玩下已經聽到鋤Dee嗰邊唔對路，有個叫David嘅同事無啦啦發爛渣，爆粗話：「Diu，咁L黑，唔L玩喇！」
因為阿頭有老婆仔女喺度，人哋對仔女仲係中學生，加上新年流流，講還講唔好喺一家大細面前爆粗吖嘛，見到阿頭面色一沉，另一個叫Andrew嘅同事就話：「喂！唔好教壞細路啦！輸唔起唔好玩喇！」
唔知Andrew係真心驚教壞細路，抑或想借啲意窒對方，總之David就好唔忿氣，繼續玩，繼續輸，偶爾聽到David贏一鋪又會意氣風發：「輸唔起？我鋤Dee嗰陣你仲係一條精蟲咋！唔係你拎住階磚三可以出先，我炒你double啦！」
聽得出Andrew亦開始動真火，當佢贏返舖嘅時候就會即刻向David還拖：「廢柴！一日廢柴，一世廢柴，同你平時喺公司一樣咁廢！」
我哋玩UNO嗰邊已經feel到浸火藥味，阿頭好言相勸不如唔好玩，佢兩個又唔聽，阿頭老婆塊面黑晒叫對仔女返入房，連賓妹都扮晒執嘢行出嚟睇咩事。
「J俘，仆街啦你！死矮仔！」
「我有K俘喎，你仆街先啦豆皮西！」
「DLLM，一嚟出大Dee，識唔L識玩㗎你！」
「關你鳩事咩！贏到你新年瞓街！」
「玩大啲吖！一千蚊隻！我哋兩個撕片，睇死你唔夠膽！」
「你戶口有西一千蚊咩死窮L！上次飯錢都未畀，財務公司初三唔開呀！」
粗口、唔吉利嘅說話、人身攻擊，乜都出齊晒，場面非常唔愉快，結果兩個人老土到丟啤牌，企咗起身互兇，內容係咁嘅：「咩呀！」「咩呀！」「想點L樣呀？隻揪吖！」「嚟吖，唔好得個講字呀！」「咩呀！」「咩呀！」
阿頭要發火先鎮得住佢哋，David嬲到自己走先，Andrew留低扮冇事，上年嘅初三就係咁樣過，赤口嘅威力真係唔到你唔信，新年鋤Dee啫，使唔使搞到咁呀？一早過嚟玩UNO咪冇事囉！
咁都未算，Andrew同David兩個大男人加埋都七十幾八十歲，之後返到office竟然繼續面左左，唔係一兩日喎，係足足成年喎，直至而家都未見到佢兩個喺公司交談同打招呼，除咗公事上嘅必要場合之外，食飯只要有Andrew就冇David，圍埋吹水只要有David就冇Andrew，佢哋應該至死不相往來㗎喇。
新年前我曾經同阿頭講過，好在今年唔使去佢屋企拜年，否則都幾尷尬，叫一個又唔係，叫晒兩個又驚出事，然後阿頭都話好彩，因為佢老婆好嬲，覺得呢兩個下屬唔識大體，仲嚇親佢一對仔女，唔係驚聽到粗口，係怕兩條友真係開片。
聽返阿頭講，佢一早諗住用疫情做藉口取消呢個傳統聚會，而家慳返，影張大堂通告話屋苑有人確診，再send去WhatsApp group話取消拜年就得喇，以後就算冇疫情，初三都未必會再叫同事上佢屋企拜年喎！係咪呢，好好地鋤Dee搞到咁，希望Andrew同David虎年破冰，咪咁肉酸啦，兩條麻甩佬仲諗住互嬲幾耐呀？