拜年最乞人憎係畀親戚問幾時拍拖？未算！拍緊拖又驚親戚問幾時結婚？都未係最難頂，仲有問你做緊咩？幾錢人工？幾時生仔？通通都係家常便飯啫！早兩日去拜年細舅母直頭問我哋借錢，新年流流搞邊科呀？
細舅母本身係某大公司高層，照計收入唔差，完全估唔到佢喺食緊飯嘅時候向咁多親戚借錢，包括我阿爸阿媽，而原因係佢個仔想結婚買樓，老老實實喇，冇錢咪唔好結囉，冇首期咪唔好買樓囉，有需要問人借咩？
成枱人面色一沉，大舅父同大舅母率先拒絕，佢哋話疫情已經令收入大減，大舅父本身係導遊，呢兩年已經冇得出團被迫轉行，邊有多餘錢可以借出嚟？大家都有個仔，要幫都幫自己嗰個置業先啦！
細舅母誓神劈願話之後一定有得還，仲會連本帶利，唔好玩啦！借錢呢啲嘢愈熟就愈唔好意思追你還，第日連親戚都冇得做就最麻煩，何況而家唔係講緊借一千幾百喎，人人屋企都隨手拎到十個八個出嚟咩！
成班親戚裡面最窮係另一個阿叔，佢之前成日過大海賭錢，聽講試過畀大耳窿由澳門押返嚟香港，又試過填我阿媽嘅資料做擔保人借財仔，激到我阿媽爆血管咁滯，總之呢個阿叔不嬲仙都唔仙下，點知細舅母一樣有殺錯冇放過，結果阿叔梗係冇錢借出嚟啦！
細舅母問完大舅父大舅母同阿叔，跟住就問我阿爸阿媽，我阿媽醒呀，有咁大作咁大，首先話阿爸之前工傷整親隻手，份工隨時冇得撈，仲要keep住做物理治療，然後又話我同朋友搞生意搞到一鑊粥，而家都爭緊人錢，其實以上嘅事並冇發生，估唔到我要牽連在內。
本身聽到細舅母向阿爸阿媽借錢已經躁躁地，新正頭我仲要飾演一個生意失敗嘅冇用仔，心情難免有啲影響，所以我當場就發爛渣，直指細舅母個仔要結婚買樓就自己負責，仲話每個人生活都有負擔，唔講出嚟唔代表冇難題冇煩惱，點解要其他人幫佢個仔埋單呢？
可能太激動，阿媽係咁拍我話唔好冇大冇細，最終餐飯喺尷尷尬尬嘅氣氛之下食完，成班親戚一齊走嘅時候，我依然怒氣未消，一路搭電梯一路話細舅母好過份，明明成個家族係佢份工最搵到錢，點解仲要向我哋借呢？
等到落樓各自搭車，得返我哋一家人嘅時候，阿媽就同我講：「唔使咁勞氣，頭先做戲㗎咋！」
我：「做咩戲？」
阿媽：「阿叔今日下晝問細舅母佢哋借錢，話朋友全家確診，而家冇工開，想借十萬蚊幫人喎，第一日識你阿叔咩，佢邊有朋友吖，次次都係作埋啲藉口，根本就係賭錢輸咗，細舅母即刻話自己個仔都籌緊首期，再WhatsApp通知我哋，預計以阿叔嘅性格，應該呢一兩日會私底下打畀我哋借錢。」
阿爸：「本來想話畀你聽，但係你頭先同女朋友出咗街，直接上細舅母屋企，咁咪冇得同你夾定囉！」
媽媽：「你阿叔真係死性不改，呢啲人幫佢只係害咗佢，幫得幾多次？」
我：「唔怪得你咁醒，冇理由即刻老作阿爸工傷，又屈我同朋友投資失利，咁點解細舅母要做醜人，由得阿叔食檸檬咪得囉！」
阿媽：「個個都咁好急才咩，你阿叔失驚無神問借錢唔係第一次，我哋老人家個腦轉得慢，唔夾定有時唔識推，你阿爸早兩年都係咁啦，借咗5萬畀阿叔，還咗一次$2,000，又話分期又盛，結果咪冇晒下文。」
呢招好熟口面，我公司有個同事又係經常問人借錢，好多人性格比較單純，會畀對方突如其來嘅要求殺個措手不及，有時又衰心軟呢！你同我隨時都試過，而且嗰位同事好蠱惑，例如問你借幾千，你只要答錯一句「冇咁多」，佢就會打蛇隨棍上降低銀碼，總之一定要喺你身上刮到錢為止。
後來大家有晒戒心，收到佢WhatsApp send嚟一個hi，第二句已經反問嗰位同事借錢，先下手為強囉，唔係可以點？總之人生中有呢類親戚同朋友就注定麻煩，都係嗰句啦，唔係想做人做到咁絕，不過每個人都有自己嘅煩惱同包袱，所以闖咗禍唔該自己負責返啦！
不過呢次拜年借錢嘅大龍鳳真係有啲反高潮，已經叫咗阿媽代我同細舅母講聲唔好意思，怪錯咗佢。