見到Goji突然結業有感，幾年前搵到份工，間公司做Spa同埋賣按摩精油，我嘅職位只係CS加Receptionist，人工14,000，唔使sell嘢，主要聽電話book時間，客人嚟到叫佢填表，mark下套票用剩幾多，答下問題，斟下花茶之類，呢度嘅職員係香港人，而技師大部分係泰國人。
細節唔識講喇，因為我前前後後只係做咗4日，第5日如常返工一踏出電梯，已經見到幾個人喺公司門口裝裝下，我唔知乜頭乜路，直行直過準備推門啦，跟住先見到門口貼咗張紙，內容大致係公司結業，深感抱歉，如需協助請致電XXXXXXXX，即係點呀？執咗笠呀？
「即係點呀？執咗笠呀？」其中一個女人好似識讀心，佢講咗我心裡面句對白。
我：「下？我都係啱啱先知。」
「你啱啱先知？你係呢度員工喎！賠返啲錢畀我呀！我上個月先買咗二萬幾蚊套票！」
我：「上個月我都未返工……」
「蛇鼠一窩，估唔到你咁後生，好眉好貌走嚟呃錢！」
自己仲未知咩事，已經一路被幾個客人狙擊，話口未完電梯門又開，唔知邊度又有一班客聞風而至，全部指住我個頭係咁鬧。
咪住先，我只不過行埋去個門口，又返得4日工，點解大家認定我係職員呢？呀…屌！我貪方便著住公司件jacket返工呀，背脊雞乸咁大隻字，係人都知我係員工啦！
因為我間按摩中心又未去到好有名，唔會好似Goji呢啲一早有新聞，加上返得幾日工咁大把，除咗interview見我嗰個女人之外，我根本冇其他同事電話，少少先兆同通知都冇。
講開電話，門口告示上面寫住個所謂總公司電話根本打唔通，結果群情越嚟越洶湧，最高峰嗰陣我比超過20個人包圍，佢哋都應該係收到風衝過嚟，然後喺人潮當中我見到按摩中心一個senior少少嘅女人，佢一出電梯門見到勢色不對，竟然匿喺人堆中慢慢退後，最終入返電梯走人，好嘢！真係要畀掌聲佢！
我想喝嗰位senior返嚟㗎，不過其他人太大聲叫囂，個個喊打喊殺，根本叫天不應叫地不聞，講真冇畀人打都算好彩。
好在最後仲有一兩個同事返咗嚟，太多客人有金錢上嘅損失，所以要報警求助，呢一日亦成為我人生中最黑暗嘅日子，畀咁多人鬧咗半個鐘頭以上，成世女都未試過，仲連續幾晚發惡夢。
返得4日工，冇聽過公司唔掂（應該係我同其他人唔熟所以冇聽聞），早知係咁梗係唔入嚟做啦！我人工得14,000，計都計到得幾百蚊一日，4日加埋連$2000都冇，又冇同事幫或者同我一齊跟進，最終要自己走去勞工處求助，搞咗大半年先拎得返啲錢，真係得啖笑。