究竟係慘事定係開心事，各位睇完之後自行判斷。
我公司請人有個壞習慣，就係例必壓價，通行都知㗎喇，聽講係老細落嘅指令，當年我嚟interview一樣遇過，還好expected salary填得比較進取，所以畀HR壓完依然多過之前份工。
壓價喺我哋公司係赤裸的秘密，同事茶餘飯後亦分享過，後來有個叫Calvin嘅男仔入嚟做，熟絡後都有呻，經歷大同小異，不過佢傻啲，竟然畀HR壓到低過之前嗰份，當時我仲直接問佢：「即係轉咗工仲搵少咗？咁轉嚟做咩呀？」
Calvin：「冇啦，同前上司頂咗幾句，再做落去都冇運行，又唔想失業，搵到呢度咪做住先囉！」
我：「但係Lynn（我哋個HR）應該知你last salary㗎喎，真係好意思壓咁多咩？」
Calvin：「佢知，不過Lynn話呢度福利好過我上一份，而且正常做落去會加人工，好快追得返。」
我：「你聽佢噏吖，呢度加人工好少㗎咋，有同事試過加$150，你做10年都追唔返呀！」
結論係－－－我錯！應該做20年都追唔返先真，因為老細以生意唔好為理由，出咗封email宣布凍薪，仲叫各位同事陪公司共度時艱，其實所謂「時艱」究竟有幾「艱」就冇人知，唯一肯定係老細永遠最奸。
宣布凍薪嗰年世界仲係風平浪靜，之後就遇着疫情喇，加薪當然隻字不提啦！換句話講，Calvin入咗嚟做3年都未加過一蚊人工，簡直係悲劇。
同事偶爾私下講阿Lynn好衰，幫老細壓價非常凶狠，好似啲錢會落咗佢個袋咁，但係Calvin例牌唔會講Lynn壞話，冇再呻過一句，係咪好奇怪呢？之後先知道件事唔係咁簡單，原來Calvin同Lynn唔知幾時撻着咗，點樣揭發呢段地下情？因為Lynnn派帖囉！
大家收到呢封紅色炸彈嘅時候都好驚訝，江湖傳聞係有咗BB，我哋仲知道單小道消息，Lynn曾經入房同老細講加人工嘅問題，話公司凍薪3年搞到士氣低沉喎，結果畀老細趕返出嚟……
低沉就梗㗎啦！Lynn忽然良心發現，根本係幫未來老公爭取加薪，然後擺晒全公司同事上枱，呢單嘢係秘書爆㗎，佢坐正喺老細房出面，聽住老細發火。
係咪衰吖！未來老公入咗嚟做都冇加過人工，3年咁耐仲搵得少過上一份，早知今日，何必壓價呢？份糧落後咗就有排追㗎喇！咁我相信Lynn當初冇諗過會同Calvin日久生情嘅，預計到就唔會壓得咁狼啦！
有啲嘢唔到你唔信邪，或者真係善惡到頭終有報，若然未報，可能只係花車未到。