求職者引用Twitter例子化解危機

我做HR,之前請人見到一位求職者好適合,學歷啱,經驗夠,唯一可以挑剔嘅係之前轉工比較密,而且每份工作之間嘅罅隙都幾大。

如果呢份CV入嚟嘅時候係經我阿姐,幾肯定已經淘汰出局冇機會上嚟interview,不過我自己就好想見一見,唔應該睇文字就抹煞人哋嘅機會。

求職者向我表示轉工轉得密同埋之間嘅gap位咁闊,原因都係得一個,就係佢之前好鍾意旅行,而家當然因為疫情冇得去,同時佢覺得自己係一嚿海綿,睇咗好多嘢同埋吸收咗好多嘢之後,係時候要坐定定消化。

「做完第一份工之後我去咗澳洲working holiday,喺農場返工,跟住返到香港再搵第二份full time,儲夠錢之後去咗撒哈拉沙漠,前後抖下做下freelance,再喺香港搵第三份工,然後又去咗尼泊爾個神山魚尾峰,我喺嗰度識到而家嘅太太,係咪好有緣份?」

我:「所以你之前就係打工儲錢,去旅行,用完啲錢又再搵工,儲夠又再去旅行?」

「係呀,你唔覺得有啲嘢一定要趁後生做,有啲地方一定要趁後生去咩?我老咗可能未必有體力去撒哈拉,疫情前我已經睇過極光,喺車上面體驗過沙塵暴,見過動物大遷徙,仲去埋天涯海角。」

我:「天涯海角?我阿爸阿媽之前跟團去海南島都有影相呀。」

「唔係海南島嗰個,係英國同蘇格蘭嗰個,由南面盡頭去到北面盡頭,去到可以叫人打個火印有證書,如果我後生唔去,老咗就只能夠去海南島嗰個。」

見見下工傾咗旅行,可能有好多人唔buy,但係我buy,活在當下、敢想敢做,呢種生活每個人都想,只係每人有各自嘅包袱。

In完之後我拎住佢份CV畀阿姐,一如所料,阿姐真係皺晒眉,死都唔肯入房in:「兩年轉一份工,跟住一兩年唔做嘢,見嚟都嘥時間啦!」

我同阿姐講:「咁每個人嘅心態都會隨住經歷同年齡改變,正如有啲人拍過好多次拖,一定落嚟結婚生仔就好愛家庭,亦有啲人青梅竹馬同一個人十幾廿年,點知臨老先入花叢,所以就算我哋搵個好stable嘅人返嚟,都唔代表唔會走,邊有一份工保證養個員工一世,又邊有一個員工保證會喺一間公司做一世㗎!」

或者我講得好爛,但總算打動到阿姐。第二round interview我又入埋房,嗰位求職者面對阿姐嘅challenge,搬出一個好好嘅例子,上個月Twitter宣布Parag Agrawal 會接替Jack Dorsey成為CEO,而新CEO嘅履歷如下:(附圖)

Jun 2006 – Sep 2006 喺Microsoft任職Research
(做咗四個月,相隔九個月再搵到工)

Jun 2007 – Sep 2008喺Yahoo任職Research
(做咗一年零四個月,相隔八個月後再搵到工)

Jun 2009 – Sep 2009喺Microsoft Corporation任職Research
(做咗四個月,又相隔八個月搵到工)

Jun 2010 – Sep 2010喺AT&T Labs, Inc任職Research
(又係做四個月,再相隔八個月搵到工)

Oct 2011 – Oct 2017 喺Twitter任職Distinguished Software Engineer
(做咗六年零一個月,離開12個月後再重返Twitter)

Oct 2017 – Nov 2021喺Twitter任職CTO,現將成為CEO

Parag Agrawal喺工作空檔期有讀書進修,拎到更多專業資格,而重點係當初見工嘅人如果嫌棄佢轉工多,Gap位多,Twitter之後就唔會有呢位 CTO,亦即係今日嘅CEO。

今次阿姐buy,後來我哋都請咗呢位求職者,唔止佢開心,我都好開心,起碼作為一個HR,我冇用一份死板嘅CV判人哋死刑,希望佢喺呢間公司發展得順順利利啦!

error: