之前見咗份工真係夠晒經典，仲要係Headhunt介紹，interview期間已經覺得嗰間公司要求多多，Line Manager一路見一路踩我，心諗你咁多質疑咪唔好約我嚟in囉，好啦，聽口吻應該係冇機會㗎喇，點知隔咗一日，個Headhunt打畀我話有offer。
「Hey Emma，恭喜你呀！個客話你ok，想問下9月1號返工有冇問題？人工就係我之前同你講嗰個數，都話high chance㗎啦！」講真我有少少意外，interview踩到咁都請？不過我對呢間公司亦有少少反感，所以口頭答應咗先，自己私下再認真考慮多幾日。
跟住戲肉嚟喇，嗰間公司嘅HR直接打畀我confirm offer，本來好地地，點知再隔多3日左右，呢個HR又打嚟畀我：「Emma，頭先同大老細傾過，佢覺得你要求嘅人工太高，減返$1000比較合理，其實你做落都會加返嘅，呢層唔使擔心。」
我：「吓，出晒offer都可以減？」
HR：「冇辦法呀，大老細又review吖嘛，你而家份工要一個月通知，嗌你9月1返工，咁應該辭咗職啦，我哋又唔想你失預算兩頭唔到岸，所以減$1000大家都唔使煩囉！」
咩邏輯呀？同埋你出完offer先減，係咪應該叫headhunt嗰邊同我傾下先呢？咁個Headhunt嘅作用係咩呀？
結果我打畀個Headhunt，原來條友都知！
Headhunt：「係呀，個客同我講咗，不過佢話想親自同你講吖嘛。」
我：「出晒offer喇喎，咁都有得壓價，即係之前講嗰個人工可以唔算數㗎？我咪好冇保障？」
Headhunt：「你聽我講先，照計你都辭咗而家份工啦，如果你turn down呢個offer，咁咪兩頭唔到岸囉，所以我建議都係做住先，之後好快會加返嘅，睇長遠啲吖嘛！」
我份糧愈高，Headhunt賺到嘅佣唔係愈多咩，點解呢個Headhunt會幫個客一齊壓我價？佢係咩心態？
其實我諗真啲，愈諗愈覺得呢件事係有鋪排，嗰間公司嘅HR同埋個Headhunt都不約而同講咗句：「你都辭咗職啦！」佢哋似乎係捉住我已經resign嘅弱點，如果turn down offer就會新舊兩份工都冇晒，兩頭唔到岸，咁我就要焗住答應減$1000都照做。
我好唔忿氣，又打畀個Headhunt理論。
我：「冇可能咁樣㗎喎！一開始講好咗嘅offer，點可以人哋應承咗先走去改㗎？」
Headhunt：「我明，不過你未簽contract㗎嘛！」
我：「你知唔知口頭承諾都有法律效力㗎？」
Headhunt：「我知，所以我成日都同啲求職者講，一日未同新公司簽contract，一日都唔好向舊公司辭職，係會有變數，不過你試下唔好咁執著先，我有同個HR講過，之後就會加返㗎喇。」
同呢種人真係溝通唔到，明明佢有問題，都仲要扮到好專業咁教求職者，呢個Headhunt根本冇盡力幫candidate爭取最好待遇，仲要將個客嘅問題完全合理化。
未完，仲有再過份啲！8月30號，即係距離9月1號佢叫我返工嘅日子得返兩日，嗰間公司個HR又再親自打嚟。
HR：「Hello Emma，唔好意思呀，頭先公司又傾過，人工方面想你減多$500，不過你放心，呢$500會喺試用期之後加返。」
我：「又壓多$500？即係一日未返工同你哋簽contract，個offer每日都變緊，仲有機會再減喎！咁上次減嗰$1000呢？出完offer之後，你前後壓咗我$1500喎！」
HR：「放心，呢$500一定會喺試用期三個月之後加返，另外我哋公司大約12月就會review多次全部同事嘅人工，咁下年都會有調整嘅。」
你講緊乜嘢，我又聽緊乜嘢呀？仲好意思叫我放心？
我：「哦，好吖。」
HR：「Ok，咁我哋9月1號見啦，到時你嚟人事部搵咗我先，準備好contract㗎喇，簽咗就唔會再變，另外你有冇證件相？上次interview你冇畀相，我要同你整埋張staff card。」
我：「得，到時畀埋你。」
9月1號，即係今朝，我冇返到呢份新工，因為……我都冇辭到而家份工。
由於呢兩年疫情，我手頭上有好多大假未放，如果真係要扣假走，其實我可以扣到兩個星期，變相唔使一個月通知，最初我打算轉工，原意都係搵到之後辭職，再唞多十日八日先返新工，不過呢位HR第一次打嚟話要壓我$1000嘅時候，我已經卻步，因為愈諗愈嬲，所以始終冇同而家做緊嘅公司遞信。
然後我今朝打畀個HR話唔返……
個HR見到我當日朝早先話唔返，即刻發晒爛渣：「你而家先講？之前出咗offer畀你㗎喎！」
我：「咁你前後壓我$1500人工，都係出咗offer之後先講啦！」
HR：「唔好講呢啲先，我哋個同事過幾日last day㗎喇，預咗你今日返工可以pick up佢嘅工作，你再諗諗啦，反正你都辭咗職，何必搞到失業呢？一係我同老細講唔使等試用期，即刻加返$500先，咁得唔得？」
我：「唔得呀，因為我都冇失業，我有嘢做呀。」然後我就收咗佢線。
過咗唔夠5分鐘，Headhunt打畀我：「喂，Emma，聽個HR講你頭先turn down offer喎，你知唔知我好難交代㗎？」
我：「咁佢前後壓我$1500人工，你對住我又唔覺得好難交代嘅？」
Headhunt：「原來你仲執著呢樣嘢，佢哋之後promise會加返㗎！」
我：「Promise？學你上次話齋，我都未簽contract，promise呢啲嘢要black & white吖嘛，你教我㗎喎！」
Headhunt：「而家唔係鬥氣嘅時候呀，你知唔知佢哋有個同事過幾日last day，想你返去可以交接㗎，你臨時先turn down offer，真係搵唔切replacement，幫幫手啦！」
我：「幫手？我畀人壓$1500嘅時候你唔幫手？你搵唔切replacement畀佢，關我咩事呀？」
Headhunt：「坦白講，咁樣對大家都冇好處，你臨返工先turn down offer，嗰間公司會blacklist你，以後你再apply佢哋就好難，我呢邊都會blacklist，幫唔到你搵工。」
我：「其實你係咪當我三歲小朋友呀？一間出咗offer先走嚟壓價嘅公司，佢唔blacklist我，我都blacklist佢啦，仲想去做呀？你唔幫我爭取最好待遇，你又覺得我好驚畀你blacklist？」
臨尾我仲強調多一次，口頭協議都有法律效力，唔排除會向Headhunt公司投訴（雖然唔知有冇人受理），係呀，我就係咁執著！
我覺得自己好幸運，因為手頭上有大假，所以當時冇即刻辭職，然後見到間新公司出爾反爾就果斷決定唔轉工，後來見佢再壓多$500，更加覺得呢個決定冇錯，唔係銀碼多少嘅問題，係呢間新公司嘅作風同操守問題，當知道佢哋有個同事就走，而家手忙腳亂，我真係好開心。
至於個Headhunt，我諗佢都要同個客有排交代，你點對我，我點對你啦，blacklist？我唔開你間Headhunt公司個名都仁至義盡。