返工如此多fun 隔籬office啪啪啪全程直播

老闆因為疫情嗰陣要開源節流,所以將一間細公司變成更細嘅公司---由商業大廈搬去觀塘一個分租工廈單位,人數保持12個員工,不過間office就得6個位,咁點搞呢?就係安排同事好似shift咁輪流返工。

12個人分成A同B兩team,A team返一三五,B team返二四六,冇錯,我呢間濕鳩公司係要返六日,真係so9sad,所以觀塘啲濕鳩工廈係絕對襯得起我哋,你係咪諗駱駝漆嗰種工廈呢?Sorry,我都想咁方便,呢個分租工廈係就快行到去麗港城嗰邊咁滯。

講下呢個分租office先,佢係一層裡面分拆咗好多個單位,大門口拍卡入,有大單位亦都有細單位,有啲一人office通常係化妝師租嚟畀客試妝,有啲就幫人修甲,大少少就有人賣咖啡豆,又有啲不知名旅行社,故此都幾多閒雜人出出入入,我哋呢間就中型啦,所以先容納到6個人左右。

本身返足六日office,而家有一半時間可以work from home,呢種情況仲維持咗接近兩年,講真都幾爽嘅,老闆似乎無意搬返去傳統嘅獨立辦公室。

三日屋企做嘢,三日返公司做嘢,其實時間一樣咁快咁好過,因為呢層分租office實在太多怪人太funny喇,就講賣咖啡豆個阿叔,佢成日走過嚟我哋呢度打牙骹,似乎係睇中我哋一個女同事,日鳩日拎啲咖啡豆過嚟做禮物。

個阿叔成60歲,成口煙屎牙(其實應該係飲得太多咖啡嘅漬),我個女同事就得廿幾歲靚靚女女,所以基本上都唔係好理個阿叔,嗰啲咖啡豆就畀我哋分晒帶返屋企。

呢層仲有個女人操滿口鄉音嘅廣東話,開咗間按摩店,佢個所謂office裡面只係得一張按摩床,即係有窿畀你塞個頭入去嗰啲呢,不過上親嚟搵佢按摩嘅都係男人,我哋極度懷疑佢提供「特別服務」,好想派老闆過去「放蛇」,老闆又嫌人哋好樣衰好大份,仲話個女人好似坦克車,所以死都唔肯過去一試虛實。

仲有一間相信係財務公司嘅物體,佢裡面坐得3個人,係全層唯一一間長期打開門嘅公司,成日有唔同嘅人上去,有次行過見到個客畀啲信件佢,條金毛職員就同佢講要搵多個擔保人,所以我哋估係唔合法嘅細財仔,估啫,唔肯定。

同層仲有一間賣成人用品同埋韓國女裝嘅舖頭,成人用品嗰間睇唔到入面係點,佢只係print咗張紙貼喺門口,我哋路過見到先知佢賣乜,至於韓國女裝嗰間我估佢係網店,因為日日見到佢包貨等順豐一車一車咁寄件,生意應該唔錯。

最經典就係痴住我哋隔籬嗰間office,真係完全冇頭緒佢哋做咩生意,個男人只會晏晝五六點先返,偶爾撞正佢開門會見到裡面有兩張辦公枱,超級神秘,不過公事唔知佢做乜,私事反而好清楚,因為呢層樓啲牆太薄喇,隔音勁差。

呢個男人每次返嚟就係同女人搞嘢,我哋一般6點夠鐘就走,但偶爾會OT,唔太過份,頂多做到7點半左右,總之隔籬office一過咗6點有人返呢,就會聽到一男一女喺裡面啪啪啪同大部分嘅對話,癲過絵麗奈喺AV裡面講嘅嘢,因為除咗有「我唔得啦」「我頂唔順啦」「好攰呀」同埋「救命呀」呢啲基本台詞之外,有晚我哋OT得6條女喺office嘅時候,仲聽到隔籬office個女仔講咗句:

「你好衰呀!又唔戴套!戴啦!一陣有咗BB點算呀?」

跟住我哋就聽到一把男聲講:「唔怕啦!如果有BB我哋咪結婚囉!我會負責!」然後又一輪啪啪啪,雖然睇唔到影像,但係聲音全程直播,好在我哋呢更係全女班,尷尬得嚟又覺得好好笑,同時要忍笑,因為驚隔籬office聽到。

不過呢,男嘅把聲次次一樣,女嘅把聲就好似次次都唔同。

曾經問過另一更同事有冇聽過隔籬對男女啪啪啪,佢哋話聽過一次,但因為呢一更同事有男有女,佢哋覺得場面好老尷,通常即刻執嘢走……痴線,咁精彩都走?返工就係要呢啲娛樂吖嘛!

上星期我哋忍唔住,6個女同事齊齊等到隔籬office「完事」,再等埋佢哋離開嘅時候開門扮去廁所,終於見到條女嘅廬山真面目,睇樣似廿幾歲後生女,肯定唔老,不過個樣就……佢個頭好似壓扁咗嘅漢堡包,明既,有食唔食罪大惡極吖嘛,唔知有咗BB會娶嘅係咪呢個,可能佢哋係真愛,純粹土地問題先要喺office啪啪啪啦!

我個人幾enjoy而家呢個濕鳩office同埋返工模式,返甲級商廈都冇咁開心,等我再觀察下之後啪啪啪啲女主角係咪同一個人先,我都想知壓扁咗嘅漢堡包係咪條仔嘅正印。(完)

真係……點可以唔重溫以下呢個經典投稿呀!
漏低嘢返office拎 門口聽到呻吟聲
https://hkofficedaily.com/?p=15735

長氣都講多次,如果未睇《辦公室日報》最新一集YouTube嘅朋友,記得快啲click以下連結喇,今個星期仲要咁多假期,消磨下都要啦!

YouTube video
error: