早幾日見到連登有個post嘅主題係「見過同事最癲點蛇王法？」裡面提到做飲食業見過經理粒聲唔出去剪頭髮，之後若無其事返嚟但個頭明顯短咗勁多，最終老細睇到呆咗之餘，仲即場炒埋個經理，果然係好癲，不過老細會炒人都算係咁，我親身經歷過一單仲無奈。
話說我當年喺一間雜誌社做，講真我連本嘢叫咩名都唔記得喇，因為起碼8年前，嗰本所謂嘅雜誌仲要唔係公開發售，純粹喺某啲食肆門口免費取閱嗰種。
呢間嘢連埋我得6丁友，老細長期唔返office，因為佢出面仲有另一間公司，我嘅職位係編輯，真係上網send CV去見工搵返嚟，不過呢間公司裡面其餘5位同事就係一早互相認識，一個介紹一個咁樣入嚟做。
全部同事本身係識，得我一個外人會唔會被排斥？唔可以話排斥，因為呢班同事返工嗰陣都唔會點交談，佢哋好忙㗎，先講下三條女，有個係戴晒畫家帽嘅典型文青打扮，佢喺office粒聲唔出係咁自己畫畫，好有藝術氣質，淨係從來唔做嘢啫。
仲有條女唔知搞咩日日喺度織頸巾，佢勁呀，由返工到放工都唔開電腦，但我哋份工係要用電腦打稿同埋update個網站，唔織頸巾嘅時候仲會除鞋擺對腳上張枱玩電話，唔知以為佢去咗度假，問你服未？有時我會聞到腳臭味，可能係心理上凝住啦！另一條女朝朝返11點，然後4點幾就走，佢話讀書喎，呢個開電腦呀，不過主力做自己啲功課咋。
仔方面都係有3個，一個係我，一個叫Anthony，佢全日喺度打機，唔打機嘅時候就係煲劇，每星期梗有一日放低個袋就返大陸揼骨，我好記得佢話自己去水圍村咩天上人間，揼完大半日就會返嚟拎袋直接放工。仲有一條仔聽講叫Gilbert，點解係聽講呢？因為我淨係見過佢兩次啫，前後加埋都冇兩個鐘，其餘時間完全唔見人。
本身Gilbert唔返工我係唔知有呢個同事存在，直至有一次佢哋話老細會返嚟簽一簽文件，咁我先至第一次見到Gilbert，我問過Anthony：「咁Gilbert係做乜㗎？Sales？平時出去見客？」
Anthony：「唔係呀，Gilbert都係編輯，同你一樣，佢唔使見客㗎！」
我：「哦，原來都係編輯，咁Gilbert唔做嘢嘅？」
Anthony ：「佢係我表弟嚟㗎！嗰陣時老細要請人咪益下佢囉！」
我問你點解Gilbert唔使做嘢，唔係問你哋咩關係呀！佢係你表弟就唔使做嘢呀？編輯啲嘢我一個人做晒喎！完全答非所問。
呢條Anthony係office裡面比較senior嗰位，做咗……一年咁多，其實間公司當時都係開咗一年，Anthony嘅工作就係負責分派啲嘢畀同事做，呢個亦係佢唯一嘅job duty，其餘時間佢真係負責打機煲劇。而畫家妹就係Sales，但佢完全唔見客唔call客唔send email，織冷衫妹就係designer，不過佢唔開電腦，有時仲會叫條仔上嚟公司，咁佢條仔上嚟做咩呢？勁喇，條仔上嚟砌模型。至於返11點放4點條讀書妹就係CS，負責應付客戶查詢，但由於本雜誌冇廣告客，所以根本冇查詢亦冇投訴，又係白逗人工。
我作為編輯又做乜㗎呢？就係上網將啲餐廳嘅資料copy去網站，介紹下有咩食同埋優惠活動，留意返，呢堆餐廳都唔係畀錢落廣告，咁公司零生意點解可以容忍？我都唔知呀，老細嗰次返嚟兩個鐘就係同我哋開會傾下搵客進度，我聽到畫家妹同佢講：「傾緊，啲餐廳話冇咁快決定係咪落廣告，要等總公司畀feedback，最近都有keep住追佢哋。」
嗱，我喺度返咗一個月，問心真係冇聽過佢call客同埋講任何同廣告有關嘅嘢。
我同Anthony反映過Gilbert唔返工，全公司得我一個編輯做嘢嘅問題，估唔到Anthony直接同我講：「你唔好咁多事啦，呢度不嬲都係咁，請你返嚟就係要補返個位，有個人幫手整下本雜誌同埋網頁嘅內容。」
其實份工係易做嘅，因為全部嘢都copy and paste，但你要一我個人做晒，再簡單都要花時間，而且睇住其他人完全唔做嘢，癲到工又唔返，電腦又唔開，我就覺得好唔公平，結果我做咗一個半月就辭職。
我辭職係同Anthony講，Anthony就要知會老細，老細知道後就特登返嚟公司問我點解唔做，嗰條Anthony竟然喺老細返嚟前警告我，千叮萬囑唔可以講Gilbert冇返工……咁都得？我當時假意答應，等到老細返嚟之後，佢叫咗Anthony同入房一齊同我傾。
老細：「做咩辭職呀？返咗個半月就唔做？」
我：「都冇人做嘢，Gilbert又唔返工白逗份糧，雜誌同網頁啲嘢全部都係我入。」
老細聽完呆咗一呆，Anthony即刻睥住我，理得你吖！我都唔做啦，使畀面你呀！但我勢估唔到老細定下神來之後會咁答：「咁你都要做㗎，呢個係你編輯嘅職責嚟㗎嘛！」
你痴線㗎！唔返工齋出糧嗰個唔話，你話全公司唯一一個做嘢同埋提出問題嘅人？趁地淋啦你哋，講多都無謂，話唔定你開間公司洗黑錢呢！
我當場出返去執嘢走，老細同Anthony就繼續喺房傾，走嘅時候我竟然聽到畫家妹同織頸巾妹畀說話我聽，佢哋話：「唉，好好地又唔做，嚟緊又要我哋幫手update網站，麻鬼煩！」
呢間公司個老細同班同事都好癲呀！我唔知道老細同Anthony係咪又有關係，不過總算天有眼，我走咗之後唔夠半年，呢間公司都執Q埋喇，因為去開以前擺嗰本雜誌嘅餐廳食飯，我問人點解而家冇得拎，有個餐廳經理同我講間雜誌社冇咗，Yeah！總算天有眼，雖然我都知個老細人傻錢多，應該唔會蝕入肉，但我真係好有興趣知道嗰班蛇王蛇到咁離譜嘅同事點樣適應出面其他工作。（完）
極度懷疑係咪同一個老細
《我老細係二世祖》1 上到去觀塘office乜都冇
https://hkofficedaily.com/?p=16500
《我老細係二世祖》2 錢多事少冇嘢跟
https://hkofficedaily.com/?p=16510