原來唔止啲病毒會人傳人，連辭職都會㗎！新年過完，雙糧出完，今朝我正式遞信畀阿姐辭職，結果喺房畀佢「盤問」咗15分鐘，又叫我考慮留低，不過講真吖，15分鐘畀我想像中係短，佢最後見我去意已決都冇再勉強。
接受咗我resign，阿姐就指名道姓叫我同另一位同事交接工作：「咁你搵Cathy夾一夾啦，等佢pick up下你啲工作，你手上係咪有個project？你畀埋佢吖，兩個一齊跟，費事你走咗之後唔知可以問邊個，到時我有咩就搵Cathy啦！」
脫苦海！最難嗰關就係遞信畀阿姐，而家都過埋喇，嗱嗱聲搵Cathy交接啦，早啲丟晒啲嘢出去，我自己心理壓力都冇咁大吖嘛，但係我勢估唔到當我拎住疊file去搵Cathy交接，順便講聲我已經resign嘅時候，Cathy會有咁嘅反應：「咪住先咪住先，你唔好pass啲嘢畀我住，其實我今日晏晝都會辭職，信都打好咗，你等我遞埋先，到時阿姐就會搵另一個同事跟。」
我：「你又辭職？」
Cathy：「有咩咁出奇？淨係你可以resign，我唔可以resign？」
我：「可以，不過有啲突然啫，之前都冇聽你提過唔做。」
Cathy：「不嬲都係成日講辭職嘅人永世唔會辭職，冇講過辭職嘅人就會失驚無神唔做㗎啦，你都冇提過㗎！我都未話你，走去截我糊，一陣我遞信畀阿姐肯定好麻煩，咁都畀你快我一步。」
我：「咁你都可以而家遞㗎，做咩要等到晏晝？」
Cathy：「叫緊人事部幫我計假期呀，佢哋未覆我，分分鐘扣埋假我早過你走。」
我晨早返嚟辭職真係好好彩呀，因為Cathy晏晝遞信嗰陣，足足喺阿姐房傾咗成個鐘都未出嚟，估都估到佢哋喺入面講咩，後來Cathy出返嚟嘅時候好似虛脫一樣。
Cathy：「煩到癲，係咁叫我留到4月，我講咗好多次唔得啦，話咗已經買晒機票旅行，佢仲要問我機票可唔可以補錢改期，然後問我同你係咪一早夾埋辭職，呢啲嘢要夾㗎咩，話辭就辭㗎啦！」
我：「咁你最後成功走到呀？」
Cathy：「可以唔成功㗎咩？佢臨尾叫我打畀阿Sam交代啲工作，唉，阿Sam放緊假我都唔好意思打去。」
阿Sam係我哋另一位同事，因為佢清緊假，人喺香港，不過未返公司，而Cathy萬般不願意都有打去，夢幻嘅一幕就此發生，因為阿Sam同Cathy講：「你唔好同我講，當我唔知，當你搵唔到我，我放完假返嚟都會辭職。」
原來阿Sam新年前去咗interview，經headhunt搵到份新工，已經出晒offer，不過佢同人話離職要兩個月通知（其實一個月就得），因為阿Sam嚟緊搬屋，想預留返少少時間處理私人事務，唔想到時工接工咁頻撲。
Cathy唯有同阿姐講搵唔到阿Sam，但係阿姐可能好不安，竟然自己打去，仲奸到打133（阿Sam後來同我哋講），我哋傾過，阿姐應該係覺得阿Sam放假唔聽公司同埋同事電話，點知又收到第三個同事辭職嘅消息，呢次真係晴天pig pig！
阿Sam因為唔想交接，焗住提早講自己都會辭職，阿姐遭逢連環打擊之後痴咗線，行出房搵我同Cathy發脾氣，問我哋係咪有心玩嘢，冤枉呀！我哋3個事前根本冇溝通過，點估到會「心靈相通」，resign都會人傳人先得㗎！
因為阿姐大發雷霆，有個唔關事嘅同事Simon又聽到，佢後來話feel到嚟緊冇好日子過，一來唔知請唔請得切人，就算請得切，成個部門得返佢一個舊人，肯定要pick up晒我哋啲嘢，愈講愈愁嘅Simon突然講：「我都唔做喇咁！」
Cathy：「關你咩事呀！你搵到工咩？」
Simon：「一早想走啦，諗住新年後慢慢搵之嘛，平時都做到仆街，你哋走晒我肯定命都冇。」
你唔好搞事啦Simon，係都搵到工先啦！如果再有第4個同事辭職，我諗阿姐轉頭要去睇精神科醫生㗎喇！
個人認為有時辭職都係一種氣氛，如果間公司本身有問題，可能大家心裡面一早蘊釀想轉工，只係同事唔郁，又慣咗個環境，咁咪會hea住hea住搵機會囉，不過而家人人都遞晒信，所以Simon就有種想加快腳步，甚至係辭咗先講嘅自然反應，因為佢大約意識同估計到，嚟緊除咗要pick up我哋啲嘢，仲要幫手教埋新人，呢鑊肯定做到hihi！
我第一個遞信，阿姐同我傾咗15分鐘，Cathy第二個遞，佢哋傾咗成粒鐘，而Sam雖然個人唔喺office，不過聽返佢講，阿姐打畀佢都傾咗個半鐘，如果Simon又走入去resign，我諗起碼傾半日，而且阿姐應該會發晒癲。